Nunatta Eqqumiitsulianik Saqqummersitsivianik suliniummut pisortaq siulleq
Nivi Christensen Nuummi Eqqumiitsulianik Saqqummersitsivimmi 2015-imiilli pisortaavoq. Maanna Nunatta Eqqumiitsulianik Saqqummersitsivissaanik pilersitsinermi siuttuulissaaq.
- Suliniut upperilluinnarlugu, misilittagaqarluarlunga attaveqaaterpassuaqarlungalu aallartissavara. Taamaammat siulersuisut takorluukkaminnik sivisuumik sukataaruteqarsimasut uannut tatiginninnerat nuannaarutigisorujussuuara, Nivi Christensen oqarpoq.
Assi: Nunatta Eqqumiitsulianik Saqqummersitsivia.
Nivi Christensen Nunatta Eqqumiitsulianik Saqqummersitsivissaani suliniummi pisortatut decembarip aallaqqaataani aallartissaaq. Nuna tamakkerlugu eqqumiitsulianik saqqummersitsivissap piviusunngortinneqarnissaanut pingaarutilimmik alloriarneruvoq.
Nunatta Eqqumiitsulianik Saqqummersitsivia tusagassiuutitigut nalunaarummi allappoq.
Nivi Christensen Nuummi Eqqumiitsulianik Saqqummersitsivimmi pisortaavoq, 2015-imiillu katersugaasiviup illoqarfimmilu eqqumiitsuliortut ineriartortinneqarneranni siuttuulluni.
- Nuummi Eqqumiitsulianik Saqqummersitsivimmi sulinera nuannareqaara, maannali alloriarneq tulliuttoq pissusissamisoorluinnarlunilu eqqortutut misinnarpoq. Nunatta Eqqumiitsulianik Saqqummersitsivissaata pilersinnissaanut suleqataanissara qilanaaraara.
- Suliniut upperilluinnarlugu, misilittagaqarluarlunga attaveqaaterpassuaqarlungalu aallartissavara. Taamaammat siulersuisut takorluukkaminnik sivisuumik sukataaruteqarsimasut uannut tatiginninnerat nuannaarutigisorujussuuara, Nivi Christensen oqarpoq.
Siulersuisuni siulittaasoq nutaaq
Nunatta Eqqumiitsulianik Saqqummersitsiviata pilersinnissaanut Aningaasaateqarfiup siulersuisuisa atorfinitsitsineq suliniutip ingerlateqqinnissaanut isumalluarfigingaarpaat.
- Atorfinitsitsinikkut Nunatta Eqqumiitsulianik Saqqummersitsiviata pilersinnissaa qaninnerulerparput. Nivi Christensenip atorfinitsinneqarnera nuannaarutigaara, isumaqarpungalu taanna siulersuisut peqatigalugit nuna tamakkerlugu eqqumiitsulianik saqqummersitsivimmik takorluukkamik piviusunngortitseqataanissamut tulluartuusoq, siulersuisuni siulittaasoq Kristine Spore Kreutzmann oqarpoq.
Taassuma ukiut 20-t sinnerlugit kajumissutsiminik sulinikkut aningaasarsiaqarani nunatta eqqumiitsulianik katersugaasiviattaarnissaanik takorluukkamik aallussisoq Josef Motzfeldt taarserpaa.
Nivi Christensenip atorfinitsinneqarnera Namminersorlutik Oqartussat Kommuneqarfik Sermersuullu aningaasaliissuteqarneratigut piviusunngorpoq. Suliniut maannamut kajumissutsiminnik suleqataasunit ingerlanneqarpoq.
Eqqumiitsuliortut assigiinngitsut nuna tamakkerlugu eqqumiitsulianik saqqummersitsivimmik pilersitsinissaq 2004-miilli suliniutigaat.
