Nunap assinga nutaaq Kalaallit Nunaanni Danmarkimilu nunap sajunneranik paasisaqarfiusinnaasoq
GEUS-ip nittartagartaavani Kalaallit Nunaanni nunap sajunneri malinnaaffigisinnaavatit.
Nunap assingi toorlugit takusinnaavatit sumiiffinni aalajangersimasuni nunap sajunneri qanoq annertutiginersut qassiusimanersullu.
Foto: GEUS
Kalaallit Nunaanni Danmarkimilu nunap sajunneri qassiunersut paaserusussinnaaviuk?
GEUS-ip nittartaagaani paasiniaaffiusinnaasoq immaqa taava ilinnut soqutiginarpoq. Nunap sajunneri pillugit paasissutissanut tunngasut nutaat marluk, nunap
sajuttarnerinik paasissutissanik amerlanerusunik maanna
pissarsiffiusinnaalerput.
Taama GEUS tusagassiuutitigut nalunaarummi allappoq
Danmarkimi nunap sajunneri ikittuinnaat malugineqarsinnaasarput, Kalaallit Nunaannili nunap sajunneri sakkortunerusut malugineqarsinnaallutik.
Nittartakkani Danmarkimi Kalaallit Nunaannilu nunap sajunnerinut takusassiani, piffissami pisoqarfioqqammersumi nalunaarsukkat ingerlaannaq takuneqasinnaapput.
Tass GEUS-ip nunap sajunneranut nalunaarsugai malinnaavigineqarsinnaalerlutik.
Nunap sajunneranik ilisimatuut uuttortaanerit pitsaassusiat qulakkeertarpaat, taamaalilluni nunap sajunneraneersuunngitsut — soorlu sakkutuut qaartartumeerinerat imaluunniit inuit pilersitaat allat — nalunaarsorneqannginniassammata misissueqqissaarneq ingerlattarpaat.
Nunap sajunneri amerlanerujussuit maanna malugineqarsinnaapput
Misissuinerit nutaat naammassineqaraangata piffissaq, nunap sajunnerata qiterpiaa sajuppillannerullu sakkortussusia allanngortinneqartarput.
Danmarkip Kalaallit Nunaatalu nunat eqqaaniittut, nunap sajunneranit paasissutissat aamma nittartakkatigut nalunaarsorneqartarput. Tassa nunap assingini takuneqarsinnaapput, taakkuli misissoqqissaarneqarneq ajorlutik. Taamaammat ilumut nunap sajunneraneersuunersut qulakkeerneqarneq ajorput.
Aammattaaq nunap sajunnerata nalunaarsukkat qanga aallartinnikuunerat maluginiassallugu pingaaruteqarpoq. Danmarkimi 1938-mi nunap sajunneri malinnaaffigineqalerput, Nunatsinnilu nunap sajunnerisa nalunaarsornerat 1969-imiit aallartillutik.
Nunap sajunneri siornatigornit amerlanerujussuit nalunaarsorneqartalernikuupput, tamannali siornatigut nunap sajuttarnerisa ikinnerunerannik pissuteqanngilaq, kisianni nunani taakkunani marlunni atortut uuttuinerillu ukiuni hunnorujulinni kingullerni pitsanngoriarujussuarsimanerannik pissuteqarluni.
Nunatsinni nunap sajunneri nittartakkatigut ugguuna malinnaavigisinnaavatit.
