Vivian Motzfeldtip Kalaallit toqqissisimannginnerat pillugu senatorit oqaluttuuppai
Kalaallit ulluinnarni misigisaat Amerikami politikerinut oqaluttuarinissaat pingaaruteqartoq, Vivian Motzfeldt oqaluttuarpoq.
Foto: Oscar Scott Carl
Nunanut Allanut Tunngasunut Naalakkersuisoq Vivian Motzfeldt (S) suli Washington D.C-miippoq, ullumilu qallunaat nunanut allanut ministeriat Lars Løkke Rasmussen (Moderaterne) peqatigalugu senatorit kongressimilu ilaasortat ataatsimeeqatigivaat.
Tamannalu ingerlalluartoq, Sermitsiamut oqarpoq.
- Senatorit kongresimilu ilaasortarpassuit ataatsimeeqatigaagut, inissisimaffipput nukittorsarniarlutigu — pingaartumik isumaga malillugu — nunatsinni innuttaasut qanoq inissisimanersut erseqqissarumallugu.
- Misigissutsit atukkavut, tatineqarneq ullullu tamaasa ernumassutigisagut, nunat tamalaat akornanni inatsisitigut najoqqutassianut uterusunneq, ulluinnarni inuunerput nalinginnaasumik ingerlateqqikkusullugu sinaakkuttallu toqqissisimanartut uterfigeqqikkusunneri erseqqissarneqarput, Vivian Motzfeldt oqarpoq.
Oqaluttuarpoq ataatsimiinnerni pingaaruteqartoq erseqqissassallugu Kalaallit Nunaanni inoqarnera paasisitsiissutigissallugu, tassa inuit ukiuni tusindilinni nunami najugaqarsimasut, pissutsinilu maanna atuuttuni nunap siunissaanik takorluuiuminaatsitsisinnaasut.
- Isumaqarpunga, ullumikkut ippassarlu unnukkorsioqatigiinnermi naapitavut, asanninnermik paasinninnermillu aammalu tapersersuinissamik kissaateqarnerat ersarilluinnartoq.
Suleqatigiissitap Kalaallit Nunaata tigunissaa oqaluuserissavaa?
USA-mi ataatsimiinnerit ulluni makkunani ulapaarfiupput, taamaattumillu Sermitsiamit Naaalakkersuisoq qanoq misiginersoq aperineqarpoq.
- Ippassaanernit ajunnginneruvunga. Tamanna isumaqanngilaq aaqqiissutissamik nassaarsimasugut, isumaqatigiippugut suleqatigiissitaliortoqassasoq killiliussavut tamaasa ataqqillugit namminerlu aalajangiisinnaatitaaneq, nunallu ataqatigiinneranik ataqqinnittumik, aaqqiissutissamillu tamanit akuerineqarsinnaasumik nassaassaagut, Vivian Motzfeldt oqarpoq.
Suleqatigiisitaliarli taannarpiaq, Det Hvide Husip oqaaseqartartuata Karoline Leavitt-ip unnummut, “Kalaallit Nunaata tiguarneqarnissaa” pillugu oqaluuserisaqartassasut oqaatigaa.
Lars Løkkelli tamanna TV2-mut ilumuunnginnerarpaa, Vivian Motzfeldtillu Sermitsiamut ima oqarpoq:
- Taanna inuk ataatsimiinnermut peqataanngilaq.
- Suli suliassarpassuaqarpoq, pissutsillu suli nalorninarput, nutaamilli attaveqarfigilerpavut, toqqaannartumik oqaloqatigisinnaalerlugit, oqarpoq.
Vivian Motzfeldt unnugu Københavnimut aallassaaq.
