Sisimiuni vandrehjemi nutaamik piginnittortaartoq
Sisimiuni vandrehjemimik piginnittunngortut ukioq kaajallallugu nutaaliaasumik aalaakkaasumillu ingerlatsinissartik naatsorsuutigaat.
Kûnguak Café Sisimiuni vandrehjemimut aasaanerani ukiuuneranilu unnuiartorumaartussat nunanit tamalaaneersunit qilanaaraat.
Assi: Tôrtia Reimer-Johansen
Kûnguak Café Sisimiuni Vandrehjemimik alliliillunilu piginnittunngorpoq. Taseralimmi kulturip illorsuani café-qareerlutillu ataatsimeersuartarfiullunilu kateriffiusartumi ingerlatsisooreerput, illoqarfimmilu vandrehjemimut aningaasaliineq alloriarnertut pissusissamisoortutut isigaat.
Taama Kûnguak Café tusagassiuutitigut nalunaarummi allappoq.
- Piginnittunngortutut ukioq kaajallallugu nutaaliaasumik aalaakkaasumillu ingerlatsinissaq, aamma malunnaatilimmik pitsaassutsimik qaffassissumik, kissaatigaarput – innuttaasunut, ilinniartunut, inuussutissarsiortunut aamma takornariarpassuarnut ukiut tamaasa Sisimiunut tikeraartartunut iluaqutaasumik, Kûnguak Café-mik piginnittoq Martin Heilmann Kristensen allappoq.
Aasaanerani ukiuuneranilu nunanit tamalaaneersuniit tikittussat tikilluaqqunissaannut qilanaarput, allapput.
Kûnguak Café aamma Qaqortumiippoq, tassanilu aamma alliliillutik hotelimik nutaamik pilersitsinissaq sulissutigineqarpoq.
Qaqortumi mittarfik nutaaq apriilimi ammarneqassaaq, tassungalu atatillugu unnuiffissaaleqinissaq ilimanaateqalerluni. Innovation South Greenlandimiit misissuineq qaammammi matumani saqqummertoq taama allaaserineqarpoq.
- Kujataa nunarsuup sinneranut ammarnissaanut nunallu tamarmiusup periarfissaanik tamakkiisumik atorluaanissamut akunnittarfiit naammattut pisariaqarput, Martin Heilmann Kristensen allappoq.
