Kalaallit nipilersortartut Nanook angalangajalerput:
Nipilersortartut Japanimut angalassapput, tassanilu kulturit assigiinngitsut marluk naapissapput nipilersornikkut, oqaluttuarinikkut ataqqeqatigiinnikkullu.
Kalaallit nipilersortartut Nanook angalangajalerput:
Nipilersortartut Japanimut angalassapput, tassanilu kulturit assigiinngitsut marluk naapissapput nipilersornikkut, oqaluttuarinikkut ataqqeqatigiinnikkullu.
Nanook taama nalunaaruteqarluni allappoq.
Tusarnaartitsisoqassaaq kiisalu radioqarfiit atuarfiillu pulaarneqassallutik. Nanook nipilersukkanik tusarnaartitsissaaq Kalaallit Nunaallu pillugu oqaluttuanik oqaluttuassallutik. Japanimi kalaallit nipilersoqatigiit soqutigineqarluarput, aammali kalaallit kulturiat, inuit pinngortitarlu soqutigineqartut nipilersoqatigiit ilisimalluarpaat.
- Nanookimi nunatta kusanartup kulturerpullu nittarsaannissaa pingaartipparput. Tamanna uagutsinnut pingaaruteqartuaannarsimavoq. Tulluusimaarutigaarpullu nunat tamalaani kalaallisut oqaatsigut atorlugit erinarsorsinnaagatta, Frederik Elsner oqarpoq.
Tamatigut kalaallisut erinarsuutit
Nanook Tokyomi Japanimiittumi februaarip 25-ani 26-anilu 2026-mi tusarnaartitsissapput.
- Japanimi kalaallisut erinarsornissaq Nanookimut anguniagaavoq immikkuullarissoq. Kalaallisullu erinarsoraangatta ammasumik ataqqinnittumillu tusarnaartutsinnit naapinneqartarpugut.
- Kalaallit Nunaanni inunnik kulturimillu ataqqinnittut misigisarparput, tamannalu angalanitsinnut suli siunertaqarnerulersitseqataavoq, Frederik Elsner oqarpoq.
Frederik Elsner oqarpoq Nanookimi peqataasut Japanimut angalanissamut qilanaartut, tusarnaartitsinissallu nipilersornerup silarsuarni naapiffittut atorneqassasut.
Nanook Danmarkimi tusarnaartitsiartorlutik angalaqqammerput, ulluni aqqaneq-marlunni 16-eriarlutik tusarnaartitsisimallutik. Nanook Japanimi 2015-imi aamma tusarnaartitsivoq.
