Nahome Kreutzmann Pedersen, erinarsortartoq pikkorissoq, Kommuneqarfik Sermersuup Nuummi kulturip illorsuani Katuami sapaammi nuannisaqatigiisitsinerani qasukkaamititsivoq.
Paarlersuaq issiavilersorneqarsimavoq, sukkulaa- drømmekaagit, kaffi, tii imerlu sassaalliutigineqarput. Kulturikkut illorsuarmi ini minneq meeqqanut aamma pinnguartarfinngorneqarsimavoq.
Nahome Kreutzmann Pedersen, erinarsortartoq pikkorissoq, Kommuneqarfik Sermersuup Nuummi kulturip illorsuani Katuami sapaammi nuannisaqatigiisitsinerani qasukkaamititsivoq.
Paarlersuaq issiavilersorneqarsimavoq, sukkulaa- drømmekaagit, kaffi, tii imerlu sassaalliutigineqarput. Kulturikkut illorsuarmi ini minneq meeqqanut aamma pinnguartarfinngorneqarsimavoq.
Borgmesterip Avaaraq Olsenip ataatsimoornissaq pisariaqartinneqarmat aaqqissuussineq piffissaq kingulleq atorlugu piareersarneqartoq aallarniutitut oqaatigaa. Naatsumik kalaallisut qallunaatullu tikilluaqqusivoq, tassanilu meeqqat, inuusuttut utoqqaallu piffissami matumani eqqaamaneqarnissaat kajumissaarutigalugu, naggataatigulli nunani allani tusagassiortut saaffigalugit:
Kommuneqarfik Sermersuup kulturikkut illorsuarmi Katuami aaqqissuussaa piffissaq kingulleq atorlugu aaqqissuunneqaraluartoq iluatsilluarpoq.
Assi: Jette Andersen
- Tamaaniinnissassinnut tikilluaqqusaavusi, qinnuigissavassilu ullumikkut Nuummiunut ungasillisimaalaarnissassinnut. Qasuvugut ullorlu nuannersumik atorusupparput.
Aaqqissuussaq nalunaaqutaq marluniit sisamap tungaanut ingerlanneqarpoq, tikilluaqqusinerullu kingorna guitarertartoq John Hansen nuttugiartartoq Glenn Mølleri scenemut qaqipput. Taakku “Nuna asiilasoq” erinarsoqatigiissutigineqarnera siulersorpaat. Pisoq pingaartorsiutigineqarluni tusarnaartut nikuipput.
John Glennilu ersaattaanneqareermata Piitannguaq Alaufesen, nuannarilluarneqaqisoq iserpoq. Anersaarulussimasunullu nukissaqalersitsisutullusooq ippoq. Qiimmallannarpoq nuannerlunilu – ilaannikkullu quianarluinnartarluni. Soorlu quiasaarineq taamaattussaasoq.
Taava Ivaana tullinnguuppoq. Akunnattumik, nukittuumik misigissuseqartumillu tusarnaartitsivoq. Issiavimmi portusuumi guitarerpoq, ukulelelu atorlugu naggasiilluni.
- Erinarsuut nalunngikkussiuk erinarsoqataaniaaritsi, oqarpoq, piffissamilu eqqissiviilliorfiusumi nipilersuutit eqqissisaatigisarlugit, aamma eqqarsaatinik misigissutsinillu inissaqartinnissani pingaartittarlugu, oqarpoq.
Taava Nahome Hans Jukku Noahsenilu tullinnguupput, erinarsuutillu kingulliit ilaanni Glenn nuttugialerluni ilannguppoq.
Piitannguaq Alaufesen illartitsilluinnarpoq.
Assi: Jette Andersen
Isiginnaartut issiavimmi qitittarlutillu nipituallaanngikkaluamik erinarsoqataasarput. Ukiut marluk matuma siornatigut saqqummersitseqqaarami atukkani aamma erinarsuutit allat nuannarineqarluartut eqqarsaatigilluarlugit toqqarsimagai malunnarpoq.
Aaqqissuussaq tamaat eqqarsaatigalugu ualeq nuannersumik ingerlanneqarpoq. Nunarsuarmi eqqissiviilliorfiusumi akunnerit marluk ingerlaneri soorlulusooq ullunit nalinginnaanerulaalersitsisut.
