Danskit ministerii nutaat – immaqalu aamma Kalaallit Naalakkersuisunut ilaasortat ilaat – siunissami nunanut allanut pingaarutilinnik isumaqatiginninniarlutik angalallutik ataatsimiigiassagaangamik timmisartumik angallanneqartalernissartik qilanaarisinnaavaat.
Illersornissaqarfiup timmisartortitseqatigiiffik Billundimeersoq Blackbird Air angallassinermut isumaqatigiissusiorfigeqqammerpaa.
Danskit ministerii nutaat – immaqalu aamma Kalaallit Naalakkersuisunut ilaasortat ilaat – siunissami nunanut allanut pingaarutilinnik isumaqatiginninniarlutik angalallutik ataatsimiigiassagaangamik timmisartumik angallanneqartalernissartik qilanaarisinnaavaat.
Illersornissaqarfiup timmisartortitseqatigiiffik Billundimeersoq Blackbird Air angallassinermut isumaqatigiissusiorfigeqqammerpaa.
Taannalu Kunngikkormiut danskillu naalakkersuisui nunanut allanut ataatsimiigiassagaangata timmisartunik sukkasuulianik pingasunik attartortitsisinnaassaaq. Isumaqatigiissut naalagaaffimmut 122 millionit euronik akeqassaaq, tassa 908 millionit koruunit missaat. Isumaqatigiissut ukiuni marlunni sivitsorneqarsinnaasoq, ukiuni arfineq-pingasuni atuutissaaq, nutaarsiassaqartitsivik BT allappoq.
Illersornissamut ministeeriaqarfiup sakkutuut timmisartui Challengerit sisamat 1997-imeersut oqilisaaffiginiarlugit pilersaarutai, suliffeqarfiup namminersortup naalagaaffiup timmisartuussisarneri isumagisarilissavai, taamaalillutillu Challengerit ilaatigut Kalaallit Nunaanni nakkutilliinermut ataavartumik atorneqarsinnaanerat qulakkeerneqartoq 2024-mi ukiakkut Sermitsiami allaaserineqareerpoq.
Silaannakkut illersornissaqarfiup, Kalaallit Nunaanni ulloq unnuarlu timmisartumik Challenger-imik atuisinnaanissamik anguniagaqarnerminik eqquutsitsisinnaannginnera pillugu sakkortuumik isornartorsiuisoqareersorlu taamatut aalajangertoqarpoq
Neqerooruteqartitsinissaq 2024-mi septembarimi kinguartinneqarpoq, politikerillu siunissami ukiumut nalunaaquttap-akunneri 480-it timisartumik angalasinnaanissaat maanna aalajangerneqarpoq – tassa sapaatip-akunneranut nalunaaquttap-akunneri qulingiluat sinnerlugit – nalunaaquttallu-akunneri 100-t ilassutitut Blackbird Airimut pisiarineqarsinnaalerput.
Nalunaaquttap-akunneri 24-t sioqqullugit nalunaarneq
Naalakkersuisut timmisartut qernertut Blackbird Airimit pigineqartut siornatigut attartortareersimavaat, ilaatigut siorna ministeriuneq Mette Frederiksen Jens-Frederik Nielsen franskillu præsidentiat Macron ataatsimeeqatigiartortillugit Nuummut tikeraarmat attartorneqarput.
Assi: Oscar Scott Carl
Timmisartut pingasut danskit naalakkersuisuinit Blackbird Airimut attartorneqartut ullormik sioqqutsilluni nalunaarnermi timmisartumik angallassinissami atorneqarsinnaapput. Timmisartut danskit nalunaarsorsimaffianni nalunaarsorsimasuunissaat aamma timmisartortartut danskisut innuttaassuseqarnissaat isumaqatigiissummi piumasaqaatigineqarpoq.
Timmisartortitseqatigiiffik taanna danskit milliardæriannit Anders Holch Poulsenimit, Danmarkimi pisuujunerpaat tulliannit, pigineqarpoq.
Atisanik tunisassiornermit, tunisisarnermilu milliardæri aningaasaatilissuanngorsimavoq. Aamma illoqarfimmini Brandemi 320 meterinik portutigisumik illorsualiornissamik pilersaaruteqarnermigut maluginiarneqartarpoq, pilersaarutilli taakku maannamut uninngatinneqarallarput. Holch Poulsen aamma Skotlandimi nunaatilinni annerpaavoq. Ukiut arlallit ingerlaneranni nunaat 900 kvadratkilometerisut annertutigisoq pisiortortarnermigut pigilerpaa, tassa Skotlandip tamarmiusup procentiata ataatsip missaa. Nuna pinngortitamik iluarsaassinermut suliniutinut angisuunut ilaassasoq pilersaarutigaa.
Blackbird Air timmisartunik sukkasuulianik arfineq-marlunnik timmisartuuteqarpoq, marlunnillu qulimiguulinnik aamma pigisaqarluni. Timmisartut tamarmik amermik qalilersukkanik akimasunik issiaveqarput, timmisartullu iluani nerisassanik pitsaalluinnartunik sassaalliutissaqarlunilu wi-fi-qarpoq.
Danskit naalakkersuisuisa timmisartut Blackbird Airimit pigineqartut ilisimalluarpaat. Timmisartortiteqatigiiffiup danskit naalakkersuisui timmisartunik Challengerinik atuisinnaanngikkaangata arlaleriarluni attartortittareerpai. Ilaatigut ministeriuneq Mette Frederiksen timmisartoq Blackbird Air-imeersoq atorlugu siorna aasaq Nuummut tikippoq, tassanilu Jens-Frederik Nielsen peqatigalugu Frankrigip præsidentia Macron ataatsimeeqatigaa.
