USA-mi senatorit Kalaallit Nunaat pillugu ajornartorsiuteqaleruttornerani Danmarkilialerput

USA-mi senatorit arlallit sapaatip akunnerata tulliani Danmarkiliassapput nunanut allanut tunngasutunut ataatsimiititaliami ilaasortat ataatsimeeqatiginiarlugit.

Ataatsimiititaliami siulittaasoq Christian Friis Bach (V) senatorinit attaveqarfigineqareerpoq, taassumalu tamanna TV 2-mut uppernarsarpaa.

Sapaatip-akunnerani qaqugukkut tikeraartoqassanersoq oqaatigineqanngilaq, TV 2-li naapertorlugu tallimanngornermi tikeraartoqassaaq.

USA-p præsidentiata Donald Trumpip Kalaallit Nunaata, Danmarki Savalimmiullu peqatigalugit naalagaaffeqatigiinnermut ilaasup, Amerikamiut pigilernissaanik kissaateqarnini uteqattaareermagu tikeraartoqalerpoq.

Trump qanittukkut oqarpoq USA-p “Nunatta isumannaatsuunissaa eqqarsaatigalugu Kalaallit Nunaat pisariaqartikkaa”.

TV 2 allappoq ataatsimiinnermi suut oqaluuserineqassarnersut suli ilisimatitsissutigineqanngitsoq.

Kalaallit politikerit Aki-Matilda Høegh-Dam, Naleraq, aamma Aaja Chemnitz, Inuit Ataqatigiit ataatsimiinnermi peqataanissartik pilersaarutigaat. TV 2-mut taama ilisimatitsipput. Marluullutik Nunanut allanut tunngasunut ataatsimiititaliami ilaasortaapput.

Chemnitz Facebookimi sapaammi unnukkut allappoq senatorit ataatsimiititaliaq Kalaallit Nunaat pillugu ataatsimeeqatigissagaat.

Ilanngullugu allappoq sapaatip-akunnerata aallartinnerani Republikanerit sinnerlugit senatori Lisa Murkowski tikeraarnissaq pillugu ataatsimeeqatigisimallugu.

Danmarkip Kalaallit Nunaatalu ulluni tulliuttuni USA-mik ataatsimeeqateqarnissaat ataasiinnaanngilaq.

USA-p nunanut allanut ministeria Marco Rubio nalunaarpoq sapaatip akunnerani tullermi Danmarki Kalaallit Nunaallu ataatsimeeqatigiumaarlugit.

Ministeriunerup Mette Frederiksenip (S) partiit siuttui sapaammi oqallinnerini uppernarsarpaa sapaatip-akunnerata tulliani nunanut allanut tunngasunut ministerit Lars Løkke Rasmussen (M) aamma Marco Rubio ataatsimeeqatigiissasut.

Sapaammi unnukkut sumi, qaqugu qanorlu ataatsimiittoqassanersoq suli ilisimaneqanngilaq.

Kalaallit Nunaannit qallunaanillu Trumpip kissaataa arlaleriarluni sakkortuumik isornartorsiorneqartarsimavoq.

Inatsisartuni partiit tallimat tamarmik tallimanngornermi ataatsimut nalunaaruteqarput, tassanilu erseqqissaqqinneqarpoq USA-mut ilanngunnissaq piumaneqanngitsoq.

Danskit partiivisa siuttuisa oqallinneranni ministeriuneq oqarpoq ’piffissat allanngoriartornerisa nalaanniittugut, piffissarlu manna aalajangiisuussasoq’.

- Nato-mi suleqatigiinneq tunulliullugu iligisatsinnit siorasaarneqarutta - siornatigut misiginikuunngisaannagatsinnik - suna tamarmi atorunnaartariaqarpoq. Tamannalu ilumooruppara, Mette Frederiksen oqarpoq.

/ritzau/