- Qilalukkanik pisassiisoqartarunnaassappat uagut tassaassaagut piniartut kingulliit 

NAMMCO Tunumi qilalugarniartoqanngilluinnarnissaanik 2019-imili innersuussuteqartareersoq innersuussutiminik qanittukkut uteqqiivoq. 

Tunumi qilalukkat qernertat qaqortallu amerlassusaat aarlerinartorsiortinneqarmat piniarneqarunnaartariaqartut Atlantikup avannaani miluumasut imarmiut pillugit ataatsimiititaliarsuup aammaarluni innersuussutigaa. 

Innersuussuteqarneq Ittoqqortoormiini piniarnermik inuussutissarsiuteqartut qulingiluat ilaata, Åge Danielsenip paasisinnaanagulu akuersaanngilluinnarpaa  

AAMMA ATUARUK

NAMMCO-p Tunumi qilalukkanik qernertanik qaqortanillu piniartoqarunnaarnissaa inassutigaa

- Silaqannginaarpakkaluunniit. Qilalukkat maani takusartakkagut piniartut atuisuusugut, aammami sunngiffimmi pinialuttartut, takusagut taama amerlatigisut. Aqqusaaginnartut maanga Ittoqqortoormiit eqqaanut amerlangaaramik qassiusarneqaat, Åge Danielsen oqarpoq. 

Taanna 38-nik ukioqarpoq meeqqallu atuarfiat 2005-imi naammassigamiulli piniartuulluni. Qilalugaq qernertaq Ittoqqortoormiini piniartut ukioq naallugu nerisaralugulu aningaasarsiutigaat. 

- Pingaarutilerujussuuvoq taanna piniagassaq, pinngitsoorsinnaanngisatta ilagimmassuk, taanna oqarpoq.

Piniartuuneq siunissaarutissaaq 

Tunumi qilalukkat qernertat pisassiissutigineqartut ukioq manna 41-pput, qilalukkat  qernertat qaqortanut sanilliullugit Tunumi piniarneqarnerupput. Qaqortammi katillugit 30-t 2022-miit 2027 ilanngullugu Tunumi pisassiissutigineqarnikuupput, taakkunanilu arfineq-marluk suli pisarineqarsimanatik. 

Qernertaq Ittoqqortoormiini piniartunut ima pingaaruteqartigaaq pisassiisoqartarunaassappat piniartuuneq siunissaarutissalluni. 

AAMMA ATUARUK

Siumut Tunumi qilalukkanik qernertanik qaqortanillu pisaqannginnissaq pillugu aarlerisaarisoq

- Pisassiisoqaqqissanngippat eqqarsarpunga piniartut uagut qulingiluaasugut tassaassasugut piniartut kingulliit. Kingulliuvugut maani uagut piniartut, kinguaariinnut tullernut ingerlatitseqqiiniarsarigaluarluni killilersuinerujussuup aporfilersortarmagu, Åge Danielsen oqaluttuarpoq. 

Pinngortitaleriffik Naalakkersuisunut pisassiinissanik innersuussisarpoq, innersuussinerminilu NAMMCO-p innersuussutai aallaavigisaramigit qilalugartassiisoqannginnissaa aamma taakku kissaatigaat. 

Pisassalli qanoq amerlatiginissaannik aalajangiisussaq tassaavoq Piniarnermut Naalakkersuisoq. Piniarnermut Naalakkersuisoq Peter Borg Åge Danielsenip Ittoqqortoormiinnut tikeraarsarpaa.  

- Piniarnermut naalakkersuisup maannga Ittoqqortoormiinut tikeraarnissaa pisariaqarpoq, piniartut ilisimasai tusarniariartorlugit. Taamannammi una qilalugaq pingaaruteqartigisoq tassanngaannaq piniarneerutsinneqarsinnaanngilaq, Åge Danielsen oqarpoq. 

Kisitsineq apeqquserpaa 

Åge Danielsen piniartoqatinilu tallimat missaanniillutik Kangersuttuarmi 2022-mi septembarimi qilalugarniarlutik misigisartik eqqaamalluarpaa. 

Ulluni arfinilinni qilalugarniareerlutik utimukaarlutik timmisartoq Twin Otter qilalukkanik kisitsisoq naammattoorpaat. Åge Danielsenip oqaluttuarnera malillugu ulluni taakkunani arfinilinni qilalukkat Kangersuttuarmut ulluni arfinilinni pularartut 600-t sinnerpaat. 

Qilalukkat immikkuutaarlutik kangerlummut pulasarput. Eqimattami ataatsimi qilalukkat qassiuneri nikerartarput, nalinginnaasumilli qulit missaaniittarput, amerlagaangamik ilaanni 30-t sinnertarlugit. 

Åge Danielsenip oqaluttuarnera malillugu timmisartoq qilalukkat aqqaamaneri nalaarlugit marloriarluni qulaappoq. Tassanilu timmisartumi piniartoq ataaseq kisitseqataasoq qilalukkanik qassinik takusimanasualugu kingorna paasiniaaffigaat. 

- Piniartoqaterput Nerlerit Inaaniittoq unnukkut oqaloqatigisinnaanngoratsigu apersorparput, taanna oqarpoq qilalukkanik takusimanatik, kisianni umiatsiat takusimalluta, Åge Danielsen oqaluttuarpoq nangillunilu.

- Tassa taama erseqqitsigaaq, timmisartumik kisitsilluni qilalukkat qanoq takujuminaatsigisimanerat. 

Biologit piniariarfimminnukaqataaqqugai

Åge Danielsenip oqaluttuarnera malillugu qilalugaqatigiit qernertat Ittoqqortoormiit eqqaaniittut pingasuupput. 

- Avataata qilalugai portullutillu silittuupput naakkaajullutillu. Allat amitsukujuunik taasarpagut, taakku takisuujupput. Taavalu qilalukkat nalinginnaasut. Nalinginnaasut aasakkut piniartarpagut, taava ukua avataata qilalugai amitsukujuullu ukiukkut upernaakkullu eqqatsinneerujoortarput, Åge Danielsen oqarpoq.

Qilalukkanik kisitsisut piffissaq aalajangersimasoq kisitsisarmata qilalukkat ilaat arajutsineqartartut taassuma qularinngilaa. 

- Qilalukkat upernalernerani, soorlu massakkut, takkuttartut biologit sianiginngilaat, taakkua qilalukkat allaammata. Avataata qilaluarai, ilaanni juulip tungaanut eqqatsinniittartut. Amerlangaarmata tupinnassaqaaq piniaqqusaajunnaassappata.

Biologit piniartullu aporaaffeqartarneri takornartaanngilaq. Qilalukkat Tunumi qanoq amerlatigineri pillugit tamatumuuna isumaqatigiinngittoqarluni. 

Kisitsineq pitsaanerulissappat illit piniartutut qanoq siunnersuuteqarsinnaavit? 

- Biologit qilalugarniarfigisartakkatsinnut ilagisariaqaraluarpaatigut. Qilalukkanik qamasarfitsinni nunaminngaanniit kisitsillutik. Aatsaat iluamik takussagaluarpaat. Timmisartumiunngitsoq, umiatsiamik, Åge Danielsen taama naggasiivoq.

Åge Danielsenip biologinut innersuussutai isornartorsiutaalu pillugit Pinngortitaleriffimmi miluumasunut timmissanullu 
immikkoortortaqarfimmi pisortaq Fernando Ugarte akissuteqartinniaraluarparput. 

Taanna piffissami matumanerpiaq asimi sulimmat pissarsiarisinnaanngilarput. NAMMCO-p Tunumi qilalugartassiisoqannginnissamik innersuussutaa Siumup siusinnerusukkut isornartorsiorpaa. Pisasseeqqusiunnaarneq naammattumik uppernarsarneqarlunilu ersarissumik tunngaveqannginnerarlugu. 

- Siunnersuutip tunngavia sukumiisumik uppernarsaatissaqarpoq tamanillu atuarneqarsinnaalluni, Fernando Ugarte Sermitsiamut tassani ilaatigut akissuteqarpoq. Allaaserisaq tamakkiisoq uani atuarsinnaavat.