Minguinnerusumik suliffissualiorneq akinik appasinnerusunik pisariaqartitsivoq

Nukissiorfiit Nuummi kantiinaa oktobarip naalernera inunnik ulikkaavippoq. Utoqqarmiut Kangerluarsunnguani erngup nukinganik nukissiuutip allilerneqarnerani suliaqartut piginnittuusullu, Nukissiorfiit aamma NunaGreen, Sulisitsisut kiisalu Nalik Ventures suleqatigalugit aaqqissuussami “Nukissianik sinneqartooruuteqarsinnaaneq atorluarneqarli”qulequtalimmi sammineqarpoq. 

Tamannalu Nuummi inuussutissarsiornermik suliaqartunit peqataaffigilluarneqarpoq. Matumani sammisassaqartitsinermi erngup nukiganik innaallagissiorfiup allilerneqareernerata kingorna 2032-mi nukissiaq sinneqartoorutaasussaq qanoq atorluarneqarsinnaanera pillugu oqallittoqarpoq.

– Erngup nukinganik nukissiorfiup allilerneqarnera naammassippat mingutsitsinngitsumik nukissiorluartoqalersinnaanerata periarfissaqarluarnera sammisassaqartitsinermi ersersinneqarpoq. Taamaaliornissamullu pilerinarnerulersitsisunik sinaakkuteqalertariaqarpugut, Nukissiorfinni nukissiornermi pisortaq Johan Danielsen oqarpoq.

NunaGreen neqeroorfigineqartoq

Erngup nukinganik nukissiorfiup allilerneqarnissaanut suliaqarusuttunit nunanit tamalaaneersunit NunaGreen neqeroorfigineqarpoq. Neqeroorutit uuma allaaserisap allanneqarnerani suli nalilersorneqarput. 

Suliniut aalajangiiffigineqangajalersoq, tassanilu unitsinneqassanersorluunit ingerlateqqinneqassanersorluunniit aalajangerneqassasoq, NunaGreen pisortaata Sermitsiamut septembarip ingerlanerani oqaatigaa.

- Piffissaliussat malinneqarlutik sanaartorneq annertooq upernaakkut 2026-mi aallartinneqarsinnaalersillugu neqeroortoqarnissaa utaqqimaarparput, NunaGreenip pisortaa Aviaaja Karlshøj Knudsen oqarpoq.

NunaGreen neqeroortunik nalilersuinera inaarneqarpat, sanaartornerup ingerlanneqarnissaanut aalajangiinissamut inerniliisuussaaq.

Taamatuttaaq Qeqertarsuup tunuani, Qasigiannguani Aasiannilu erngup nukinganik minguinnerusumik nukissiuteqalernissamut sanaartornermut siunnersuisussamik neqeroorusiortitsinissamik NunaGreenimiit suliaqartitsipput.

Utoqqarmiut Kangerluarsunnguani erngup nukinganik nukissiorfiup allilerneqarneratigut tunisassiorneq qaffariaateqangaatsiassaaq, tassa 255-miit 660 gigawatt-timer-imut qaffariaateqarnissaa naatsorsuutigineqarpoq. Tamannalu nukissiuutinik atuinermut 55 megawatt-iusumut naatsorsuutigineqarsinnaavoq. Taamaasillunilu Nuummi ataavartumik nukissiuuteqarneq sinneqartooruteqangaatsiassalluni.

Nukissiuut minguitsoq ineriartortitsissaaq

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoq Naaja H. Nathanielsen (IA) sammisaqartitsinermi aamma peqataavoq, taassumalu nukissiornerup tungaatigut politikkikkut anguniakkat saqqummiuppai.

Alliliinermi suliniut nukissiuutinilli atuinerup qaffannerata qanoq periarfissiisinnaanera NunaGreenip senior business developeria Thomas Ravnshøj-Davidsenip saqqummiuppaa, Nukissiorfimmiit ingerlatsinermut siunnersortip Asger Dallip nukissiuutit ingerlaartarnerat sinneqartoorutillu pillugit saqqummiisoq aamma aallarnisaasunut siunnersuisarfik Nalik Venturesimi siunnersortaaneq Gorm Vold aallarnisaasunut sinaakkutit pillugit saqqummiivoq. 

Tusassimiillu erngup nukinganik nukissiuumminngaanniit pilersorneqartumik data centereqalernissaq saqqummiunneqarpoq kiisalu Sikuki Harbour A/S nunamiit umiarsuarnut innaallagissamik pilersuisinnaanermut periarfissat saqqummiullugit.

Nukissiuuteqarneq akikinnerulerpat suliffissuit nutaat pilersinnaasut

Kalaallit Nunaat nukissiuteqarnikkut periarfissaqarluartoq oqalugiartut arlallit tikkuuppaat, innaallagissamulli akigititat apeqqutaallutik mingutsitsinngitsumik nukissiorneq kaaviiaartitsinermi ineriartuutaasinnaaneranik aalajangiisuussapput.

Peqataasunit naqissuserrneqarpoq, suliffeqarfiit nutaat, soorlu datacenterit, aatsitassarsiornermik suliniutit aamma power-to-x- piviusunngortinneqarsinnaasuut, nukissiuutitigut akigititat akikinnerulerpata. Nunatsinnilu orsussamik atuinermi suli maannamut CO2-mut akitsuummik pilersitsisoqarsimanngimmat.

Nukissiorfimmi akigititat politikikkut aalajangersarneqartartut, nukissiuteqarnermut pisortap nassuiaatigaa. 

- Suliffeqarfinnik aallarnisaasut akikillisaavigineqartarsinnaanerannut aaqqissuussisueqarsinnaanersoq apeqqutigineqarpoq. Nukissiorfiit sumiiffinni sinneqartoorfiusuni innaallagissamut, imermut kiassarnermullu akigititanik isumaqatigiissusiorsinnaavoq. Tamannali unammilleqatigiinnermut akornutaassanngilaq politikkikkullu akuersissutigineqassalluni, Johan Danielsen oqarpoq. 

Nukissiorfinni aningaasaqarnerup oqimaaqatigiissaarinissaa qulakkeerniarlugu naalakkersuisoqarfimmut attuumassuteqartumut oqaloqatiginninneq ataavartumik ingerlanneqarlunilu inuiaqatigiinni ineriartorneq tapersersoqartarpoq.

– Taamaattumik tamanna CO2-mut akitsuutinut allarpassuarnullu tunngatillugu apeqqutit politikkikkut apeqqutaapput. Sammisassaqartitsinermi akinut tunngatillugu, allanullu tunngatillugit oqariartuutigineqartut politikkip tungaatigut samminerupput. Sammisassaqartsitsinermi oqariartuutigineqartullu, allallu politikkimut attuumassutillit Nukissiorfiit naalakkersuisoqarfimmut ingerlateqqissallugit nukissiuteqarnermut pisortap oqaatigaa.

Minguinnerusumik ineriartornermi tullinnguuttoq

Sammisassaqartitsinerup malitsigisaanik upernaaru aaqqissuusseqqinnissamut Nukissiorfiit pilersaaruteqarput. Tamatumuunakkut nukissiuutitigut sinneqartoorutip atorluarneqarnissaa siunertaralugu suleqatit aalajangersimasut suliniutillu ukkatarineqassallutik.

– Nukissiuutinik sinneqartoorutit tuniniarnissaat teknikikkuinnaq suliassaanngilaq – ataatsimoorussamik Kalaallit Nunaat pillugu suliniutaavoq, Johan Danielsen oqarpoq.

– Nunatsinni misilittagaqarluartut piginnaasaqarluartullu ataatsimoortikkutsigit siunissaq nukittunerullunilu minguinnerusoq aammalu imminut nappassinnaanerusoq pilersissinnaavarput.