VISO-miit naliliineq piareertoq: Keira Alexandra Kronvoldip panini tigoqqittariaqanngilaa

Keira Alexandra Kronvold panimminik Zammimik novembarimi 2024-mi erneqqammerluni arsaagaavoq.

Paninilu tigoqqinniarlugu taamanili sukataarutigaa. Taanna pillugu suliaq isumaginninnermut ineqarnermullu ministerip ilaqutariinnik kalaallinit kingoqqisunik suliaqarnermi unammilligassaqartoqarneranik nassuerutiginninneranik kinguneqarpoq.

Inatsit nutaaq 2025-mi maajimi atuutilersinneqarpoq, tassa danskit kommunii ilaqutariinnut kalaallinut arsaarinninniarnermi suliani VISO-p ataani immikkoortortaqarfik kalaallit oqaasiinik kulturiannillu immikkut ilisimasaqarfiusoq ilanngunneqartalissasoq piumasaqaatinngortinneqarluni.

Aammattaaq suliat, tarnip pissusiinik misissuutit aalajangiisuullutik aalajangiiffigineqareernikut, immikkoortortaqarfimmit nutaamit Danmarkimi Isumaginninnermut Ineqarnermullu Aqutsisoqarfimmit aqunneqartumit suliareqqitassanngortinneqarput.

Immikkoortortaqarfiup taassuma Keira Alexandra Kronvold pillugu suliaq misissuiffigineqaranit nalunaarusiani Thistedimut kommunemut pingasunngormat tunniuppaa.

Anaanaasup paniatalu ajunngitsumik attaveqatigiinnerat

Nalunaarusiami Sermitsiap takusaani Keira paninilu sapaatip-akunneri tamaasa peqatigiinnerminni "qanilaartumik imminnullu eqqumaffigalutik" attaveqatigiittarnerat immikkoortortaqarfimmit allaaserineqarpoq.

Aamma Keira allanngujaalluni panini najorlugulu aalajangersimasumik suliffeqartoq erseqqissarneqarpoq. Immikkoortortalli inerniliinerat naapertorlugu "Keira angajoqqaatut akisussaaffeqarnissamut maannakkut pisariaqartinneqartunik piukkunnaateqanngilaq“.

Imminut nalilersorsinnaanera amigaataasoq

Keirap "misigissutsimi aqussinnaaneri ajornakusoortillugillu piffissap ingerlanerani angajoqqaatut piginnaasai killeqartut" immikkoortortaqarfik allappoq. Aamma "angajoqqaatut imminut nalilersorsinnaanera, aamma siusinnerusukkullu angajoqqaajunini pillugu, amigarpoq", aamma "qitornaminik arsaagaanini pillugu akisussaaffimmik tigusiumanngittarnera takussaavoq, ajornartorsiullu avataaneersunit, soorlu kommunimiit angajoqqaarsianilluunniit, peqquteqartutut isigalugu.“

AAMMA ATUARUK

Keira pillugu suliaq immikkut suliaqartitanit suliarineqaqqissaaq

Avatangiisiminik tatiginninnginneq

Keirap “angajoqqaatut misigissutsini nanertuutaasut sanngiilliornerillu aamma oqaasinngoruminaatsittarpai, aamma aqqusaarsimasani nuanniitsut pillugit misigissutsimigut avaqqutaarniarpasittarlugit," nalunaarusiami allassimavoq.

Keirap "avatangiisiminik tatiginninnginnera“ panimminut toqqissisimatitsinissaraluanut sunniuteqarsinnaasoq nalunaarusiami aamma eqqaaneqarpoq. "Keirap tatiginninnera Zammimut sunniuteqarluni tatiginninniapiluulerneranik kinguneqarsinnaavoq, taamaalillunilu nunarsuaq toqqissisimananngitsutut pisoqariaannaaffiusutullu isiginnilersinnaalluni — tamannalu toqqissisimasumik attaveqarluartumillu ineriartornissaraluanut kalluaasinnaalluni.“

Panni pillugu akiuutiinnassasoq

Keira Alexandra Kronvoldip taassumalu ikiortaata Laila Berthelsenip nalunaarusiaq sakkortuumik isornartorsiorpaat.

– Nalunaarusiami eqqoriaanerit amerlaqaat. Assersuutigalugu kukkussutikka nassuerutigiumanngikkikka, piffissarlu sivisuallaartoq atorlugu Thisted Kommune angajoqqaarsiallu isornartorsiortarikka. Thisted Kommuniliuna angajoqqaarsiaasullu paniga eqqunngitsumik pigaat paasigakku akuersaaginnarsinnaannginnakku isornartorsiuisunga. Paniga pillugu killiliiuassaanga, unalu akiuunneq ingerlatiinnassallugu. Meqqakka inersimasunngorlunik taamatut sorsuuteqannginniassammata taamaaliorpunga, Keira Alexandra Kronvold oqarpoq, taassumalu paniminut attaveqarluarnini immikkoortortaqarfiup takusinnaannginnera aliasuutigaa.

Tarnip pissusaanik ilisimasanik qallunaatut oqaasilik

Laila Berthelsenip suliap ingerlanerani Keiramut tapersersortaavoq. Taassuma VISO-p immikkoortortaqarfiata sulinera nalunaarusiaalu pakatsissutigaa. Angajoqqaatut piginnaasanik nalilersuinermi najoqqutassianut naammassinninngitsumik sulisoqartoq taanna isumaqarpoq.

– Inerniliineq nalorninartunik ilaatigullu uppernarsaatissaqanngitsunik tunngaveqarpoq. VISO-p suliaani ajornartorsiutaasoq pingaarutilik tassaavoq tarnip pissusaanik ilisimasalik qallunaatut oqaaseqartuunera, sulineratalu annersaani oqalutseqarani. Keira kalaallisut oqaaseqartuuvoq, misissuinermilu eqqarsartaasianik, imminut qiviarluni nalilersorsinnaaneranik paasinnittaasaanillu nalilersorneqarnera pineqarpoq. Oqaatsit eqqarsartaatsimut ilaapput, VISO-llu nalilersuinermi oqaatsit akornutaannginnissaat qulakkiissallugu akisussaaffigaa. Keira oqalutseqarusunngikkaluarpalluunniit suut tamarmik paasineqarnersut VISO-mit nalilersorneqassaaq, aamma oqaasii eqqortumik paasineqarnersut. Pingaarnertut oqaatsini atornagit oqaaseqarseqarsimanera imminullu qiviarsinnaanera pillugu nalilerneqarsimanera nalunaarusiami ersarilluinnartumik takutinneqarpoq, tassa; qallunaatut. Tamatuma inerniliinerit nalorninartunngortippai, Laila Bertelsen oqarpoq, taassumalu aamma Keirap eqqarsartaasaa pillugu naliliineq isornartorsiorpaa.

– Eqqarsartaatsimik naliliineq periaasiusumik tunngaveqanngilaq, eqqarsartaaseq pillugu aaqqiissuusaassumik oqaloqateqarnissamik soqanngilaq. Keira qanoq oqarsimanera eqqarsartaatsikkut piginnaanngissusermik nalilerneqarneranik kinguneqartumik allassimasoqanngilaq. Allassimasut oqalutsit nutserineqannit tunngaveqarput, soorlu "Keira imminut illersorpoq" imaluunniit "ungasittut ippoq".

Kalaallit misigissutsiminnik takutitseriaasiat

Kalaallit misigissutsiminnik takutitsisarnerat qallunaaniit allaanerulluinnarnerat VISO-p nassuiaammini allassimagaluartoq VISO-minngaanniit danskit najoqqutassiaat tunngavigineqartut, Laila Berthelsen oqarpoq.

– Kulturi aqqusaakkallu kingunerluutillit pillugit immikkoortumi kalaallit misigissutsinik oqaasinnguigaangamik oqaatsit amerlanngitsut atorlugit imaluunniit oqaatsit atornagit takutitsisarnerat allassimavoq. Taamaakkaluartoq Keira tamanna pillugu isornartorsiorneqarpoq. Assersuutigalugu ”misigissutsini oqaasinngoruminaatsittarai” aamma ”imminut qiviarsinnaanera” naammanngilaq aamma ”oqaasinnguinera annikillunilu eqqarsaqqaani oqariataartarpoq” nalunaarusiami allassimapput. Naliliineq qallunaat "angajoqqaajulluartup" oqaluttariaasaanik, eqqarsartarneranik misigissutsinillu takutitsisinnaaneranik ilimagisaannit sunnerneqarsimavoq, Laila Bertelsen oqarpoq, taassumalu aamma anaanaasup paniatalu attaveqatigiinnerisa pitsaasuunerat aallaaviginagu qanga pisimasut tunngavigalugit naliliisoqartoq erseqqissarpaa.

Isumaginninnermut ministerimut apeqqutit

Liberal Alliance sinnerlugu Folketingimut ilaasortap Katrine Daugardip VISO-p immikkoortortaqarfittaava nutaaq "naatsorsuutitsinnut naammassinnittoqannginnera" pillugu isumaginninnermut ineqarnermullu ministerimut qanittukkut apeqquteqaateqarpoq.

– Kulturikkut assigiinngissuteqarnerp iliuuseqarfiginiarneqarnera pimoorunnagu immikkut iliuuseqarfiginiarneqarpasittutut isumaqalersitsiniaanertut immikkoortortaqarfik immikkut ilisimasaqarfik isigisaara. Kalaallinik ilinniarsimasunik sulisussanik naammattunik soqannginnera paasisinnaakutsoorpara, taamaakkaluartorli oqalutseqarsinnaaneq minnerpaatut iliuusissaavoq. Kiera pillugu suliami arlalinnik tupigusuuteqarpunga. Ilaatigut inatsisinik unioqqutitsinerit takusinnaavakka. Ilaatigut Kiera ullumikkut nukittuffii piginnaanerilu tamaasa sammineqarpiarsimanatik, Katrine Daugaard oqarpoq.

Keira Alexandra Kronvold pillugu suliaq Thisted Kommunemi meeqqanut inuusuttunullu ataatsimiititaliami februaarimi suliareqqinneqassaaq, nunallu eqqartuussisuuneqarfiani apriilimi suliarineqassalluni.