Kommuneqarfik Sermersooq inissiaatileqatigiiffimminut Iseritsimut 166 mio. koruuninik aamma 66 mio. koruuninik aningaasaliissuteqarpoq. Katillugit 232,5 mio. koruunit.
Kommunalbestyrelsip pingasunngornermi ataatsimiinnerisa oqaluuserisaanni allassimapput.
Kommuneqarfik Sermersooq inissiaatileqatigiiffimminut Iseritsimut 166 mio. koruuninik aamma 66 mio. koruuninik aningaasaliissuteqarpoq. Katillugit 232,5 mio. koruunit.
Kommunalbestyrelsip pingasunngornermi ataatsimiinnerisa oqaluuserisaanni allassimapput.
Oqaluuserisassani immikkoortut 1 aamma 2 Iserit A/S-imi immikkut ittumik ataatsimeersuartitsinermi eqqartuussissuserisoq Niels Hansen Damm ingerlatseqatigiiffimmi aningaasaatit 166 mio. koruuninik aamma 66,5 mio. koruuninik qaffannissaannut pisinnaatinneqarneranut tunngapput.
Aamma Iserit A/S-imut malittarisassat nutaat akuersissutiginissaanut piginnaatinneqarnera.
Aningaasat taakku inissianik pisinermut tunisinermullu kommunalbestyrelsip aasaq aalajangiiffigisaanut tunngapput. Oqaluuserineqarneralli matoqqammata suut pineqarnersut maannamut tamanit paasineqarsinnaanngillat.
Init 205-it pisiarineqartut
Ineqarneq pillugu suliamik taaneqartartumut attuumassuteqartut inissiat pingasut pisiarineqartut, Kommuneqarfik Sermersuumi pisortap Ole Jakobsenip Sermitsiamut marlunngornermi ullaap tungaani oqaatigaa.
Kommunip inissiat marluk Nuussuarmiittut, Manguaraq 35-mi aamma 37-mi, immikkut 66-inik initallit pisiarai. Inissiat suliffeqarfimmit Sarfaarsuit ApS-imit pigineqarput, kommunillu pisinermigut ingerlatseqatigiiffik akisussaaffigilerpaa.
Tamatuma saniatigut kommunip illu Nuukullak 3 pisiaraa, taannalu inuussutissarsiortup Jackie Lyngip ingerlatseqatigiiffiutaanit Nuuk City Investimit pigineqarpoq. Jackie Lyngip tamanut ammasumik kommunip suliami periaasia siorna isornartorsiorpaa, inissiallu attartortittakkat 73-it pillugit isumaqatigiissut atorunnaarsinniarlugu oqariartuuteqarluni.
Pisinerit marluk kommunip inissiaatileqatigiiffianit Iserimmit suliarineqarput, pisinerillu naammassinissaannut eqqartuussivilersuussinerit marluk unitsinneqarnissaat piumasaqaatigineqarluni.
Kommunimi pisortap pisinermut aningaasartuutit qanoq amerlatiginersut oqaatigiumanngilaa, Iseritilli illut ilaat tamakkiisumik akillersinnaanngimmat taarsigassarsisoqassalluni.
Pisortat taarsigassarsititsinerat akerleriissutaasoq
Eqqartuussivimmut suliassanngortitsinernut taakkununnga illuliornermut pisortanit taarsigassarsiat pillugit isumaqatigiinnginneq pissutaavoq.
Taarsigassarsiat ukiuni 20-ni erniaqanngillat, malittarisassanullu naapertuutinngitsumik taarsigassarsisoqarsimanera nalilerneqarmat Namminersorlutik Oqartussat Kommuneqarfik Sermersuumut taarsigassarsiat akileqquaat.
Kommunip init namminersortunut aningaasaliisartunut attartoriarlugit innuttaasunut initaarnissamik utaqqisunut attartorteqqitarai. Inissiallu taakku katillugit 205-it ineqarneq pillugu suliamut ilaapput. Kommuneqarfik Sermersooq Namminersorlutik Oqartussat Nakkutilliisuannit kommunip inissianik namminersortunit attartortitsinermi periuserisimasaa pillugu uparuarneqarpoq.
Kommunimi pisortaq: Attartortuvut pillugit taamaaliorpugut
Inissiat pisiarinissaat kommunimut aningaasatigut pitsaanerpaasoq, aamma aalajangerneq inissiani attartortorpassuit eqqarsaatiginerisigut pisoq, kommunimi pisortaq Ole Jakobsen oqarpoq:
- Attartortuvut pillugit taamaaliorpugut. Innuttaasut taakkulu ilaqutaat ilaquttavullu pillugit taamaaliorpugut, attartornermummi isumaqatigiissutip naanerani taakku nuutittariaqalissagatsigit.
- Aamma napasuliat marluk (Manguaraq 35 aamma 37) nutaajullutik attartulernerattuut silataani iluanilu aaqqissuuttussaassagatsigit, isumaqatigiissummi allaqqammat. Suliarinissaallu isumagisinnaanngilarput, Ole Jakobsen oqarpoq.
Kommunimi pisortap inissianik taakkuninnga pisineq attartortut isumaqatigiissutaannik allannguinermik kinguneqassanngitsoq naqissuserpaa.
Pisinikkut ajornartorsiutit arlallit aaqqinneqartut
Inissiat pisiarinerisigut kommunip pisussaaffiit arlallit naammassivai, taamaalilluni suliami ajornakusoortumi aaqqiisoqarluni:
- Kommuni ininik attartoriarluni attartorteqqitsitaminut piginnittunngorpoq. Attartornissamik isumaqatigiissutit qaangiuppata atuukkunnaarsinneqarpataliinniit, kommune attartortunut ininik allanik ujaasinissamik akisussaaffeqarpoq.
- Kommunip pisortanit taarsigassarsiani 67 mio. koruuniusut 28 mio. koruuniusullu Namminersorlutik Oqartussanit akileqquneqartut taarserpai.
- Kommunep inissianik attartornermini akilertagaa innuttaasunit akilerneqarsinnaanngimmat ukiut tamaasa tapiissutaasarpoq. Kommunimiit taakku tapiissutit kommunip inissiaatileqatigiiffianut maanna tunniunneqartalissapput. Iseritsimmi inissiat pigilertussaavai.
Per Laugesenip pisineq uppernarsaraa
Tuniniaasut aappaata, Per Laugesenip, Sermitsiamut allakkatigut akissuteqarnermini Manguaqqami napasuliat marluk pillugit isumaqatigiissuteqartoqarsimasoq uppernarsarpaa:
- Innuttaasut namminneq piumasamittut inissiani najugaqaannarnissaat qulakkeerneqarpoq. Kommunimut, Iserit A/S-imut uannullu innuttaasut ataasiakkaat attartornermut isumaqatigiissutaasa allanngortinnginnissaat pingaaruteqarsimavoq.
Kommunip pisortanit ineqarnermut taarsigassarsiarisimasani 100 procentimik akilissagai, aamma kommunip eqqartuussivilersuunnera taamaatinneqassasoq isumaqatigiissutigineqartoq Per Laugesenip ilanngullugu oqaatigaa:
- Tamanut taanna pitsaanerpaasoq isumaqatigiissutigaarput, Per Laugesen oqarpoq.
