KL

DK

PAUL WATSON PILLUGU SULIAQ

Watsonip siunissaa pillugu aalajangiineq kingusinnerpaamik arfininngorpat pissaaq

Arfernik illersuiniaq Paul Watson maanna sapaatit akunneri 20-t sinnerlugit Nuummi pineqaatissinneqarsimasunut inissiisarfimmi parnaarussaaqqavoq. Arfininngorneq 30. november Justitsministereqarfik Watsonip illersuisuinut nalunaarpoq Japanimut tunniunneqassanersoq pillugu aalajangiisoqassasoq ullut 14-it iluanni. Tamanna isumaqarpoq kingusinnerpaamik arfininngorpat aalajangiisoqassasoq.

Paul Watsonip juulip 21-iani 2024-miit Nuup pinerluuteqarsimasunut inissiisarfiani parnaarussaaqqavoq. Kingusinnerpaamik arfininngornermi decembarip 14-iani Justitsministerip aalajangissavaa Watson Japanimut nassiunneqassanersoq imaluunniit iperagaassanersoq.
Jensine Berthelsen
JOURNALISTI
Saqqummersinneqarpoq

Arfininngorninngorpat Paul Watson pineqaatissinneqarsimasunut inissiisarfimmi mattussaaqqanermini ullut 146-it atorsimassavai, tassa sapaatit akunnerini 21-ngajanni, qaammatinngorlugulu qaammatini tallimangajanni paarnaarussaaqqasimassaaq.

Eqqartuussivimmi kingullermik ataatsimiinnermi nalunaarutigineqarpoq Justitsministereqarfiup Watsonip illersuisuinut nalunaarutigisimagaa, novembarip 30-aniit ullut 14-it qaangiutsinnagit aalajangiisoqassasoq, taamaalilluni aalajangiisoqassalluni Watson Japanimut tunniunneqassanersoq imaluunniit inuttut kiffaanngissuseqarluni anissinnaassanersoq.

Arfininngorneq novembarip 30-aniit ullut 14-it qaangiutsinnagit, tassaammat arfininngornermi decembarip 14-ani.

Suliaq Kalaallit Nunaannut attuumassuteqanngitsoq - Kalaallilli Nunaani pisoq

Watson Kalaallit Nunaanni tigusarineqarsimammat juulip 21-ani 2024 nalaatsornerunngilaq. Tamanna paasinarsivoq eqqartuussivimmi suliap ingerlanneqarnerani, tassani siusinnerusukkut ersersinneqarnikuugami Savalimmiuni Politiinit Kalaallit Nunaanni Politiinut nalunaaruteqarsimammat Watson Nuummut juulip 21-ani 2024 tikissasoq.

Watsonimik tigusarinninnerup kinguninngua Naalakkersuisut (Kalaallit Nunaanni naalakkersuisut) piaarnerpaamik erseqqissaapput, suliaq Kalaallit Nunaannut attuumassuteqanngitsoq, taamaattumillu Naalakkersuisut sinaatungaaniit taamaallaat malinnaasinnaasut.

- Suliaq Naalakkersuisut saneraanit malinnaaffigaat, kisianni suliaq pillugu erseqqinnerusumik oqaaseqarsinnaanngilagut. Suliami akuunnginnatta, suliap takussutissartaanik takunnissinnaannginnerput siullertut tassunga pissutaavoq. Eqqartuussiviit sulinerisa politikkikkut sunnerneqarnissaat aappaatut kissaatiginngilarput. Kalaallit Nunaat nunaavoq inatsisitigut illersugaanermik pingaartitsisoq aamma nunap eqqartuussiviinut Naalakkersuisut tunngaviusumik tatiginnipput, nunallu inatsisaasa aalajangigaannik inerniliussiumaartut naatsorsuutigalugu. Kalaallit Nunaata nunat tamat akornanni inatsisit ataqqivai, taamanikkut aggustip aallaqqaataani taamak oqarpoq inatsisit atuutsinneqarnerannut Naalakkersuisoq, Naaja H. Nathanielsen (IA).

Naalagaaffimmi eqqartuussiviit qullersaat Højesteret suli utaqqisitsivoq

Naalakkersuisut sinaatungaaniit malinnaaneraraluartut, aammalu Watsonip nunarsuarmi tamarmi ujagaasutut tigusarineqarnissaanillu peqqussutaasut paasissutissat takunngisaannarlugit, maani Kalaallit Nunaanni Paul Watson parnaarussaaqqavoq.

Paul Watsonip illersuisuni peqatigalugit Naalagaaffimmi eqqartuussiviit qullersaannut Højesteretimut Nunatta Eqqartuussisuuneqarfiata aalajangigai suliamillu ingerlatsinera pillugu suliassanngortitsiumalluni qinnuteqarnikuuvoq, taamaalillunilu aamma oktobarip aappaanni 2024-imi suliassanngortitsinissamut Højesteretimit akuersissuteqartoqarluni amerikamiu-canadamiullu innuttaasumut Kalaallit Nunaata Landsretip aalajangiineranut Højesteretimut suliassanngortitsinissamut.

Suliassap Højesteretimi suliassanngortinneqarnissaa qaqugu pissanersoq suli nalunarpoq. Taamatuttaaq suli nalunarpoq Højesteret qanoq iliorumaarnersoq, piffissap ingerlanerani suliassap suliassanngortinneqarnerini tamani Nunatta Eqqartussisuuneqarfiata Nunatta eqqartuussivia isumaqatigalugu aalajangernera pinerit tamaasa ilalertarmagu, tamannalu tassa isumaqarpoq Watsonip paarnaarussimaneqarnera pinerit tamaasa sivitsorneqartartoq.

Suliap taamak ingerlanneqarsimanera, tassa Kalaallit Nunaanni Eqqartuussiviit Qullersaata aalajangiineri sivitsuinernut tunngasut, Højesteretimit unammillerneqarsinnaapput, suliap Højesteretimi apuunneqarsimalereerpat aalajangiisoqartussanngorpallu.

Maannakkulli tassa utaqqisaasoq tassaavoq danskit inatsisinut atuutsitsinermut ministeriata aalajangiinissaa Paul Watson Japanimut nassiunneqassanersoq imaluunniit aniguisinneqassanersoq, tassaavorlu taanna Justitsminister Peter Hummelgaardip kingusinnerpaamik arfininngorpat aalajangiiffigisassaa.

retten i grønland paul watson naalakkersuisut justitsministeriet justitsminister peter hummelgaard udlevering til japan inuiaqatigiit grønlands landsret samfund

ATORFIIT Se alle jobs

Powered by Labrador CMS