Uummannami aalisakkat tonserpaaluit eqqaannarneqartussanngortut

Uummannami innaallagissiorfik ataasinngornermi ikuallappoq. Illoqarfimmi aalisakkeriviit, qaleralinnik tigooraasut pingasuupput. Taakkua tamarmik pingasunngornermi ullo-qeqqata missaani, tassa innaallagissiorfiup ikuallanneranit akunnerit 48-it qaangiuttut, suli sarfamik pilersorneqalinngitsut Sermitsiap oqaloqatigai.

Sigguk ApS-ip aalisakkeriviani aqutsisup sarfaarunneq ima oqaasertalerpaa:

- Massakkorpiaq kallerup inneranik suli ikinngilagut. Ajunaarnersuaqarfiuvugut. Uummannap uummataa unippoq.

- Tupannarpoq taamannak pisoqarnera. Assorujuk pakasartippugut. Sulisorpassuagut eqqugaapput, Ole Andersen Sermitsiamut oqarpoq.

Taassuma oqarnera naapertorlugu sulisut 20-it missaannik amerlatigisut ataasinngornermit angerlarsimatiinnarneqarput.

Nukissiorfik ataasinngornermi ullo-qeqqalersoq ikuallalerpoq. Tamannalu sioqqullugu ullormi tassani tunisat maannakkut annaanneqarsinnaanatik igiinnarneqartussanngorput.

- Aalisagaatigut ataasinngornermi ullaakkut suliagut naammassineqanngitsut, suli maannakkumut uninngatippagut. Ilaat aattorsuanngorput. 

-Oqaannarsinnaavugut annaavagut. Immaqa 5 tonsit missaanniipput, Ole Andersen oqarpoq.

100 tonsit missaanniittut aakkiartortut

Taakkua saniatigut aalisartut ningittakkaminnut neqitassaat tonserpassuarnik oqimaassusillit aamma aalerinartumiipput.

- Neqitassaatigut 100 tonsit tungaanoortut suli qerititsivimmiipput. Qerititsivissuarput ullaaq suli minus 15-imiippoq. Neriuppugut aappallaannginnerani sarfaqaleqqissalluta, Ole Andersen oqarpoq.

Neqitassatut qerisuutit tassaapput ammassaat eqalukkallu.

Avannaa Seafood ApS : Igitassaqalereerpugut

Uummannami aalisakkeriviit ilaat, Avannaa Seafood ApS, aamma eqqornerlunneqartoq, tunisassiorfimmi aqutsisoq, John Møller oqarpoq. Suliffeqarfik taanna ullaaq manna suli aamma sarfamik pilersorneqalinngilaq. 

- Igitassaqalereerpugut ajoraluartumik. Pitsaassutsimikkut ajorsereersut. Tonsiinnaanngilaq. Tonserpaalunnguupput.

- Kipiluttunarpoq, soorunami aamma suliffeqarfimmut annertuumik naleqarpoq, taanna oqarpoq.

Taassuma qalerallit qanoq oqimaatsigisut kasiiginnarneqassanersut eqqortumik oqaatigisinnaanngilaa. Aarlerinartorsiortulli 10 tonsit missaanniittut oqarpoq.

- Sapaatiummat ualikkumit ataasinngornermi ullaap tungaani ikuallattoqarnissaata  tungaanut tunisat. Immaqa 10 tonsit missaanni oqimaatsigipput. Igiinnarneqarnissaminnut aarlerinartorsiorput, John Møller oqarpoq.

Avannaa Seafood ApS-imi sulisut amerlerpaat aamma angerlarsimatiinnarneqarput.

Qerereersut annaanneqartut

Royal Arctic Linep umiarsuaataa, Maleraq, nukissiorfimmut atortussanik ilaatigut pajulluni Uummannamut ippassaq unnukkut tikippoq. Tunisasiorfiillu taakkua marluk qerisuutaat, tassa tunisassiat piareernikut, annaanneqarput.

- Qerisuutigut Maleqqap ippassaq qujanartumik tiguai. Danmarkimut nassiunnerat iluatsippoq. Annertoorsuupput qujanartumik. Palletsit 100-it sinneqarput, Siggummit, Ole Andersen oqarpoq.

Avannaa Seafood taama aamma periarfissaqarnerminik naammagisimaarinnippoq.

- Royal Arctic Linep umiarsuaa ippassaq maaniinnermini qerititsivitsinniittut suliarineqareersut tiguai aallarullugillu, tamanna assorujussuaq qujanarpoq, John Møller oqarpoq.

Royal Greenland: Qerisut Saattunukaappagut

Tunisassiorfiit namminersortut saniatigut pisortat pigisaat, Royal Greenland, Uummannami aamma tunisassiorfeqarpoq. Taakkua Saattuni aamma tunisassiorfeqarlutillu qerititsiveqarnertik iluaqutigaat.

- Sarfaarukkatta ilimangereerpara sivisuumik sarfaqannginnissarput, taamaattumik qalerallit qerisuutigut palletsit 60-it Saattunut assartortippagut. Qeriinnarput aanngillat, Jakob Mathiassen tunisassiorfimmi pisortaq oqarpoq.

Taakkua tunisassiorfiat aamma maanna matoqqavoq, qaqugu ammaqqissanersoq oqaatigisinnaanngilaa. Nukissiorfiit suliaqarnerat tamatumunnga apeqqutaassasoq taanna oqarpoq.