Royal Arctic Line allannguinissamik pilersaaruteqanngitsoq

Royal Arctic Linep, RAL-ip, Avanersuarmut ukiumut naggataamik pajuttarnini allanngortissallugu pilersaaruteqanngilaq.

Avanersuarmi Pilersuisup pisiniarfiini nioqqutissaqarniarnikkut ajornartorsiuteqartarneq, tassa nioqqutissat ullussaminnik qaangiisarnerat aamma nunguttarnerat aaqqiiviginiarlugu, KNI A/S qanoq pitsanngorsaanissaminik pilersaaruteqarnersoq Sermitsiamiit allaaserinikuuarput.

Royal Arctic Linep ukiumut naggataarluni Avanersuarmut pajuttarnera kinguartinneqaraluarpat nioqqutissaqarniarnikkut pitsanngorsaataasinnaagaluartoq KNI A/S-miit oqaatigineqartut ilagaat.

- Isumaqarpugut umiarsuup kingulliup pajuttarnera kinguarpat nioqqutissat ullui qaangiussimanngitsut kiisalu upernarneranut ullui anngussinnaasut pigilissagigut, Juliane Henningsen Heilmann, KNI A/S-mi attaveqaqatigiinnermut pisortaq allakkatigut akissuteqarnikuuvoq.

Nunarput tamarmi eqqarsaatigineqartariaqartoq

Royal Arctic Linemiit nunarput tamakkerlugu sumiiffiit ukiut tamaasa tikinneqarnissaannut nalilersuinermi pilersaarusiornermilu pissutsit assigiinngitsut aallaavigineqartarput.

- Pilersaarusiornermi najugaqarfiit ataasiakkaat kisiisa eqqarsaatigineq ajorpagut, nunarpulli tamakkerlugu najugaqarfiit ukiortinnagu pilersorneqarnissaat eqqarsaatigineqartarluni, Ann-Britta A. Olsvig, RAL-imi
Attaveqatigiinnermut Nittarsaassinermullu aqutsisoq allappoq.

AAMMA ATUARUK

Avanersuarmut umiarsuaq pajuttoq kingusissukkut tikittalerpat nioqqutissaqarniarnikkut pitsanngorsaataassasoq

Nuna tamakkerlugu pilersuisussaatitaanermik pisussaaffeqarneq eqqarsaatigalugu sumiiffiit ataasiakkaat kisiisa isiginiarneqartanngitsut RAL ilisimatitsivoq.

- Royal Arctic Line nunatsinni illoqarfiit nunaqarfiillu tamaasa pilersussassullugit pisussaaffeqarpoq. Tamanna suliassatta pingaarnersaraat, Ann-Britta A. Olsvig allappoq. 

Pisussaaffik naammassiniarneqartartoq

Umiarsuit pajuttut ingerlaaginnaavissuusut, tassa umiarsuit sumiiffimmi ataatsimi naammassigunik sumiiffimmut allamut ingerlaqqinnissaat pilersaarutaareertartoq Royal Arctic Linep nassuiaatigaa.

- Umiarsuup pajuttup sumiiffimmi ataatsimi tikittarfia allanngortinneqaruni sumiiffimmi allami aamma allanngortinneqassaaq. Malik Arctica ukioq manna Qaanaamut nunaqarfiinullu pajoreeruni Ittoqqortoormiinut pajulluni ingerlaqqissaaq. Tamannalu aamma ukiup kingusippallaalinnginnerani angumeriniagassaavoq, Ann-Britta A. Olsvig allappoq.

Avannaani ukiut siuliini sikusarnerata allanngorarnera maluginiarneqarsimavoq, ukiorli manna immap qaqugukkut sikusinnaa oqaatigiuminaatsinneqarpoq.

- Ukiut kingulliit kingusissumi sikusimanera aallaavigalugu pilersaarusiorsinnaavugut, kisianni pilersuisussaatitaanitta aamma sillimanissamik piumaffigivaatigut. Kingusinnerusukkut tikinnissarput pilersaarusiorutsigu sikujaarpallu, pilersuisussaatitaanerput naammassisinnaanngilarput, Ann-Britta A. Olsvig allappoq.

- Sikujaarsimanera pissutigalugu najugaqarfiit ilaannut ukiumut peqqumaatissat apuutinngitsoorutsigit, tamatuma najugaqarfinni najugaqartunut eqquinerlorujussuarsinnaanera aamma eqqumaffigisarparput, Ann-Britta A. Olsvig naggasiivoq.