Qeqertarsuatsiaat eqqaanni aatsitassarsiorfik piffimmi pisussaaffiit pillugit isumaqatigiissuteqartoq

Greenland Anorthosite Mining maanna Qeqertarsuatsiaat avannamut kangiani Piiaaffik Itersarmiut Allerni anorthositmik qalluinissamut qaninnerulerpoq.

Aatsitassarsiortitseqatigiiffik Impact Benefik Agreementimik (IBA-mik isumaqatigiissummik) Kommuneqarfik Sermersuumik namminersorlutillu oqartussanik isumaqatigiissuteqarpoq. Tamanna illuatungeriit akunneranni juunimi attaveqaatit atorlugit ataatsimiinnermi pivoq.

Piffimmi pisussaaffiit

Isumaqatigiissutikkut aatsitassarsiortitseqatigiiffik sanaartornerup tunisassiornerullu nalaani sulisut tamarmik minnerpaamik 40 procentiisa nunaqavissuunissaannik imminut pisussaatippoq. Tamatuma saniatigut aatsitassarsiortitseqatigiiffik ukiut tamaasa ilinniartitaanernut aningaasaliisassaaq. Pisussaaffik ukiut tamaasa annertusiartussaaq ukioq mannalu 70.000 kr-iussaaq 2027-lu tunisassiornerup aallartinnerani minnerpaamik 250.000 kr-iussassalluni.

Tamatuma saniatigut sanaatornerup nalaani ukiut aningaasat atukkat minnerpaamik 5 procentii tunisassiornerullu nalaani 10 procentii piffimmi nioqqutissanik sullississutinillu niueruteqartunut atorneqartassapput. Naggataagullu ingerlatseqatigiiffik niuernermi akiligassiinermit siullermit ukiut tamaasa minnerpaamik 250.000 kr-nik Kommuneqarfik Sermersuumi ilinniartitaanermut, kulturimut timersornermullu legatinik tunniussisassaaq.

– Maanna kingulliit inissipput – akuersissut, oqartussanik suleqatigiinneq IBA-millu isumaqatigiissut piffimmut aallaaviliisoq. Tamatuma siullertut Kalaallit Nunaanni aatsitassarsiorfimmik danskinit ingerlanneqarluni suliniummi najugaqarlunilu inooqataasunngortippaatigut, pisortaq Claus Stoltenborg oqarpoq.

Taanna Anders Nørby-Lie kiisalu Claus Østergaard 21st Northimi Greenlaand Anorthosite Meningimi pisortaapput.

Aningaasaliisut alloriarnerlu tulleq

Greeland Anorthosite Miningimi aktiaatilinni Greenland Gold Resources annersaavoq, taakkulu pingaarnertut piginnittoraat nunarsuarmi aatsitassarsiorfinnik ineriartortitsisartoq Jean Boulle Group, aatsitassarsiorfiup aktiaataasa 33 procentiinik piginnittoq. Siusinnerusukkut 51 procentinik piginnittuupput. Takku saniatigut danskit, europamiut kalaallillu ingerlatseqatigiiffimmi aningaasaliisuupput, tassani NALIK, SISA, Arbejdernes Landsbank, 3F kiisalu EIFO.

Greenland Anorthosite Mining naapertorlugu anorthositmik isumalluutit annertussutsimikkut minguissutsikkullu immikuullarissuupput, tamannalu misissueqqissaatarfimmit ALS-mit aatsitassarsiorfinnillu siunnersuisartunit SRK-mit uppernarsarneqarpoq. Taamaalilluni anorthosit annikitsumik 2 procentit inorlugit alkalimetalimik akulik pineqarpoq, tamannalu ilaatigut glasfiberimik tunisassiornermi atussallugu pilerinartunngortitsivoq.

Aatsitassarsiortitseqatigiiffiup suliassaani aatsitassarsiorfiup matuneqarnissaanut pilersaarut kiisalu sanaartornissamut aningaasalersuinissap akueritinnissaa tullinnguuppoq. Pilersaarutip septembarimi-oktobarimi 2026-mi nassiunneqarnissaa ilimagineqarpoq, 2027-milu ukiup affaani siullermi akuerineqassalluni, tamatuma kingorna sanaartornermik suliat aallartinneqarsinnaalissapput. Suliffissuaqarnermi suleqatinut tunisat siulliit 2030-p missaani pinissaat ilimagineqartoq, aatsitassarsiortitseqatigiiffik allappoq.