USA-p aallartitaata nutaap Danmarkimi ministerit ataatsimeeqatigereerai – oqaloqatigiinnissaq siulleq Naalakkersuisumit suli utaqqineqarpoq

Ministeriunerup Mette Frederiksenip (S) Ken Howery sapaatip akunnerani kingullermi ataatsimeeqatigaa, tassanilu Amerikamiut aallartitaata nutaap oqaatigaa, ministeriunerup suleqatiginissaa qilanaarinerarlugu – Europami Issittumilu isumannaallisaanermi illersornissamilu ilisimatusarnermik, niuernermik aningaasaliinernillu nukittorsaaneq ilanngullugit.

Howeryp aamma nunanut allanut ministeri Lars Løkke Rasmussen (M) illersornissamullu ministeri Troels Lund Poulsen (V) ataatsimeeqatigai, taakkualu tamarmik erseqqissarpaat USA-p Danmarkillu siunissami suleqatigiinnerannut tunngatillugu erseqqissumik iliuuseqartoqartariaqartoq. Taamaalilluni USA-p Kunngeqarfiullu Danmarkip siunissami suleqatigiinnissaat sammivilerneqarpoq.

Naalakkersuisoq angalassasoq

Nunanut allanut naalakkersuisup Vivian Motzfeldtip (S) Sermitsiap apeqqutigisaa, tassa Nunatta, USA-p Danmarkillu akornanni pissutsinut tunngasoq imaluunniit Howeryp Danmarkimi naalakkersuisunik ataatsimeeqateqareernerata kingorna pisussat piffissami matumani oqaaseqarfigerusunngilai.

Taassuma Naalakkersuisoqarfianit oqaatigineqarpoq, Amerikamiut aallartitaat nutaaq Københavnimi ataatsimeeqatigereeruniuk aatsaat oqaaseqarsinnaassasoq – ataatsimeeqatigiinnissarlu tamanna siunissami qaninnerpaami pisussatut naatsorsuutigineqartoq.

Naligiissumik oqaloqatigiinnissaq Nunatsinnit ujartorneqartoq

Naligiittut toqqaannartumillu USA-mik oqaloqateqarusullutik Naalakkersuisut arlaleriarlutik erseqqissartarpaat – nunat tamalaat akornanni inatsisit aamma Nunatta nammineerluni aalajangiisinnaatitaanera ataqqillugit. Vivian Motzfeldtip qanittukkut oqaaseqartarnermini erseqqissartarpaa, Nunatsinnit kissaatigineqartoq, USA-p Issittumi qanoq iliorniarnera pillugu erseqqissumik paasitinneqarnissartik aamma suleqatigiinneq kalaallit piumasaat tunngavigalugit ingerlanneqartariaqartoq.

Sermitsiami ukioq manna apersorneqartilluni ima oqarpoq:

– Isumannaallisaaneq illersornissamullu tunngasut pillugit USA-mik oqaloqateqarnissamut piareersimavugut, kisianni Amerikamiut Nunatsinnik piginnittuunissaminnik aqutsilernissaminnillu oqalunnerminnik unitsitsisariaqarput, Vivian Motzfeldt (S) Sermitsiamut juunimi taama oqarpoq.

Nunatta USA-llu suleqatigiinneranni oqaluuserisassaq isertugaq

Naalakkersuisut novemberip sisamaanni 2025-imi ataatsimiinnerannit imaqarniliami (Ataatsimiinnermi nr.53-imi) atuarneqarsinnaavoq, oqaluuserisassani "Isertuussassat"-ni nunanut allanut ilisimatusarnermullu naalakkersuisup isertortumik oqaluuserisassaq saqqummiukkaa. Oqaluuserisassami USA-mik Joint Committee-mi aamma Permanent Committee-mi suleqateqarneq pineqarpoq. Oqaluuserineqartup imaa isertuussaagaluartoq, imaqarniliami takuneqarsinnaasutut qaffasissumik inissisimasut akornanni Nunatta aamma USA-p akornanni suleqatigiiffiusuni pioreersuni oqaloqatigiinnerit isertuussat ingerlanneqarput.

Illersornissaq isumannaallisaanerlu pillugit suleqatigiinnerup nukittorsarneqarnissaa

Ken Howery novembarip aallartinnerani Københavnimut tikikkami, atorfittaaminiilernerminut atatillugu oqaatigaa, USA-p Danmarkillu attaveqaqatigiinnerisa nukittorsarnissaat aamma Danmarkimi naalakkersuisut, inuussutissarsiortut ilinniartitaanerullu kulturillu tungaatigut ilisimasaqarnerulernissaq qilanaaralugit.

- Pingaarnersiuinitsinnut ilaapput illersornissamut isumannaallisaanermullu suleqatigiinnerup nukittorsarneqarnissaa, niuernerup aningaasaliinerillu annertusarnissaat kiisalu Issittumi – pingaartumik Kalaallit Nunaanni – isumannaallisaanermut ataatsimut isumakuluutivut pillugit Kunngeqarfimmik suleqateqarnerput pingaarnerpaatippavut, Howery Christiansborgimi kunngimik oqaloqateqareerluni Ritzauimut taama oqarpoq.