MEEQQAT ULLUAT 2026

Sinerissami meeqqat assigiinngitsunik saammisaqartinneqassapput

Pisarnertut meeqqat ulluat sumiiffinni arlalinni malunnartinniarneqarpoq. Sumiiffinni assigiinngitsuni pilersaarutit pillugit ataani atuarsinnaavutit.

Meeqqat ulluanni Color Run-imik (Qalipaatit arpanneq, aaqq.) taallugu meeqqat arpatsinneqartarput. Assimi takuneqarsinnaavoq Nuummiuaqqat 2024-mi meeqqat ulluannut atatillugu arpallutik aallalersut.

Assi: Leiff Josefsen

Masauna Peary Masauna Peary Journalist

Saqqummersinneqarpoq 1. Juuni 2026 - 16:31

Annonse

Meeqqat ulluannut atatillugu Uummannami, Sisimiuni, Qaqortumi Narsamilu aaqqissuussat assigiinngitsut ingerlanneqarput.

Uummannami pisussat:

Color run ingerlanneqassaaq. Nalunaaqutarlu pingasuniit Uummannap timersortarfiani oqalugiarnerit, kiinnamik qalipaanerit, titartaatitsinerit, pissittaarfissuarmi pissittaartitsineq tranpolinartitsinerillu ilaatigut ingerlanneqassapput, Avannaata kommunia facebookkimi quppernermini allappoq.

Kiinnanut qalipaatitsineq meeqqat ulluanni nuannarineqarluartarpoq.

Uummannami nalunaaqutaq arfinerniit arfineq marluk tungaanut timersortarfimmi nipilersoqatigiit ”Jonas Meeqqallu” meeqqanut tusarnaartitsissapput, Avannaata kommunia allappoq.

Sisimiuni pisussat

AAMMA ATUARUK

Meeqqat tusaaniarneqartarnissaat Naalakkersuisut meeqqat ulluanni oqariartuutigaat

Orpiup inissisimaviani nalunaaqutaq tallimaniit arfineq marluk tungaanut, nipilersortoqassasoq, grillerisoqassasoq, pissittaarfissuarmi pissittaartoqassasoq, kiinnamik qalipaatitsisoqassasoq arpatsitsisoqassasorlu, Qeqqata kommunia facebookkimi quppernermini allappoq.

Kamma bamsi meeqqat ulluanni naapinneqarsinnaasunut ilaasarpoq. Uani assimi Kamma bamsi katuami meeqqat ulluanni meeqqanik ilassiuisoq takuneqarsinnaavoq.

Qaqortumi pisoq

Qaqortumi meeqqat naatsiivissaat nalunaaqutaq ataatsimut illup B 5-ip eqqaani ammarneqassasoq, Kommune Kujalleq facebookkimi quppernernimi allappoq.

Narsami ullorsiortitsereersut

Narsami meeqqat ulluat nalliussineqareersimavoq. Tassami Juuna & Co aamma Uju & co. sapaatiummat tusarnaartitsipput. Anders And Andersiinalu naapinneqarlutik, kiisalu kiinnakkut qalipatsittoqarluni. Meeqqat lagkagetortinneqartut, naatitartortinneqarlutik imeruersaatitortinneqarlutillu, Kommune Kujalleq allappoq.