Raajalerivik matoratarsinnaasoq: Qeqertalik ajornartoornermi periusissiorpoq
Kommune Qeqertalik ajornartoornermi periusissiorlunilu Polar Seafoodip raajaleriffia matusariaqassappat aningaasatigut qanoq kinguneqassanersoq naatsorsuusiorpoq.
Raajat uusut qalipaajakkallu Kalaallit Nunaanni raajaleriffinnit Tuluit Nunaannut tunineqartarput.
Toqqorsivimmit assi: Leiff Josefsen
Kommune Qeqertalimmi kommunalbestyrelsi pingaarutilimmik oqaluuserisassaqarluni immikkut ittumik ataatsimiippoq: Raajaleriffik matuneqaratarsinnaasoq.
Polar Seafoodip Aasianni raajaleriffimminik matusisariaqarnera kommunimut millionilikkaanik isertitaarutsitsillunilu aningaasartuuteqarnerulissitsissasoq naatsorsuutini Kommune Qeqertalimmi kommunalbestyrelsip immikkut ittumik ataatsimiinnerani saqqummiunneqartuni takuneqarsinnaavoq.
Toqqaannartumik sunniutaasussat
Matusinerup toqqaannartumik aningaasatigut kinguneri naatsorsuutigineqartut ukuupput:
- Suliffissarsiortut ikiorserneqartarnerat: 16 millionit koruunit
- Akileraartarnermit isertitat annaaneqartut: 3,4 millionit koruunit
- Katillugit 19,4 millionit koruunit
Misissueqqissaartarfilli naapertorlugu naatsorsuinerit ajornerungaartut erseqqissarneqarpoq.
- Tamannattaarli kommunimut sunniuteqassaaq, nalunaarusiami allassimavoq, makkualu eqqaaneqarput:
- Innuttaasut atuinissamut aningaasaateqarpiarunnaarput
- Najukkami aningaasarsiorneq appariaateqassaaq
- Suliffeqarfinnit akileraarutitigut isertitat suli apparnerusinnaapput
Siunissaq ungasinnerusoq eqqarsaatigalugu sunniutai
Aammattaaq suliffissuaq 116-inik sulisulik matuneqarpat, tamanna „suut tamarmik piffissaq ungasinnerusoq eqqarsaatigalugu kommunip aningaasaqarneranut ajortumik sunniuteqangaarsinnaammata“ nuttarnermik kinguneqarsinnaavoq.
Kommunalbestyrelsi kisitsisit taakku isumalluarnanngitsut eqqarsaatigalugit ajornartoornermi periusissiorpoq, taannalu imatut isikkoqarpoq:
Naalakkersuisut saaffigineqassapput (ataatsimiikkasuarneq nassuiaanerlu)
Naalakkersuisut Aasianni suliffissuarmut tunngatillugu (kingusinnerpaamik piffissami qaninnerusumi) ataatsimiikkasuaqqullugit qinnuiginissaat,
allakkatigut nassuiaammik piumasaqarsinnaaneq ukununnga tunngatillugu: A) Naalakkersuisut pissutsinik qanoq nalilersuinersut, B) iliuusissat aalajangersimasut (utaqqiisaasumik siunissarlu ungasinnerusoq eqqarsaatigalugu), C) piffissaliussat aalajangiiffigisassallu.
Politikerit isumaqatigiinniarsinnaasut
politikkikkut illuatungeriit peqataaffigisaannik isumaqatiginninniarnissamut suleqatigiissitaliortoqassaaq, tassani borgmesteri ilaasortaassallunilu naalakkersuisooqatigiit illuatungiliuttullu tamarmik immikkut ataatsimik sinniisoqassapput.
suleqatigiissitaq ima suliakkinneqarsinnaassaaq: (A) Naalakkersuisut soqutigisaqaqatigiillu attuumassuteqartut ataatsimeeqatigalugit, (B) paasissutissanik pisariaqartunik pissarsisoqarnissaa isumaqatigiinniarnernullu periarfissarsiortoqarnissaa, (C) kommunalbestyrelsimut allakkatigut nalunaaruteqartoqassaaq.
Kinguneri nalilersorneqarlutillu upalungaarsimanermut pilersaarusiorneq
allaffissornikkut suliassiissutinik ukuninnga suliaqartitsinissaq: A) kingunerisinnaasaanik nalilersuineq (aningaasaqarneq, suliffissaqartitsineq, akileraarutitigut isertitat, inunnut isumaginninnikkut sunniutit), B) ajortumik ineriartortoqassappat kommunip iliuuseqarfigisinnaasaanik upalungaarsimanissamut pilersaarusiaq (nutaamik sulilersitsisoqarnissaa, isumaginninnikkut iliuuseqarnissaq, suliffeqarfeqarnikkut/ilinniartitaanikkut suleqatigiinneq il.il.).
Paasissutissat saqqummiunneqartarnerat
isumaqatiginninniarnermi allaqatigiinnerit qanorlu ingerlasoqarnera kommunalbestyrelsimut malittarisassat atuuttut naapertorlugit paasissutissiissutigineqarlutillu nalunaarsorneqartarnissaat.
