Qaanaap imartaani nilleqisumi: Utuuniaq Simikkap aalisartutut piniartutullu inuunera

Umiatsiaaqqat tallimat aaffannut ingerlapput. Utuuniaq Simigaq umiatsiaaqqat ilaanni, imaani navianartorpassuarnit avatangerneqarsimalluni, aquttuuvoq. Taassuma arlallit ataatsikkut nakkutigisariaqarpai: Imaani ikkarleqarpa? Aaffaat qanoq qanitsigitigai? Piniartullu ulluugaluartoq qaammartartutik qaamut atisartakkat kisiisa atorlugit takusaqarsinnaapput.

Anori nillertoq kiinnamigut malugisinnaavaa — meeraanermini ataatani piniartuusimasoq nuannaartoralugu isigisarsimasani eqqaavaa. Ataatani nannunniarluni aallartoq eqqaamasaani siulliit ilagaat.

Kaperlappoq, sunalu tamarmi nipaallunilu angujuminaappoq. Kikkulli tamarmik tupaallaatigisaannik novemberi aallartereeraluartoq imarpik ammallunilu sikusimanngilaq.

- Periarfissaq tamanna asuliinnaasinnaanngilaq, Utuuniaq Simigaq eqqarsarpoq.

Taamaammat angani, ullut tamaasa takusartakkani, pinngortitamilu ilimaginngisamik pisoqaraangat angalaqatigiumasartakkani, ilagaa.

Utuuniaq Simigaq piniartullu allat sapiillutik ingerlaaqatigiinnerminni aaffat 15-it angerlaappaat.

Aaffanniarnerat uani videomi takuneqarsinnaavoq. 

Sikuniartarnera unammillernartoq

Utuuniaq Simigaq 25-nik ukioqarpoq, Qaanaamilu inunngorluni. Aalisartuullunilu2 piniartuuvoq.

- Meeqqat atuarfianni atuareerlunga aalisartunngorlungalu piniartunngorpunga, oqaluttuarpoq nassuiarlugulu siku allanngorartuarmat taamaammallu angalasinnaanerat killeqartorujussuummat illoqarfimmi piniartut aalisartullu maannakkut suliassaqarpianngitsut.

- Maanna ukiut tamaasa taamaappoq. Tamanna uagutsinnut sunniuteqangaartarpoq, aalisarniaraluaraangattami siku qajannaraangat aalisarsinnaaneq ajorpugut, taanna oqarpoq.

 Utuuniaq Simikkap ilaqutariit meerartallit qanoq eqqugaatiginerat malugilluarsimallugu aammattaaq oqaluttuarpoq. Nammineq meeraqanngilaq.

- Piniartut maannakkut isertitaqanngillat, taamaammat nuliaasut kisimik aningaasarsiorput, taanna oqarpoq.

Utuuniaq Simigaq qaammatit pingasut matuma siorna kingullermik akissarsisimalluni oqarpoq.

Unammillernartorujussuuvoq. Assersuutigalugu juullimut aningaasarsiassaqanngillagut. Ilaquttama neriartoqqugaangannga nerisarpunga.

Utuuniaq Simigaq kaperlannerani illuaraliorpoq.

Uannut illuaqqiorpunga. Aalisariaraangama atortassavara. Naammassiqqammerpara, taanna oqaluttuarpoq.

Takorluugaa piviusunngortoq

Utuuniaq Simigaq qanigisaminik maligassiuisoqarpoq. Meeraalluni ataatani anganilu nuannaartorai.

- Assigerusussuaarpakka. Pinerrarissorsuupput. Eqqaamavara angaga qanoq nuannaartoritigalugu. Aalassorippoq qimmiilu kusanartuaannarput, Utuuniaq Simigaq oqarpoq.

Taamaammat meeraallunili piniarnermik inuuniuteqassalluni nalunngilaa.

- Meeraagallarama ataataga umiatsiamik avalaleraangat ilaarusullunga qiasarpunga, qungujulluni oqaluttuarpoq.

Akuerisaasarpoq, arfinilinnillu ukioqartoq puiguikkiussimasaanik silarluppoq. Taamani ilaqutariit Siorapalummi, Qaanaamit 45 kilometerit missaanni avannarpasitsigisumiittumi, najugaqarput.

- Sila allanngoriataarpoq anorersualerlunilu. Immamut saavissimavugut. Sikumiikkatta paasinngilara. Qujanartumik umiatsiaqarpugut, Utuuniaq Simigaq eqqaamasarsorpoq.

Aalisartutut inuuneq

Utuuniaq Simigaq 20-t missaanni ukioqarluni aalisakkanik tunisinerpaasartunut ilaavoq.

- Ukioq naallugu aalisartarpugut – sikuneraniit aannissaata tungaanut imaaniittarpugut, taanna oqarpoq.

Ilaqutariit nerisassanik pilersornissaat pingaartingaarpaa.

- Ukiut tamaasa ilaquttama neqinik nutaanik nerisaqarnissaat qulakkeerniartuaannarpara, taanna oqarpoq.

Utuuniaq Simikkap inughuit pilisarnerat nuannaraa — nammineq oqarnermisut – sinerissami illoqarfinni nunaqarfinnilu allaniit allaanerulluinnarpoq.

- Qilalugaq assersuutigisinnaavarput. Qilalukkat neqaannik nunamut matoorsisarpugut. Illoqarfinni nunaqarfinnilu kujallerni taamaattoqarneq ajorpoq. Uagulli taamaaliortarpugut, nalliuttorsiornernilu soorlu apersortittoqarnissaanut assigisaannullu toqqortarpagut, Utuuniaq Simigaq oqaluttuarpoq.

Aamma aarrit, qilalukkat, puisit appaliarsuillu neqai pissamaatitut nunamut matoorneqartarput.

Uumasuni anginerusuni qilalukkat Utuuniaq Simikkap piniarumanerusarpai.

- Suulluunniit piniassallugit nuannaraara, qilalugarniarnerli immikkut ippoq. Qajartorlunga arferit malerujuussallugit nuannaraara. 20-nik ukioqarlunga qilalugaqqaarpunga, oqaluttuarpoq nangillunilu ataatani ikiortigalugu piniarnermut atortunik soorlu tuukkanik assigisaanillu nammineq sanasarluni.

Qaanaami aalisartut piniartullu tunisaqarluarnerpaat allattorneqartarput.

- Qilalukkanik tunisaqarnerpaat tulliunikuullungalu mattannik tunisaqarnerpaat pingajuattut inissisimanikuuvunga, taanna oqarpoq.

Utuuniaq Simigaq kaperlaap nalaani taama inuuvoq. Piniarneq qaammatini makkunani killeqarpoq, taassumali sulinini ingerlatiinnarpaa. Naak ulluinnarni taarmiugaluarluni isertitaqanngiffimmi inuuneq oqinnerutinniarlugu aningaasanik ikiuisoqarnissaanik neriuuteqartuarpoq.