Bent Salling: Aasianni aalisakkerivik ukioq kaajallallugu maanna ammasinnaanngorpoq

Naalakkersuisut aalisagartassat oqallisaaqisut, kikkunnit aalisarneqarlutillu pigineqalissanersut maanna aalajangersimalerpaat. Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiorfinnut taama nalunaarpoq.

Avataani pisassat neqeroorutigineqartut SiKu Trawl A/S-imut Qeqertalik Seafood A/S-imullu tunniunneqassasut Naalakkersuisut aggustip 18-ianni aalajangerput.

- Naalakkersuisunut aalisarnikkut pisuussutivut ataatsimoorussavut sapinngisamik amerlanerpaanut iluaqutaanissaasa qulakkeernissaat pingaaruteqarpoq. Tunniussinerit marluk aqqutigalugit avataasiorluni aalisarnermi ingerlatseqatigiiffinnik najukkaneersunik nutaanik ilanngussivugut, Aasiannilu suliffissat tunisassiornerlu qulakkeerlugit.

- Taanna aalisarnermit pissarsiat siammasinnerusumik agguaanneqarnissaannut aammalu Kalaallit Nunaata tamakkerlugu inuussutissarsiornermik ineriartortitsinermik nukittorsaanissamut sulinerput pillugu pingaaruteqartuuvoq, Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg (D), tusagassiorfinnut nalunaarummi oqarpoq.

Salling: Qilanaarpunga

Qeqertalik Seafood A/S kitaani qaleralittassanik 2.468,5 tonsinik aammalu Tunumi saarullittassanik 5.000 tonsinik tunineqarput. Tamanna Aasianni aalisakkeriviup oqallisaaqisup, ukioq kaajallallugu ammaannarnissaanik qulakkeerinninnerusoq, ingerlatseqatigiiffiup pisortaata aappaa, Bent Salling, Sermitsiamut oqarpoq.

- Aasianni aalisakkeriviup ammaannarnissaa qulakkeerneqarpoq. Aalisakkeriviup ukioq kaajallallugu imminut akilersinnaasumik ingerlasinnaanera suliffissaqartitsisinnaaneralu qulakkeerneqarpoq, Bent Salling oqarpoq.

Aalisagartassanut taakkununnga Namminersorlutik Oqartussat ingerlatseqatigiiffiutaat, Royal Greenland, aamma neqerooraluarpoq. Qeqertalik Seafood A/S-illi pilersaarutaa, ukiuni qulini tullerni, ukioq kaajallallugu 54-59-illu akornanni sulisoqarnissamik qulakkeerinnittussaammat tamanna toqqarneqarnerannut peqqutaasoq, Naalakkersuisut allapput.

Qalerallit ukiumut pisassiissutaasut minnerpaamik 25 procentii Aasiannut ukiuni qulini tullerni tulaanneqartassapput. Ingerlatseqatigiiffiup pisortaata Aasianni ingerlaannartussanngornertik eqqissiallaatigaa.

- Maannakkut misigivugut aalisakkeriviup siunissaa qaamasoq isigisinnaallugu. Qilanaarpunga Aasiammiut Kommune Qeqertalimmiullu suleqatigeqqinnissaannut, Bent Salling oqarpoq.

Qeqertalik Seafood A/S-imi piginnittut inuit 18-it saniatigut ingerlatseqatigiit soraarnerussutisiaqarfiillu piginneqataapput. Taakkua tassaapput: Sisa Pension, Nukki Trawl A/S, Sigguk A/S aamma Imartuneq Trawl A/S.

Ingerlatsisut nutaat pisassinneqartut

Neqeroornerup aappaani SiKu Trawl A/S kitaani qaleralittassanik 2.468,5 tonsinik, saarullittassanik 1.950 tonsinik kiisalu nataarnartassanik 166,6 tonsinik namminneq pigisassaminnik tunineqarput.

- Tunniussinerup siunertaraa aalisarnermi avataasiortumi piginnittuunerup ingerlatseqatigiiffinnut najukkaneersunut amerlanernut siammarnissaa. SiKu Trawl A/S ingerlatseqatigiiffik nutaajuvoq, piginnittunik nutaanik peqarluni pilersinneqartoq, ingerlatseqatigiiffiullu ineriartortitsinissamut pilersaarutaani aamma Kalaallit Nunaata Kujataani Narsamullu aalisarnerup inuussutissarsiornermillu ineriartortitsinermik nukittorsaanissaq immikkut ukkatarineqarpoq, Naalakkersuisut allapput.

Pisassanut taakkununnga neqeroortut arfineq-pingasut tiguneqartut, Naalakkersuisut allapput. Taakkunannga arfinillit piumasaqaatinik naammassinnittutut nalilerneqarput.

- Naalakkersuisut naliliinerminni SiKu Trawl A/S-ip piginnittunik nutaanik avataasiorluni aalisarnermut ilanngunnera pingaartumik isiginiarpaat, taamaalillunilu Kalaallit Nunaata ataatsimoorussamik aalisarnikkut pisuussutaasa piginnittuunerisa siammasinnerusumik agguarneqarnissaannut tapertaalluni, Naalakkersuisut allapput.

Suliffeqarfiit qitiusumik allattorsimaffianni ersittumik allaqqasut naapertorlugit SiKu Trawl A/S-imi piginnittut tassaapput: 
Finn Meinel, Ernst Mikael Lund, Jeppe Jensen, Pavia Kunuk Egede Lund aamma Tsatso Bent Johannes Martin Efraimsen. Pavia Kunuk Egede Lund pisortaavoq.

Naalakkersuisoqarfiup ingerlatseqatigiiffiit pisassinneqartut marluullutik neqeroorutinut piumasaqaatinik atugassarititaasunillu naammassinnittuarnissaat ingerlaavartumik malittarissagaat, nalunaarummi allassimasoqarpoq.