Qaqortup mittarfia nunanit tamalaaniit tikinneqarsinnaanngorluni akuerineqartoq
Angallannermut Aqutsisoqarfiup Qaqortumi mittarfimmi isumannaallisaanermik sullissineq misissoreerlugu timmisartunit nunanit tamalaaneersunit miffigineqarsinnaanngorlugu akueraa.
Air Greenlandip timmisartui Qaqortumukartartut Icelandairimiit tikittartunit ilaneqarsinnaalerput.
Assi: Oscar Scott Carl
Kujataani mittarfik nutaaq apriilip 16-ianni ammarneqartoq, Air Greenlandip timmisartuinnaanniit miffigineqarsinnaaqqaarpoq.
Angallannermut Aqutsisoqarfiup Qaqortup mittarfiani timmisartunik nunanit tamalaaneersunit kiffartuussisoqarsinnaanngortoq maanna nalunaarutigaa.
– Qaqortumi mittarfimmi isumannaallisaanerup qanoq innera misissorparput, tassanilu Greenland Airports naammattumik ingerlatsinermi misilittagaqarlunilu isumannaallisaanermut tunngasunik pisariaqartunik aaqqissuussaqartoq paasinarsimmat nunaniit allaniit timmisartuussinerit soorlu Icelandairimit kiffartuunneqarsinnaanerat akuerineqarpoq, Angallannermut Aqutsisoqarfimmi pisortap tullia Lars Korsholm oqarpoq.
– Tamanna isumannaallisaanermut tunngasuni aamma mittarfiup iluani atortorissaarutitigut suleriutsitsigullu periutsit isumannaallisaanermut piumasaqaatinik naammassinninnermut tunngavoq, Lars Korsholm oqarpoq.
Akuersissuteqalertoqarnera kinguneranik Icelandair ullumi sisamanngornermi juunip sisamaani aallartittumik Qaqortup Keflavikillu akornanni timmisartuussisinnaalerpoq. Juunip aappaanni timmisartuussisoqarnissaralua taamaatinneqarsimasoq Flightradar24-p paasissutissaataani takuneqarsinnaavoq.
Icelandair aasaanerani sapaatip-akunneranut sisamariarlutik septembarimilu marloriarlutik timmisartuussisassasoq siorna nalunaarutigineqarnikuuvoq.
Timmisartuutileqatigiiffik Narsarsuup mittarfianut angallassisarnikuupput, Qaqortumi mittarfiup nutaap ammarneqarnerata kingorna tamanna matuneqarpoq.
