Aalisarnermut, piniarnermut, nunalerinermut pilersornermullu naalakkersuisoq Peter Borg (D) aamma isumaginninnermut, suliffeqarnermut, ineqarnermut, attaveqaasersuutinut isorliunerusunullu naalakkersuisoq Aqqaluaq B. Egede (IA) upalungaarsimaneq pillugu tusagassiortunik katersortitsipput.
- Upalungaarsimanermut pilersaarut ullumi saqqummiupparput. Ajornartoornermut piareersarneq – ullut tallimat ingerlanerini napatinnissannut piareersarit, Peter Borg oqarpoq.
Quppersagaaraq ulluni tallimani qanoq imminut pilersortoqarsinnaaneranik siunnersuutinik imalik oqaluttuaraa.
- Imminut pilersorsinnaasut allanillu ikiuisinnaasut amerlaneruppata inuiaqatigiittut nukittunerussaagut, oqarpoq.
Siunnersuut ataaseq piareersaallu ataaseq malinneqarpata iluaqutaarujussuarsinnaasiq, Peter Borg oqarpoq. Siunnersuutit quppersagaaqqamiittut kommunit, politiit, suliffeqarfiit allallu suleqatigalugit suliarineqarpoq.
Piffissaalluarallartillugu iliuuseqarneq
Aarlerinartoqanngitsoq oqarpoq, ajortoqassagaluarpalli piareersaatitut atorneqarsinnaalluni.
- Piffissaalluarallartillugu iliuuseqarnissamut tunngavoq, imaanngitsoq ajortoqalersoq, Peter Borg oqarpoq.
Piareersarnissap qanoq pingaaruteqartiginera erseqqissarniarlugu innaallagiaaruttoqarnera Covid-19-ilu assersuutigai.
- Ullunut tallimanut piareersarnissamik kaammattuut piviusorsiorluni ajornartorsiornerup qanoq sivisutigisinnaaneranik ilisimasallit naliliinerisigut suliarineqarpoq, aamma nunami pissutsit soorlu silap pissusia attaveqaatillu eqqarsaatigalugit, Peter Borg oqarpoq.
Ullunut tallimanut upalungaarsimanissaq oqartussat pisariaqartitsinerpaanut ikiuukkiartorsinnaanissaannik qulakkeerinnissaaq.
Ataatsimuussaagut
Ajornartorsiornissamut sillimanermut quppersagaq inuiaqatigiinnut tamanut paasiuminartumik saqqummiunneqartoq, Aqqaluaq B. Egede oqarpoq.
- Paasissutissat pingaaruteqarput, piffissaagallartillugulu paasissutissiinissaq pingaaruteqarpoq, oqarpoq.
Inuit attaveqaqatigiittarfiisigut tusagassiuutitigullu oqallinneq sakkortooq oqarpoq.
- Sineriammi najugaqartutit tapersersorpatsigit. Naalakkersuisuni ataatsimoorpugut. Qularinngilarpullu ilissi tapersersoritsigut.
- Inuiaqatigiit tamarmik pineqarput, kinaassuserput kulturerpullu attatiinnarsinnaaneripput apeqquserneqarpoq. Ataatsimuussaagut, Aqqaluaq B. Egede oqarpoq.
Nittartakkatigut attaveqaqatigiittarfitigut ataatsimoorneq pilersinneqarli
Ataatsimoorneq nukittunerulersitsisartoq oqarpoq.
-Facebooki aqqutigalugu ataatsimoornerput pingaaruteqarluinnarpoq. Isummagut inituallaassanngillat. Ataatsimoornissarput pingaaruteqarpoq, naleqartitavummi assigiipput, oqarpoq.
- Avataanit avissaartuunnissarput isumaqatigiikkunnaarnissarpullu anguniarneqarpoq, Aqqaluaq B. Egede oqarpoq.
Innuttaasut tapersersuinerat Naalakkersuisunut pingaaruteqartoq aamma oqarpoq.
Upalungaarsimaneq nukittorsarneqartoq
Peter Borg oqaaseqaqqoppoq, tassanilu Danmarkimi upalungaarsimanermik suliaqartut suleqatigilluarnerulerniarlugit suliniuteqartoqartoq oqaatigalugu.
- Sinerissami sumiiffinni aarlerinarnerpaani atortunik qanittukkut nassiussiumaarpugut, oqarpoq.
Ilisimasaqarnerulernissaq anguniarlugu nunanit allaniit tikittoqarnissaa sulissutigineqarpoq. Danmarkimik isumaqatigiissummi eqqaaneqartut kisimik isumagineqassanngitsut isumaqatigiissutigineqarnikuuvoq.
- Danmarkimi upalungaarsimasunut ikiortissarsiornissamut pisinnaatitaavugut, Peter Borg oqarpoq.
Sakkutuulersorneq
USA-p sakkutuulersornikkut nunamik tiguaaniarluni oqariartuutaa Naalakkersuisunut ilaasortat qanoq isumaqarfigineraat aperineqarpoq.
TUSAANNGA
Amerikamiut Kalaallit Nunaannut tatisinerat innuttaasorpassuarnit sunniuteqartoq Sermitsiamit ilisimavarput, taamaattumik oqarasuaatikkut siunnersuisartunut attavissat ataani saqqummiuppavu:
Tusaannga - oqa. 801180
SMS - 1899
- Soorunami nunami maani sakkutuulersuisoqannginnissaa sulissutigissavarput, Aqqaluaq B. Egede oqarpoq.
- Kalaaliussutsitta nunanit allanit ataqqineqarnissaa pingaaruteqarpoq, taamaattumik kinaassutsitta allanngortinniarneqarnera akuerineqarsinnaanngilaq.
Kialuunniit, ingammik iligisap, Kalaallit Nunaat tiguassanngikkaa oqarpoq.
- Akissallit ajunaarnersuaqarnissaanut piareersimanissamut tamarmik piareersarnissaasa pingaaruteqarnera naqissusissallugu uagutsinnut pingaaruteqarpoq, Peter Borg oqarpoq.
- Illersornissaq pisullu maanna oqaaseqarfigisinnaanngilakka, Peter Borg oqarpoq.
Naalakkersuisoqatigiit illersornissaq pillugu saqqummiiumaarput, oqarpoq.
USA-p præsidentiata Donald Trumpip Kalaallit Nunaat aqukkusullugu, aamma sakkutuulersornissaq tunuarsimaarfiginagu, arlaleriarluni oqaatigisareerpaa.
Issittumili Sakkutooqarfimmi generalmajor Søren Andersen Kalaallit Nunaat maannakkut sakkutooqarnikkut ulorianartorsiortinneqanngitsoq oqarpoq, aamma Nato-mi nunat ilaasortat Nato-mi nunamut allamut sakkutuulersornaanera takorloorsinnaannginnerarlugu.
Isorliunerusut
Nunami sumiiffiit pisariaqartitaallu assigiinngitsuusut, taamaattumillu upalungaarsimanermi aarlerinarnerpaat salliutinneqassasut oqarpoq.
Isorliunerusut pillugit paasissutissat amerlanerusut kingusinnerusukkut saqqummiunneqassapput.
- Naalakkersuisut sanngiinnerpaat eqqaamanissaat pingaartippaat, Aqqaluaq B. Egede oqarpoq.
Naalakkersuisut toqqissisimatitsiniarlutik paasissutissanik aalajangersimasunik isertuussisut oqarpoq.
- Oqartussaasut utaqqiinnarnagit ataatsimoornissarput pingaaruteqarpoq, Aqqaluaq B. Egede oqarpoq.
Illoqatigiit tamarmik ajunaarnersuaqarnissaanut piareersimasariaqarput, Peter Borg oqarpoq.
Piareersimalluarnerugaannimi, pisariaqartitsiffiunerusunut ikiorneqarsinnaanerussapput. Pisariaqartitsinerpaallut oqartussanit ikiorneqarluarsinnaanerussallutik.
- Kikkut ikiorneqarnissaminnik pisariaqartitsinerunersut oqaatigiuminaappoq, kommunilli suleqatigilluarpavut, Aqqaluaq B. Egede oqarpoq.
Suliassaqarfiit assigiinngitsut allat pillugit piffissami aggersumi tusagassiortunik katersortitsisoqartuarnissaa naatsorsuutigineqarsinnaasoq naggasiutigalugu oqaatigaat. Inuiaqatigiinni toqqissisimanissaq piareersarnissarlu siunertaralugu taamaaliortoqarpoq.
Tusagassiortunik katersortitsinerni ussersorluni nutserisumik pissarsinissaq sulissutigineqarpoq.
