Anini malikkaa

Qaqqanit avatangerneqarsimavoq.

Paarnaqutisunnippoq. Tuullik qaqqat akornanni qarlorpaluppoq. Pinngortitarsuaq nipaangaarami quqianngunartutut misinnarmat nipi qaqqat akornanni akisuavoq.

Amerallip qinnguani Kilaarsarfimmiippugut.

Enos 15-inik ukiulik siuttuuvoq.

Sukkallunilu timikkut nukittuvoq. Nuna tamaat isigiuarpaa, suullu aalasut tamaasa maluginiartarpai. Ilisarnaatit tamaasa nalunagillu suna ujassanerlugu nalunngilaa.

15-iinnarnik ukioqarpoq, misilittagaqarluartutulli inissereersimavoq.

Ukioq manna arlalinnik tuttussimavoq.

Allat malinnaapput. Taakku ilagaat Lea 14-inik ukiulik, Enosip najaa. Marluullutik Nuummi meeqqat angerlarsimaffianni “Tupaarnami” najugaqarput, aasallu tamaasa Kilaarsarfimmut angalasaramik qaammatini arlalinni pinngortitamut qanittumi najugaqarlutillu aavarneq ilinniartarpaat.

Leap Kilaarsarfimmi qaqqat aamma ilisimalluarpai. Mikigallaramili aasat tamaasa tamaaniittapoq, ukioq mannalu allanngortoqarpoq. Nammineerluni tuttumik perngarpoq.

- Nuan! Nuannaaqaanga. Ikaninnguaq aallaavara, oqaluttuarpoq qaqqamullu tammaarfiup illuatungaaniittumut tikkuussilluni.

Tupeqarfiit tamarmik imminnut qanittuararsuupput. Soorlu tassa qaqqat akornanni nunaqarfeeqqamiiginnarluni. Maani eqqiluillunilu nuannerpoq, toqqit siniffissat tuperlu annerumaaq ataatsimoorfik ullormut nerisassiorfiullunilu neriffiusartoq.

Aallannginnerminni

Aqaguani qaqqamut majuarput, aavarnerli sioqquterujussuarlugu aallartippoq.

Unnukkorsioreeramik Enosip Leallu pigisatik piareersarpaat. Ullaakkut uippakajaartoqaqqunagu suut tamarmik piareersimassapput.

Oqaluuseringaartariaqanngilaat. Enosip Leallu suut nassasanerlugit nalunngilaat. Tamulugassat, allunaasaq, savik qinngutillu. Qaqqaliarneq imaannaanngissinnaasoq nalunnginnamikku atisassatik sila qanoq innersoq apeqqutaatillugu toqqarumaarpaat

Suut tamarmik unnukkut piareerneqarput. Tamanna marluullutik ileqquliutereersimavaat.

Nalunaaqutaq ullaakkut tallimanut qiteqquttoq itersaat sianerpoq. Ullaaralaavoq, tamannali Enosip Leallu sungiusimavaat. Sila suli nillerpoq.

Maanna pisullutik aallartussanngorput. Qaqqaq seqinermit kissanneqaraangat tuttut angalaarunnaamisarput. Nipaatsumik ullaakkorsiortarput. Isit iterianngulaarput, ullorli nalliuttussaq qilanaarineqarluinnarpoq.

Enosi ippassaq sivisuumik pisussimagami qasugaluarpoq, kisianni ajunngilaq. Issingiassat immullit iffiarlu immussualik eqeersaatigissaqqaarpai.

Aallaramik siulersortaavoq.

Uumasoq takuguniuk oqaaseqarnavianngilaq. Talini kivillugu aalatissavaa.

Ataasiarluni aalatippagu uumasoq ataaseq. Marloriarluni aalatippagu uumasut marluk.

Leap suut nakkutigissallugit nalunngilaa, taamaammallu anininakkutigiitigalugu nammineq qaqqat nakkutigai.

Anori maluginiarpaa.

- Immaqa uumasup naamasinnaavaatigut, taanna oqarpoq.

Ingerlaqqipput.

Enos qaqqaq nakkutigissallugu inersimasunit ukiut ingerlaneranni aavaqatigisarsimasaminit ilikkarsimavaa. Maanna Lea taassuma tunuani pisullunilu ilinniarpoq. Aalaneri, sukkassusaa takusaqaraangamilu unittariaasia nakkutigaa.

Tamanna imminnut nassuiaatigisariaqanngilaat. 

Eqqarsaatit imaarneqartartut

Leap anini qummut isigaa, taannali maanna malinnaaginnanngilaq. Nammineq sunniuteqalersimavoq.

Lea sisamanik ukioqarluni siullermeerluni Kilaarsarfimmiippoq. Ukiut ingerlaneranni pinngortitaq ilisarisimanerulerlugulu akisussaaffeqarnerulerpoq.

Lealli Kilaarsarfik meeraanerminisulli suli nuannaraa. Pinngortitami pisuttuarneq nuannaraa.

Qaqqakkut kisimiilluni pisukkaangami eqqarsaatai eqqissisimalertarput.

- Pisuttarneq maani nuannarinerpaavara. Pisukkaangama eqqarsaatikka soorlu imaaruttut, taanna oqaluttuarpoq.

Lealli Enosi ingerlaqatigigaangamiuk nipaanneq allaanerusarpoq.

Leap anini nakkutigisarpaa. Aalanera isigisailu qaqqami ujaasiuartut.

Tassanngaannaq unipput.

Qaqqap qaani arlaannik aalasoqarpoq. Terianniaava? Imaluunniit tuttuua? Lea qaqqamut qiviarpoq.

- Terianniaq taama angitigisinnaanngilaq, taanna eqqarsarpoq.

Taava takuaat. Tuttut sisamat, immaqa tallimat, qaqqakkut sivingasukkut arriitsumik ammukartut. Lea nunamut nallarpoq. Uneqqissaarluni. Arlaannaasaluunniit takussanngilaat. Nipiliuallappat. Aalaallappat. Sunaluunniit malugeratarsinnaavaat.

Tuttut ammukaaminerupput. Enosip aallaasini tiguaa. Lea aqqaamavoq.

Bang.

Lea tupalluni qisuariarpoq. Tuttu uppippoq. Leap anini qiviarpaa. Qalluni arlaleriarluni kivittarpai, qungujorujussuarporlu. Tulluusimaarpoq.

Anaanamut neqi

Kingorna aattuilerput. Sanileriillutik ikioqatigiipput. Enos aattuisoq Lea ikiuuppoq, ilaannikkullu imminnut qiviartarput. Imminnut uumigisinnaasarput. Qatanngutigiippummi. Imminnulli uumiginerat sivisuneq ajorpoq.

Aattueqqipput.

Kiagullutik, anersaaruluttarlutik qungujuttarlutillu suliaq naammassivaat. Tuttu Enosip pisaa anaanaannut tunniunneqassaaq. Qaqqap qaani aallaaneraniit suliap naammassinissaanut suleqatigiissutigisimasaat.

Leap anini suli malersorpaa. Tunuaniikkunnaarsimavorli. Sanianiippoq.

Qaqqatigut kilometererpassuit pisoqatigiissimapput. Enos siulliusoq Lea tunuaniilluni. Ania tuttunik nasittoq. Najaata anini isigigaa.

Allanngortoqarporli. Lea ukiut qulit matuma siorna niviarsiarannguuvoq inersimasunik malinnittoq. Ullumikkut nammineq aqqutini ujartuutigalugit anini malippaa.

Tuttumik. pernarsimavoq. Anori malugisarpaa. Qaqqat nalunngilai. Sumilu eqqissisimaarfissarsisinnaanerluni nalunnngilaa.

Enosi siuttuuvoq. Lea tunuaniippoq. Immaqa ullut ilaanni nammineq malitseqalerumaarpoq.