Biologit piniartullu aammaarlutik akerleriissuteqarput. Tunumi qilalukkat qernertat qaqortallu amerlassusaat aarlerinartorsiornerarlugit piniarneqarnerat unitsinneqartariaqartoq NAMMCO innersuusseqqippoq.
Piniartulli akerlerluinnaanik isumaqarput. Qilalukkat kisinneqartunit amerlanerujussuusut Ittoqqortoormiini piniartup siusinnerusukkut oqaatigaa . Qernertarlu piniarneqarunnaassappat piniartuuneq siunissaarutissanerarlugu. Piniarnermut naalakkersuisoq Peter Borg piniartup aarleqqutai tusaavai.
Biologit piniartullu aammaarlutik akerleriissuteqarput. Tunumi qilalukkat qernertat qaqortallu amerlassusaat aarlerinartorsiornerarlugit piniarneqarnerat unitsinneqartariaqartoq NAMMCO innersuusseqqippoq.
Piniartulli akerlerluinnaanik isumaqarput. Qilalukkat kisinneqartunit amerlanerujussuusut Ittoqqortoormiini piniartup siusinnerusukkut oqaatigaa . Qernertarlu piniarneqarunnaassappat piniartuuneq siunissaarutissanerarlugu. Piniarnermut naalakkersuisoq Peter Borg piniartup aarleqqutai tusaavai.
- Soorunalimi tusarlugu eqqarsajallannanngitsuunngilaq. Aamma una pingaaruteqarsoraara oqaatigissallugu, taamatut NAMMCO-p piniartoqavinnginnissaanik ilisimatuussutsikkut 2019-imiilli innersuussisareermat, taamaattumik ukioq manna innersuussinera nutaajunngilaq, Peter Borg oqarpoq.
Pisassinneqassaqqaarput Tunumi qilalukkat qernertat 41-t ukioq manna pisassiissutigineqarput. NAMMCO-p Pinngortitaleriffiullu innersuussinerat malinneqassappat pisassat 0-iusariaqaraluarput. Pisassiinermili aalajangiisussaq tassaavoq piniarnermut naalakkersuisoq.
- Massakkuugallartoq Naalakkersuisuni attapparput, Naalakkersuisut siuliisa aamma ingerlassimasaat, neqissaqarniarnissaq eqqarsaatigalugu, taavalu kulturikkut ileqqut piniartariaatsit pilisariaatsillu eqqarsaatigalugit nunatta kangiani qilalukkanik piniartoqarsinnaanissaa, Peter Borg oqarpoq nangillunilu:
- Allatut aalajangertoqarnikuunngilaq, taannaavorlu Naalakkersuisut massakkut inissisimaffigisaat.
Piniartut ilisimatuullu ilisimasaat qilalukkat ikiliartornerannik takussutissiissagaluarpata ilumut qilalukkanik qernertanik pisassiisoqaannartassanersoq isummerfigineqassasoq Peter Borgip oqaatigaa.
Assiliisoq: Oscar Scott Carl
Taamaakkaluartoq aappaagussamut pisassat qanoq amerlatigiumaarneri Peter Borgip maannangaaq oqaatigisinnaanngilaa. Pisassiinissap tungaanut paasissutissat assigiinngitsut, ukioq mannalu pisarineqartut aamma apeqqutaajumaartut, nalilersuinermilu ilanngunneqarumaartut tunngavilersuutigalugu.
Ilisimatuussutsikkut paasisat pisariaqarpat? NAMMCO-p Tunumi qilalugarniarnerup unitsinneqarnissaa 2019-imili innersuussutigilerpaa. Naalakkersuisulli taamanili pisassiiuartarput.
Tusaanianngikkussigit ilumut pisariaqarpa kisitsisarnissaat?
- Pisariaqarpoq ilisimatuussutsikkut malinnaaviginissaat uumasut suulluunniit. Imarmiuuppata, nunamiippata, aalisagaappata miilumasuuppataluunniit. Kisianni aamma ilisimatuussutsikkut kisitsisit saqqummiunneqartut aamma piviusumik atuinerminngaanniit ilisimasanik tapertalersorneqartariaqarput aalajangersaanermi, Peter Borg oqarpoq.
Piniartulli ilisimatuullu ilisimasaat qilalukkat ikiliartornerannik takussutissiissagaluarpata ilumut qilalukkanik qernertanik pisassiisoqaannartassanersoq isummerfigineqassaaq.
- Massakkut mianersortumik taakkua akornanni inissisimavugut. Piffissap takutikkumaarpaa, taakkua marluk suleqatigiillutik kisitsisinik saqqummersitseriarpata, allatut naalakkersuinikkut aaqqiissuteqartoqarumaassanersoq.
Piniarnermut naalakkersuisoq arfininngornermi Tasiilamukartussaavoq, Ittoqqortoormiilli piniartut ilisimasatik anngukkusullugit aamma tikeraarsaapput.
- Pilersaarutima ilagivaat Ittoqqortoormiinut tikikkumaarnissara. Taanna suli inissinneqanngilaq, kisianni neriuppunga ukiup matuma naannginnerani pisinnaajumaartoq, allanik aamma sinerissamik ornitassaqarama, Peter Borg naggasiivoq.
