Tusassip Kuummiini kukkuneq naammaginanngitsumillu attaveqarsimaneq nassuerutigai
Kuummiini innuttaasunik kiffartuussivik qaammatini marlunngulersuni internetimut attaveqanngilaq. Tusass neriorsuivoq ajornartorsiut aaqqiivigineqassasoq.
- Nassuerutigissavarput tamanna siusinnerusukkut aaqqinneqarsinnaasimagaluartoq, tamannalu pissutigalugu innuttaasunut sulisunullu ajoqusiisimanerput utoqqatsissutigaarput, Jonas Hasselriis, Tusassimi pisortaanerugallartoq oqarpoq.
Foto: Tusass
Sapaatip akunneri arfineq marluk matuma siorna Tunumi Kuummiit
innaallagiaaruppoq. Taamanili innuttaasunik sullissivik
internetimut attaveqanngilaq, taamaattumillu suliat nalinginnaasumit
sivisunerusumik suliarineqartarput.
Tusass naapertorlugu suliamut tunngatillugu naammaginanngitsumik attaveqatigiittoqarsimavoq kukkusoqartarlunilu, taamaattoqarneralu pisariaqanngitsumik suliamik sivitsortitsisuuvoq.
Kuummiini kommunip allaffiani atuarfimmilu attaveqaatit sivitsortumik ajornartorsiutaanerat ajuusaarutigaat.
Innaallagiaarutereernerup kingorna atortorissaarutit nutaat kommunip
allaffianut nassiunneqarput, ajornartorsiulli aaqqinneqanngilaq
paatsuuinerit malinnaatitsinerillu naammaginanngitsut pissutigalugit.
Kingusinnerusukkut paasineqarpoq atuarfiup kommunillu allaffiata
attaveqaataat kukkusumik aaqqinneqarsimasut taamaasillunilu
atuarfimmut attaveqaatit akornuserneqarsimallutik. Taamaattumillu
ajornartorsiut kingusinnerusukkut aatsaat paasineqarpoq, kukkuneq
immikkut nalunaarsorneqarsimanngimmat.
Ajornartorsiut nassuerutigineqartoq
Kommuneqarfik Sermersuumi Siumup sapaatip akunnerani matumani siusinnerusukkut Tusassip internetimut tunngatillugu ajornartorsiutinut qisuariarnissaminut kingusinaarnera isornartorsiorpaa. Tusassilu isumaqataavoq:
- Nassuerutigissavarput tamanna siusinnerusukkut aaqqinneqarsinnaasimagaluartoq, tamannalu pissutigalugu innuttaasunut sulisunullu ajoqusiisimanerput utoqqatsissutigaarput. Satellittimik attaveqaatit periusitsinni pingaartitaraagut, taakkunanilu atuisartunut pitsaanerusumik atuinissamut kiffartuussinissamullu ilungersorluta suliniuteqarpugut, Jonas Hasselriis, Tusassimi pisortaanerugallartoq oqarpoq.
Teknikerit Kuummiinut ornigunnissaminnut piareeqqagaluarput, silali pissutigalugu ornigunnissartik ullumimut sisamanngornermut kinguartissimavaat.
- Ingerlatsinitsinni pisut misissoqqissaassavagut, suleriusitsinnilu ilinniarfigissallutigit, Jonas Hasselriis oqarpoq
