Aalisartut piniartullu ulluinnaat allanngortut: Siku qajannartoq, tunisassiorfeqannginneq inatsillu allannguuteqanngitsoq

Siku ajortillugu suliniarneq unittarpoq.

Tunitsivissaqanngikkaanni aningaasarsiorneq unittarpoq. Malittarisassat allanngortinneqaraangata inuussutissarsiorsinnaaneq ajornarsisarpoq. Aalisartut piniartullu atugaat piviusut taamaapput.

AG-p allaaserisani nangeqattaartuni UUMASUT, IMAQ INUUNERLU ilaatigut siku qajannartoq sammineqarpoq, Qaanaamiu Utuuniaq Simigaq aamma Savissivimmiu Olennguaq Kristensen pillugit allaaserisaqarluni. Aammattaaq Sermiligaami tunisassiorfiup amigaataanera allaaserineqarpoq.

Naalakkersuisunngortunit aalisarnermut inatsisip allanngortinneqarnissaa inuppassuarnit naatsorsuutigineqarpoq. Kingornali ersarissumik nalunaaruteqartoqarpoq: Inatsit allannguuteqassanngilaq. Taamatut aalisarnermut, piniarnermut nunalerinermut imminullu pilersornermut naalakkersuisoq Peter Borg (D) ukioq manna qaammammi siullermi erseqqissaavoq.

- Qinersineq sioqqullugu inatsit ajornartorsiutaaneragarsi maanna akuersaarneqarsinnaasutut inissinnera naalakkersuisutut qanoq nassuiaatissaqartippiuk?

- Politikki naaperiaasarnermik tunngaveqarpoq. Aalisarnermut inatsimmi aalajangersimasunik allannguinissannik kissaatigisaqaraluarpunga. Inatsilli maanna atuutilereerpoq, allannguutissallu annertuut oqallisiginnginneranni aalisartunut inuussutissarsiortunullu qanoq sunniuteqarnersoq takuniarlugu piffissamik atuisariaqarpugut, aalisarnermut, piniarnermut nunalerinermut imminullu pilersornermut naalakkersuisoq Peter Borg (D) AG-mut allakkatigut akissummini allappoq.

Tassa imaappoq, qinersinerup kingorna partiip isummani allanngortippaa. Qinersineq sioqqullugu aalisarnermut inatsisip isornartorsiorneqarnera naalakkersuisooqatigiinnissamik isumaqatiginninniarnernut atatillugu annikillisinneqarpoq.

Naalakkersuisoqatigiinnissamut isumaqatigiissut aallaavigalugu Naalakkersuisunit naatsorsuutigineqarpoq aalisarnermut inatsisip ilassutissaa ukiaanerani ataatsimiinnermi saqqummiunneqassasoq, tassani aalisarnermut siunnersuisooqatigiit arlaannaannulluunniit attuumassuteqanngitsoq pilersinneqarnissaa siunnersuutigineqassaaq, Peter Borg ilisimatitsivoq.

- Nalunaarutilli aamma naleqqussaanissanut periarfissanik pitsaasunik periarfissiipput, tamannalu maanna misissuiffigileruttorpara, oqarpoq.

Assersuutigalugu aalisarnermut naalakkersuisoqarfiup akuersissutit pisassiissutillu pillugit nalunaarutip nalimmassarnera tusarniaassutigileruttorpaa, soqutiginnittut taamaalillutik oqaaseqaateqarsinnaalerlutik. Tamatumalu saniatigut aalisarnermi teknikkikkut malittarisassat nutarterneqarnissaat sulissutigineqarpoq.

- Aammattaaq qaammatini tulliuttuni saniatigooralugu pisat inuussutissarsiutigalugulu aalisarneq pillugit nalunaarutip atuutilernissaa naatsorsuutigaara, Peter Borg oqarpoq.

Pissutsit nalinginnaasut nutaat

Silap pissusiata allanngoriartornerata kingunerisaanik sikup qajannarsigaluttuinnarnera pissutigalugu sikusarnera kingusinnerulerpoq, taamaammallu piniariaatsimut ulorianarnerulersitsilluni. Tamanna Savissivimmi piniartunut unammillernarnerpaat ilaattut oqaatigineqartoq AG-mi allaaserineqarpoq. Aamma Qaanaamiup Utuuniaq Simigap ilaqutariit meerartallit qanoq malugisimaneraat oqaluttuaraa.

- Aalisartut piniartullu pissutsinit allanngortunit illersorniarlugit Naalakkersuisoq qanoq iliuuseqarniarpa?

- Allannguutit tamakku ulluinnarsiutaalernerisa iliuuseqarfiginissaat ajornakusoorluinnarpoq, inuussutissarsiuteqartulli suleqatigiuarpavut malittarisassat, ilaatigut aqutsinissamut pilersaarutit, silap pissusiata allanngoriartorneranut naleqqussarniarlugit, oqarpoq.

- Inuussutissarsiutigalugu piniartut ataasiakkaat silap pissusianut naleqqussartariaqarput – soorluttaaq Naalakkersuisut malittarisassat naleqqussaraat. Piffissani artornartuni sila pissutigalugu isertitaqarunnaartoqartillugu, Inatsisit tunngavigalugit ikiorsiissutinik pisartagaqaqqilernissamut tapiissutinik tapiiffigineqarnissaq periarfissaavoq, naalakkersuisoq Peter Borg ilisimatitsivoq.

Aalisarnermut naalakkersuisup kattuffiit soorlu Aalisarneq pillugu Siunnersuisoqatigiit Piniarnermullu Siunnersuisoqatigiit qanimut silap pissusiata allanngoriartorneranut tunngatillugu oqaloqatigiinnerit ingerlanneqartariaqartut, "nalinginnaasumut nutaamut“ naleqqussarsinnaajumalluni, erseqqissarpaa. Siunissami piujuartitsinissaq qulakkeerniarlugu malittarisassat allanngortinneqarneri kiisalu piniariaatsinik, atortunik piffissanillu aalisarfissanik atoriaannaasunik allannguinerit oqaloqatigiissutigineqassapput.

Aalisarnermi inuussutissarsiortunit

Sinerissami tunisassiorfinnik amigaateqarneq pillugu tunitsiviliortoqarnissaanut tunngatillugu aalisarnermik inuussutissarsiorfiit namminneq aalajangissagaat Peter Borgip oqaatigaa. Aningaasaqarnikkut imminut akilersinnaanissaa, innaallagissamik imermillu pilersorneqarsinnaanissaa, kommunillu nunaminertamik tunniussisinnaanissaa qulakkeerneqassapput.

- Suliffeqarfissuit aalisartullu tunitsiviit sumi pilersinnissaat pitsaanerussanersoq namminneq nalilersinnaavaat. Matumanilu naqissuserusuppara, aalisartut tunitsivinnik kissaateqarunik nammineerlutik pilersitsisinnaammata, Peter Borg oqarpoq.

- Aalisartut sumiiffinnut allanut tunisisariaqalernertik pissutigalugu piffissamik, orsussamik aningaasanillu qanoq annaasaqartigisarnersut naalakkersuisup naatsorsorsimavaa?

- Naalakkersuisut kingunerisinnaasat pillugit naatsorsuusiorsimanngillat, tassami ingerlatsisut namminneq pilersitsineq imminut akilersinnaanersoq nalilersussavaat, Peter Borg akivoq.

Aalisarnermut inatsit nutaaq naapertorlugu tunitsivinnik pilersitsinissamut akuersissuteqarnissamut akisussaaffiup kommuninut tunniunneqarnissaa periarfissaavoq, tunitsiviit ineriartortinnissaat pillugu najukkami inuussutissarsiornikkut aalajangiisoqarsinnaalissasoq, ilisimatitsivoq.

- Angallatit tunitsiviit, umiarsuarnik allanik usilersuineq nunamilu atortorissaarutit pillugit nalunaarummik nutaarluinnarmik qaammatini tulliuttuni tusarniaassutigineqartussamik tunitsivinnillu pilersitsinissamut sinaakkutissaqalersussamik suliaqarpugut, oqarpoq.

Sineriammi aalisartut piniartullu unammilligassat ulluinnarsiutigilerpaat. Siku qajannartoq, tunisassiorfiit amigaataanerat politikkikkullu sinaakkutissat aningaasatigut navianartorsiortitsillutillu nalorninartoqartitsisut. Aalisartut namminneq naleqqussartariaqarnerat, nalunaarutillu inuiaqatigiit kattuffiillu oqaloqatiginerisigut piujuartitsinissaq siunissamilu aningaasarsiornissamut periarfissat qulakkeerneqassasut, aalisarnermut naalakkersuisup Peter Borgip erseqqissarpaa.