Von der Leyen Mette Frederiksenilu Nunatsinnukalersut

EU-Kommissionip siulittaasua, Ursula von der Leyen, Danmarkimi ministeriuneq Mette Frederiksen peqatigalugu Nunatsinnukalerpoq.

Politikerit nuimasut taakku marluk septembarip arfernanni arfineq-aappaannilu Nunatsinniissapput.

Tusagassiivik Euractiv taama allappoq.

Pilersaarutit naapertorlugit Naalakkersuisut siulittaasuat Jens-Frederik Nielsen ataatsimeeqatigissavaat.

Ataatsimiinnissaq tamanna qangali pilersaarutaagaluarpoq, pissutsilli assigiinngitsut pissutigalugit kinguartinneqartarluni.

Ursula von der Leyen Nunatsinnut marsimi tikeraassasoq aallaqqaammut pilersaarutaagaluarpoq.

Mette Frederiksenili Folketingimut qinersisoqarnissaanik nalunaaruteqarmat, angalanissaat kinguartinneqarpoq.

Qaammatini arlalinni naalakkersuisunngortitsiniarluni isumaqatiginninniarnerit angalanissap utaqqineqarneranut aammattaaq sivitsorsaataasimasut, Euractiv-imit allaaserineqarpoq.

EU-Kommissionip siulittaasua Ursula von der Leyen Nunatsinni illoqarfiit pingaarnersaannut Nuummut tikikkuni, politikikkut siunnersuutinik tigussaasunik saqqummiussissaaq.  

EU-p Nunatsinnut tapiissutigisartagaasa marloriaammit amerlanerulernissaat, Kommissionip siorna siunnersuutigaa, taamaalilluni ukiuni arfineq-marlunni 2028-mit 530 millionit euronut, tassa 4 milliardit koruuningajannut, amerleriartinneqassallutik.

Tamatuma saniatigut Kommissionip aningaasaliissutit 150 millionit eurot sinnerlugit amerlassusillit aammattaaq saqqummiukkai, Euractiv allappoq.

Ursula von der Leyenip EU-p Kalaallit Nunaannut qaninnerulersinnissaa anguniagassatut nalunaarutigereerpaa.

Nuummut 2024-mi tikeraareerpoq, Mette Frederiksen aamma peqatigalugu, Nunatsinni illoqarfiit pingaarnersaanni EU-p allaffissaa ammariartoramiuk.

Tamatumani ingammik Nunatsinni aatsitassalerngusaanneq oqaluuserineqarpoq.

Assersuutigalugu Kinap Nunatsinni saffiugassanik qaqutigoortunik piiaasinnaanera ernummatigineqarpoq. 

Nunanik Nunatsinnik ataqqinnittunik tamanik niuernikkut suleqateqarnissaminut Nunarput ammasoq, Naalakkersuisut taamanikkut siulittaasuata Múte B. Egedep nalunaarutigaa.

Tamatumunnga atatillugu Ursula von der Leyenip EU pitsaanerpaamik suleqatigineqarsinnaasoq erseqqissarpaa.  

RITZAU