Innaallagissiorfiup ikuallannera aalisarnermut unittoortitsivoq – upalungaarsimanermut pilersaarut ujartorneqarpoq

Uummannami aalisarneq pingaarnertut inuussutissarsiutaavoq. Juunip 22-iani Uummannami Nukissiorfiit innaallagissiorfia ikuallammat, aalisarneq illoqarfimmilu aalisakkerivinni pingasuusuni tunisassiorneq tamarmi sapaatip akunnerata missaani unittoorpoq.

Tamanna aalisartunut aalisakkanillu tunisassiortunut aningaasatigut annertuumik annaasaqaataasoq, aalisartut aalisakkeriviillu oqaatigaat.

Siunissami taamatut pisoqaqqinnginnissaa qulakkeerniarlugu periusissiamik pilersitsisoqarnissaa siunertaralugu misissuinerit aallartinneqartariaqartut, Uummannami aalisartut piniartullu peqatigiiffianni siulittaasoq aamma Avannaata Kommuniani Aalisarnermut Piniarnermullu Ataatsimiititaliami siulittaasuusoq, Ole Møller, Naleraq, kiisalu kommunalbestyrelsimi Teknikkimut Ataatsimiititaliami siulittaasoq, Sakio Fleischer, Siumut, isumaqarput.

Tonserpassuit annaaneqartut

Suliffeqarfiit Royal Greenland, Avannaa Seafood ApS aamma Sigguk Uummannaq ApS Uummannami aalisakkeriviuteqarput. Taakku illoqarfimmi aalisarnikkut inuussutissarsiuteqarnerup ataavartumik ingerlaannarnissaanut qulakkeerinnittuupput. Juunilli 22-iani Uummannami Nukissiorfiit innaallagissiorfia ikuallammat, illoqarfimmi aalisarneq tamarmi ingerlaannaq unippoq. Tamanna Sigguk Uummannaq ApS-imut sunniuteqarnerlussimasoq, aalisakkerivimmi allaffimmioq, Jakobine Markussen oqarpoq.

Juunip 22-ianiit juulip aappaata tungaanut Sigguk Uummannaq ApS-imi tunisineq uninngavoq.

AAMMA ATUARUK

Uummannami aalisakkat tonserpaaluit eqqaannarneqartussanngortut

- Ulloq taanna innaallagissiorfik ikuallammat angallatit marluk aalisakkat tunisassaat 15 tonsit tungaanoortut, nunaqarfinni aalisakkerivinnut tulaanneqarniassammata, angallatinut pineqartunut utertittariaqarsimavagut, taanna oqarpoq.

Sila ajunngikkaangat ullormut ilaatigut aalisakkat 20 tonsit tungaanut tulaanneqarsinnaasartut, Sigguk Uummannaq ApS-imiit paasissutissiissutigineqarpoq. 

Annertuumik annaasaqartut

Uummannami aalisakkanik tunisinerup ulluni arlalinni uninngasariaqarsimanera, aalisartut ilaannut aningaasatigut annertuumik annaasaqataasimasoq, Uummannami aalisartut piniartullu peqatigiiffianni siulittaasoq, Ole Møller oqarpoq.

Uummannamiit nunaqarfinnut tunisiartornissaq ungasimmat, sapaatip akunnerata ataatsip missaani aalisarsimanani, taassuma oqaatigaa.

- Naatsorsuinera malillugu ulluni aalisanngiffinni 20.000 koruunit missaat annaavakka. Umiatsiaararsortulli allat uanniik amerlanerusumik pisaqartartut annaasaat annertunerujussuupput, taanna oqarpoq.

Uummannami tunisinerup matugallarneqarnerata kingunerisaanik, angallatit ilai kujasinnerusumut, soorlu Qeqertarsuup Tunuanut, aalisariarsimasut, Ole Møller oqarpoq.

Periusissiaq pisariaqartoq

Juunimi Uummannami innaallagissiorfiup ikuallannerata kingunerisaanik aalisarnerup unittoorneranut assingusumik siunissami pisoqaqqinnginnissaa qulakkeerneqassappat, ajornartoornermi periusissiamik peqarnissaq pisariaqartoq, umiatsiaararsortoq politikerilu isumaqarpoq.

- Aalisarnerup piffissap ilaani matoqqasariaqarnera pissutaalluni kommunimut akileraarutitigut isertitassat annaanneqarput.

- Aalisarnerup uninnganera aalisartunut aalisakkerivinnullu kisimi eqquinngilaq aammali Uummannami inuussutissarsiornermik sulialinnut allanut, soorlu neriniartarfinnut niuertarfinnullu, annertuumik eqquisimanissaa qularnanngilaq.

- Taamaattumik massakkut pisoq ilinniarfigalugu ajornartoornermi periusissiamik pilersitsinissaq siunertaralugu, susassaqartut tamarmik oqaloqatigiinnissaat pissusissamisuussaaq, Ole Møller oqarpoq.

Piffissami kingullermi pisut nalilersuiffigineqarnissaat pisariaqartoq, periusissamillu pilersitsinissaq siunertaralugu pineqartoq kommunalbestyrelsimut oqaluuserisassanngortinneqartariaqartoq, Ole Møller isumaqarpoq.

Sakio Fleischerip oqarnera naapertorlugu, Avannaata Kommuniani upalungaarsimanermut ataatsimiititaliap pilersinneqarnissaa maannakkut sulissutigineqarpoq. Taannalu naammassippat periusissiamik pilersitsisoqarnissaa avaqqunneqarsinnaanngitsoq, taanna tapersiilluni oqarpoq.

Nunaqarfinnut annerusumik sunniuteqanngitsoq

Royal Greenland Uummannap eqqaani Ikerasammi, Ukkusissani Saattunilu aalisakkeriveqarpoq. Uummannami innaallagissiorfiup ikuallannerata kingunerisaanik illoqarfimmi aalisakkeriviit tunisassiornermik unitsitsisariaqarsimanerat, nunaqarfinni pineqartuni qaleralinnik tunisassiorneq annerusumik artukkerneqarsimanngitsoq, aalisakkerivinniit paasissutissiissutigineqarpoq.  

Uummannami aalisakkanik tunisineq tunisassiornerlu maannakkut naliginnaasumik ingerlavoq.