Avataani aalisagartassaateqalersut: Kilisaatitaarlutalu Narsami tunisassiorfeqalissaagut

- Soorunami nuannaaqaagut uagut toqqarneqarsimagatta. Tamanna tulluusimaarutigivarput. 

AAMMA ATUARUK:

Bent Salling: Aasianni aalisakkerivik ukioq kaajallallugu maanna ammasinnaanngorpoq

- Kisianni aamma nalunngilarput tamanna akisussaaffimik annertuumik tunisisoq. Kujataata aalisarnikkut ineriartorteqqinnissaannut pisussaaffilerneqarpugut, Pavia Egede Lund Sermitsiamut oqarpoq.

Taanna ingerlatseqatigiiffimmi SiKu Trawl A/S-imi pisortaavoq. SiKu Trawl A/S kitaata avataani qaleralittassanik 2.468,5 tonsinik, saarullittassanik 1.950 tonsinik aammalu nataarnartassanik 166,6 tonsinik namminneq pigisassaminnik, Naalakkersuisunit sapaatit akunnerisa siulianni tunineqarput.

Taakkuali maannakkumut suli aalisarsinnaanngikkallarput. Ingerlatseqatigiiffimmi kilisaammik, aalisagaqatigiinnut pingasunut, avataani aalisarluni atorneqarsinnaasumik, suli pissarsinngilaq.

- Kilisaammik attartornissamut isumaqatigiissusioqqaartariaqarpugut. Tamanna maannakkut inissinniarsaraarput. Aalisakkat taakkua ukioq manna aalisarneqartariaqaramik. Tamanna inissitassatta siullersaraat, pisortaq oqarpoq.

Kilisaammik qanoq ittumik attartulersaarnerlutik oqaatigisinnaanagu oqarpoq. Kilisaataatilinnilli oqaloqateqarnerit aallartinneqareersut ilisimatitsissutigaa. 

- Neriuppugut sukkanerpaamik aalisalersinnaassalluta, pisortaq oqarpoq.

Kilisaammik attartugassarsereerunik pisortaq namminneq pigisassaminnik kilisaataateqalernissamik suliaqassaaq.

- SiKu Trawlip nammineq kilisaataatitaarnissaa tullinnguutissooq. Taanna sulissutigissavarput.

Narsaq siuarsarusukkaa

Ingerlatseqatigiiffiup Narsami tunisassiorfiliornissani pilersaarutigaa. Taanna aalisartunut kujataaniittunut aamma tunitsiviusinnaassasoq, pisortaq oqarpoq. 

- Tunitsivissap sumiikkumaarnera qanorlu isikkoqarumaarnera suli inissinngilaq. Illorsuarmik nutaamik sanassanersugut pioreersumilluunniit inerisaassanersugut suli nalunarpoq. Periarfissat tamaasa misissussavagut ammaffigalugillu, Pavia Egede Lund oqarpoq.

Taassuma Kalaallit Nunaata kujataani aalisarneq ineriartorfiulluarsinnaasutut nalilerpaa. Tamannalu Narsami tunisassiorfeqalernissamut aamma tunngavioqataavoq. 

- Narsami peroriartornikuuvunga. Nammineq takusinnaavara Narsaq qanoq inukilliartortiginikuunersoq. Tamakkua allanngortinniarsarinissaat uanga soqutigiuaannarpara. Killormut saateqqinnissaa. Ineriartorteqqilernissaa. 

Qaleralittassiissutaasut 25 procentii nunami tunisassiorfimmut tulaassorneqarnissaat Naalakkersuisut neqeroortitsinerminni naatsorsuutigaat. Aalisakkeriviit sumiinnissaat neqeroornermi ajugaasut namminneq aalajangigassaraat. SiKu Trawl A/S-ip Narsaq toqqarpaa. Inuilli qassit kilisaammi tunisassiorfimmilu sulisorisarumaarnerlugit pisortap maanna oqaatigisinnaanngilaa.

Atorluaarusuttoq

Pavia Egede Lundip aalisakkat pisatik atorluartarnissaat kissaatigaa. Tunisassiornermi aalisakkap tamakkiisumik tunisassiarineqartarnissaa pillugu nunanut allanut, soorlu Islandimut, Norgemut Savalimmiunulluunniit paasisassarsiorluni angalanissaminik naatsorsuuteqarpoq. 

- Aalisakkap tamakkiisumik atornissaa soqutigisaraarput, pisortaq oqarpoq.

Suliffeqarfiit qitiusumik allattorsimaffianni ersittumik allaqqasut naapertorlugit SiKu Trawl A/S-imi piginnittut tassaapput: 
Finn Meinel, Ernst Mikael Lund, Jeppe Jensen, Pavia Kunuk Egede Lund aamma Tsatso Bent Johannes Martin Efraimsen. Pavia Kunuk Egede Lund pisortaavoq.

Taakkua piginnittut saniatigut aamma pigittut allat inuit 25-it allattorsimaffiat, pisortap Sermitsiamut siusinnerusukkut ilisimatitsissutigaa.