Avanersuarmut umiarsuaq pajuttoq kingusissukkut tikittalerpat nioqqutissaqarniarnikkut pitsanngorsaataassasoq

Upernaarmanna Sermitsiamit oqaluttuarivagut Siorapalummi nioqqutissat ullussaminnik qaangiisimasut Siorapaluup Pilersuisuani tuniniarneqarnerat aamma Qaanaami meeqqat immikkut pisariaqartitsisut immuttugassaarussimanerat aamma imigassat nungussimanerat.

KNI Pilersuisup pisiniarfiini, Soorlu Qaanaami nioqqutissat ullussaminnik qaangiisimasut sooq ilaatigut akikillilerneqartannginnersut aamma qanoq nioqqutissanik piniartoqartarnersoq nassuiaatigineqarpoq.

Umiarsuup pajuttaatip kingusinnerusukkut naggataamik pajulluni tikittaleraluarpat, Pilersuisup pisiniarfiini nioqqutissaateqarniarnikkut pitsanngorsaataassagaluartoq KNI A/S-mit oqaatigineqarpoq.

AAMMA ATUARUK

Siorapalummi nioqqutissat ullussaminnik qaangiussimasut tuniniarneqartut

Umiarsuaq pajuttoq kingulleq kinguartinneqarpat iluaqutaassasoq 

Ukiormanna RAL-ip umiarsuit angalanissaasa pilersaarutigaa umiarsuaq Malik Arctica septemberip pingajuani Qaanaamut kingullermik tikissasoq. Sikusarnerata kinguariartuinnarnerata malitsigisaanik RAL-ip Avanersuarmut kingullermik angalasalissagaluarpat, nioqqutissanik pilersuinermik pitsanngoriaateqartitsisinnaasorineqarpoq.

- Isumaqarpugut umiarsuup kingulliup pajuttarnera kinguarpat nioqqutissat ullui qaangiussimanngitsut kiisalu upernarneranut ullui anngussinnaasut pigilissagigut, Juliane Henningsen Heilmann, KNI A/S-mi attaveqaqatigiinnermut pisortaq allappoq.

Ukiormanna RAL-ip umiarsuup pajuttaatip Avanersuarmut angalatinneqarnissaa kinguartinneqaraluarpat, aappaagu nioqqutissaqarniarnikkut sunniuteqarnavianngilaq.

- KNI-milu siusinaarluta paasisimanngikkutsigu taava periarfissaqanngilagut umiarsuakkut tikittussanik nioqqutissanik inniminniinissamut angumersinissatsinnullu, Juliane Henningsen Heilman allappoq.  

Kingusissukkut sikusalersimanera tunngavigalugu, RAL-ip umiarsuaa pajuttaat kingusinnerusukkut Avanersuarmut tikittalissanersoq, RAL-ip nammineerluni aalajangigassaraa.

- Oqaatigissavarput tamanna pillugu RAL ataavartumik oqaloqatigisaratsigu, Juliane Henningsen Heilman oqarpoq.

Nioqqutissanik ullussaminnik qaangiisarnerat

Pilersuisup qullersaqarfiani Sisimiuniittumi kiffartuussivimmi sulisut marluk Qaanaaliartinneqartarput, taamatuttaarlu Avanersuarmi nunaqarfinni niuertut Qaanaaliartinneqartarlutik, nioqqutissanik inniminniiartorlutik.

- Ukiumut peqqumaatissanik inniminniineq pisarpoq qullersaqarfimmiit Qaanaamut tikittut kiisalu Qaanaami aqutsisut qanimut suleqatigiinnerisigut, Juliane Henningsen Heilmann allappoq.

Pilersuisoqarfiit sikusartumiittunut nioqqutissat ullugissaarnerpaat tikisinneqartarnissaat anguniarneqartoq Pilersuisup qullersaqarfianit ilisimatitsissutigineqartarpoq.

AAMMA ATUARUK

Qaanaami imigassat kimittuut akisuunngorlugit tuniniarneqartut

- Kisiannili ajoraluartumik avaqqunneqarsinnaanngilaq ilaatigut nioqqutissat ullui qaangiuttarneri,  kisianni soorunami tamanna minneerpaaffianiitinniarsarisarparput, Juliane Henningsen Heilmann ilisimatitsivoq.

Pilersuisumiillu ilanngullugu ilisimatitsissutigineqarpoq nioqqutissanik inniminneeriaaseq peqqissaartumik ingerlateqqinneqassasoq, qulakkeerumallugu ilumut nioqqutissat inniminnerneqartut tamarmik tikittarnissaat.

Nioqqutissat ullussaminnik qaangiisut tuniniarsinnaanerinut akuersissutaateqarneq tunngavigalugu Pilersuisoq pisinnaatitaaffeqarpoq nioqqutissat akikillinngikkaluarlugit, sinaakkusiussat iluani tuniarsinnaallugit.

- Kisianni soorunami niuertup nammineq takusinnaaguniuk immikkut akuersissuteqarfiup qaangiunneqarani nioqqutissanik sinneqartoortussanngorluni taava nioqqutissat akikillineqarsinnaapput, Juliane Henningsen Heilmann allappoq.

RAL Avanersuarmut umiarsuaatai kingusinnerusukkut tikittalernissaannut qanoq pilersaaruteqarnersoq oqaaseqartinniarlugu aaqqissuisoqarfimmiit sulissutigaarput.