Sapaatit-akunneri arfineq-marluk attaveqaateqanngitsut: Kuummiini sullissineq sivisunerusoq
Kuummiit sarfaarutereernerata kingorna sapaatit akunneri arfineq-marluk qaangiuttut Tusassimit ikiorneqarsimannginneq Siumup isornartorsiorpaa.
Kuummiini sapaatit akunneri arfineq-marluk matuma siorna sarfaaruttoqarmat innuttaasunik sullissivik internetimut attaveeruppoq. (Toqqorsivimmit assi)
Assi: Morten Rasmussen/Biofoto/Ritzau Scanpix
Tunumi Kuummiini innuttaasunik sullissivik sapaatip-akunnerini arlalinni internetimut attaveqanngilaq, taamaammallu kommunimi kiffartuussineq kinguaattooqqavoq.
Kommuneqarfik Sermersooq tusagassiutitigut nalunaarummi taama allappoq.
Ajornartorsiut Kuummiit sapaatit-akunneri arfineq-marluk matuma siorna sarfaarunneranit aallaaveqarpoq, taamaammallu suliassat suliarineqartarnerat sivisuneruvoq.
Kommunimi IT-lerisut Tusass attaveqarfigaat, Tusassip ajornartorsiut aaqqinniarlugu maanna ulappussutigaat. Silali peqqutaalluni teknikerimik tikisitsiniaaneq ajornarsimavoq.
Tusassili ajornartorsiut qanittukkut aaqqinneqarumaartoq ilimagaa.
Pissutsit ilungersunartut
Tamannali naammanngilaq, Kommuneqarfik Sermersuumi Siumut isumaqarpoq.
Tusassip ajornartorsiummik aaqqiiniarlutik aallartitsisimannginnera pissutigalugu suliamik arriippallaamik suliarinnittoqarnera isornartorsiorpaat.
Siumut tusagassiutitigut nalunaarummi taama allappoq.
- Pissutsit ilungersunarluinnarput. Suliffeqarfittut kiffartuussisussaasutut sulinissaq innuttaasuniit
naatsorsuutaavoq. Attaveqaatilli iluarsineqanngippata aaqqiisoqarsinnaanngilaq.
- Unittoorneq annertooq pivoq. Aqqutit tamaasa atorlugit saaffiginninnerpassuit pigaluarput ajoraluartumik kiffartuussisussaagaluit ilaat naqisimanninnermik pissaanermik atorlutik nipangersaapput. Tamanna assut quarsaarnarpoq, Siumut allappoq.
Ajornartorsiut piaartumik aaqqinneqartariaqarsoraat.
Tusassimit oqaaseqartoqarnissaa Sermitsiami sulissutigineqarpoq, taakkuli suliaq pillugu suli oqaaseqarsinnaanngillat.
