Pisortaq kræfteqalerpoq – suliffeqarfiutaa 3 million koruuninik akileraarutitigut akiligassinneqaratarsinnaavoq

Knud Laursen 72-inik ukiulik ukioq manna juunimi napparsimalerami Jyllandip avannaani napparsimmavimmi katsorsarneqarniarluni Danmarkimut nuuppoq.

Taamaaliorsimasussaassagunanngikkaluarporli.

Akileraartarnermut naalakkersuisup pissaaneqartup Múte Bourup Egedep, IA-meersup, akileraarutinut inatsisissatut siunnersuut isornartorsiorneqangaartoq Inatsisartuni amerlanerussuteqartunit akuerineqarsinnaanngortippagu Knud Laursenip suliffeqarfiutaa, Auto & Marineservice Center A/S Maniitsumiittoq, 3 millionit koruunit missaannik akileraarutitigut akiligassinneqarsinnaavoq.

Taamaalilluni suliffeqarfik, pilersitseqataaffigisaa, piginneqataaffigisaa pisortaaffigisaalu akileraarutinik immikkut ittumik eqqugaassaaq — tassa pillaatissinneqartussanngorlugu.

Akileraarut Naalakkersuisut Kalaallit Nunaanni atuutilersinniagaat inatsit nutaaq tunngavigalugu atuutilersinneqarniarpoq, tassami pisortat Kalaallit Nunaanni najugaqarunnaarlutik Danmarkimut nuuppata ingerlatseqatigiiffik nammineq aningaasaatinit 17-19 procentinik akileraartussanngussaaq. Assersuutigalugu napparsimmavimmi katsorsarneqarniarluni.

Knud Laursen taamatorpiaq iliorpoq. Napparsimmavimmi katsorsarneqarniarluni Danmarkimut nuuppoq.

Knud Laursenip Maniitsumi ingerlatseqatigiiffia Auto & Marineservice Center A/S 20 million koruunit missaannik nammineq aningaasaateqarpoq. Akileraarutit saniatigut 3 million koruunit suliffeqarfiup Kalaallit Nunaanni akileraartitsisartunut akilertussaassavai. Aningaasat piffissami tassani ingerlatseqatigiiffimmut ikineqarsimasunit imaluunniit ingerlatseqatigiiffiup kingusinnerusukkut isertitaanit akileraarutit saniatigut akileraarutaassapput.

Pisortaq: - Naapertuilluarnerunngilaq

Knud Laursen pakatsillunilu aliasuppoq. Suliffeqarfimmik patajaatsumik pilersitsillunilu sulisorpassuaqarpoq. Ingerlatseqatigiiffik Kalaallit Nunaat tamakkerlugu sullitaqarpoq, taakkualu suliffeqarfimmit umiatsianik, angallatit motooriinik biilinillu pisisarput. Aallarnisaasoq suliffeqarfillu ineriartortoq isertitaqarluartorlu pillugit oqaluttuaq nuannersoq tamatta tusarusutarput.

- Suliffeqarfimma immikkut akileraaruteqarnissaa naapertuilluarnerunngilaq. Ukiunimi 35-ni suliffeqarfimmik ingerlatsisuullungalu inuiaqatigiinnut kiffartortuuvunga, Knud Laursen Sermitsiamut oqarpoq.

Knud Laursen ukioq manna maajimi quup aqqutaatigut aseruuttoornermik napparsimalerpoq. Tamatuma kingorna Kalaallit Nunaanni katsorsartissinnaannginnami Danmarkimi Aalborg Universitetshospitalimi katsorsartinniarluni Danmarkimut nuuppoq.

- Tamanna Kalaallit Nunaanni peqqinnissaqarfimmi iliuuseqarfiginiarneqanngilaq, taanna oqarpoq.

Quup aqqutaatigut kræfteqartoq

Kræfteqartoq paasineqarmat Kalaallit Nunaanni peqqinnissaqarfiup pisariaqartitaanik katsorsarsinnaanngilaa.

Knud Laursenip juunip aqqaneq-aappaanni Danmarkiliarnera naatsumik oqaluttuarineqarsinnaavoq. Tassani pisortat napparsimmaviutaannut unitsinneqarsinnaannginnami Jyllandip avannaani napparsimmavimmut namminersortumut unitsinneqarpoq.

- Siaruaassimasumik quup aqqutaatigut kræfteqarlunga napparsimmavimmi namminersortumi paasitinneqarlungalu Aalborg Universitetshospitalimut innersuunneqarpunga.

- Universitetshospitalilli nunatsinni nakorsaanermit qularnaveeqquteqaruma aatsaat katsorsarumavaanga. Taamaammat nammineq iliuuseqarlunga juulip aqqaneq-aappaanni Thistedimi innuttaasunik nalunaarsuisarfimmut nalunaarpunga. Ullut pingasut qaangiummata universitetshospitalimut unikkama ingerlaannaq kræftimut katsorsarneqarpunga.

- Danmarkimut pigamali illunni aasarsiortarfinni Thistedip eqqaaniittumi najugaqarpunga, ullullu tamaasa katsorsartinniarlunga napparsimmaviliartarpunga, taanna oqaluttuarpoq.

Soormi illit suliffeqarfiillu akileraartarnermik ajornartorsiuteqannginniassagassi Kalaallit Nunaannut utiinnanngilatit?

 - Naamik taamaaliorsinnaanngilanga, pisariaqartitannimmi Kalaallit Nunaanni katsorsarneqarsinnaanngilanga. Maannamut Danmarkimi najugaqartariaqarpunga. Peqqissusera navianartorsiortikkusunngilara immaqalu nakorsat kræfteqarunnaarninnik nalunaaruteqarnissaasa tungaanut ukiumi ataatsimi marlunniluunniit Danmarkimiiginnaqqaartariaqarpunga. Tamatuma kingorna Maniitsumut utersinnaassaanga, Knud Laursen oqaluttuarpoq.

Inatsisissatulli siunnersuut Inatsisartuni akuerineqassappat, napparsimaleqqippat imaluunniit aasarsiorfimminut nuuppat AMS 3 millionit koruuninik akiliisariaqalersinnaavoq.

- Ingerlatseqatigiiffimmi pisortaq Kalaallit Nunaannit nuukkaangat akileraarutinik akiliisoqartartussaarpasippoq, taanna nangippoq.

Pisuut akileraarutigisartagaraat?

Knud Laursen Naalakkersuisut isertitanut akileraarutinut inatsimmik allannguinissamik siunnersuutaata kinguneri pillugit kukkunersiuisartoq oqaloqatigigamiuk tupaallappoq.

- Akileraartarnermut immikkut akiliut eqqarsaatigalugu taama pisoqarumaarnera takorloorsimanngisaannarpara, Knud Laursen oqarpoq.

Naalakkersuisut aningaasat Kalaallit Nunaanni pissarsiarineqartut nunamit aninnginnissaat inatsimmi nutaami qulakkeerniarpaat. Immikkut akileraarut pisuut akileraarutaattut partiit Naalakkersuisuutitaqartut illuatungiliuttullu taanikuuaat.

AAMMA ATUARUK

Sulisitsisut akileraartarnermut inatsisissatut siunnersuut nutaaq sakkortuumik isornartorsioraat: Aningaasaleerusussuseqarnerup eqqugaasinnaanera ernumagineqarpoq

- Politikerit amerlanerpaat inatsisissatut siunnersuut paasisimagunanngilaat. Politikerit pisuunut akileraarutit eqqartoraangatigit, tassaasarput suliffeqarfiit soorlu Afrikamiittut allaniittullu naalagaaffimmit pigineqalernissaat. Tamanna inatsisissatut siunnersuummi siunertarineqarunanngilaq, Knud Laursen oqarpoq.

Taassuma kukkunersiuisoqarfia, Grønlands Revision, naapertorlugu Naalakkersuisut immikkut ittumik akileraaruteqalerniarpata pisuunut akileraarutissaq, ilaatigut Knud Larsenip suliffeqarfiutaanut eqquisussaq, aamma pineqanngilaq.

- Suliffeqarfiit pisortaat nunatsinniit allamut nuukkaangata aningaasat nunatsinniit anninneqartartut Kalaallit Nunaanni politikerit isumaqarput, tamannali ilumuunngilaq.

- Pisortaq nuukkaangat ingerlatseqatigiiffimmit aningaasanik anisoqarneq ajorpoq. Pisortap aningaasat tiguppagit tillinnerussaaq. Suliffeqarfillu Kalaallit Nunaanni ingerlaannassappat pisortaq nuukkaluarpalluunniit akileraarutit aamma Kalaallit Nunaannut tunniunneqartarput, kukkunersiuisoq naalagaaffimmit akuerisaasoq Per Laugesen, Grønlands Revisionimi suleqataasoq, oqarpoq.

Kukkunersiuisoq: - Naleqqutinngilaq 

Ingerlatseqatigiiffik Knud Laursenip Danmarkimut nuunnerata kingunerisaanik akileraartussanngortinneqaannanngilaq. Aammattaaq piginneqataasut allat piginneqataassutaat nalikillissapput.

- Naleqqutinngilaq. Ingerlatseqatigiiffimmi pisortaq, Knud, napparsimalerluni Danmarkiliartariaqarmat piginneqataasut allat piginneqataassutitik 17-19 procentimik nalikillisut takusariaqarpaat. Tamannalu piginneqataasunut nassuiaruminaappoq, Per Laugesen oqarpoq.

Matunissaa eqqarsaatigigaa 

Knud Laursen piginneqataassutit affaat sinnerlugit pigigamigit Auto & Marineservice Centerimi piginneqataassuteqarnerpaavoq. Sinneri erneranit Thomas Laursenimiit piginneqataasumiillu allamit, Kim Christensenimit, pigineqarput. Taakku Maniitsumi Sisimiunilu najugaqarput.

Mute B. Egedep akileraarutissamut nutaamut siunnersuutaa pilersaarutit malillugit Inatsisartut maanna ataatsimiinneranni akuerineqartussaassaaq.

- Inatsisissatut siunnersuut tamanna nikalluutigeqaara. Ukiualuit matuma siornatigut paasisimagaluarukku suliffeqarfik matullugu inuit 25-t kommunimut akileraartartut sulisoriunnaarlugillu Maniitsumi ineriartortitsinissamut aningaasaliinanga inuunera nuannataarfigiinnarsimassagaluarpara.

- Aningaasaqarnikkut iluaqutigaara, innuttaaqatigiinnulli ajoqutaalluinnarpoq. Suliffeqarfiga matusimasuugukku Kalaallit Nunaat ajorsarsimassagaluarpoq, inuussutissarsiortoq Maniitsumeersoq Knud Laursen pakatsilluni oqarpoq.