Arctic Winter Games unamminerinnaanngilaq

Timersortartut 59-it Erfalasorput tuermioralugu Canadami White Horsemi Arctic Winter Games 2026-mi Kalaallit Nunaat sinnerlugu peqataassapput.

Ataasinngornermi unamminerit aallartinnginneranni sapaammi marsip arfineq-pingajuanni ammaanersiussapput.

Issittumi nunap inoqqaavi sapaatip-akunnerata tulliani timersussallutik ataatsimoortussaagaluartut AWG-mi ajugaanissaq kisimi pineqanngilaq.

- Kulturisiornerujussuuvoq, soorunalimi aamma timersornermut attuumassuteqarpoq, kulturikkulli attuumassuteqangaartoq oqaatigerusuppara.

Kalaallit Nunaanni Timersoqatigiit Kattuffianni peqqissutsimut pisortaq Aviaaja Geisler oqarpoq. Sungiusaasut, aqutsisut suliassaqartullu arlallit, timersortartut qilanaaqisut ilagalugit arfininngormat Canadaliarpoq.

Sulorartartutut AWG-mi ukiut 30-ngajaat matuma siorna peqataavoq, taamaattumillu ukiut ingerlaneranni AWG-p ineriartornera takusinnaallugu.

- Sulorarnermi timersoqatigiit akornanni ikioqatigiittoqarneq ajortoq eqqaamavara, kisianni Arctic sportimi Dene Gamesilu soorunami timersuutini allani unammisarfimmi imminnut ikioqatigiittarput. Imminnut unammigaangamik kaammattoqatigiittarput.

- Unammiuaartoqaraluartoq ikinngutigiinneq, naligiinnermik nuannarisaqarneq ataatsimoornerlu maluginiarnarlutillu killitsinnarput, oqarpoq.

Inuusuttut aqutsissiorneqartut

Nunatta Arctic sportimi, Dene Gamesimi, sulorarnermi, nerrivimmi arsaararnermi snowboardernermilu nunat allat unammissavai. Aammattaaq kulturikkut aallartitat peqataassapput, taakkulu kulturikkut aliikkusersuinernut marlunnut isiginnaartitsissallutik.

AWG inuusuttunut unammiuaarneruvoq. Timersuutini Arctic Sport aamma Dene Games kisiartaallutik inersimasunit peqataatitaqartarput, taamaattumik kalaallit timersortartut amerlanersaat inuusuttuupput.

AWG-p inuit assigiinngitsunik kulturillit ataatsimoorfigaat, inuusuttullu ikinngutitaartortarput puigugassaanngitsunillu misigisaqartarlutik, Aviaaja Geisler oqarpoq.

- Inuusuttunut siunissami aqqutissiuinermut, siunissamilu sorusunnerannut tamanna ilusilersueqataassasoq neriuutigaara, oqarpoq.

Namminermisut siornatigut peqataasarsimasut arlallit sungiusaasutut, siulersuisutut aqutsisutut aallartitatullu maanna peqataasarput.

Ataqatigiinneq pingaaruteqarpoq

AAMMA ATUARUK

Kalaallit kinaassutsimik paasinninnerannut tunngatillugu isumaat AWG-mi isiginnaartitsissutigineqassasoq

Timersortartut amerlasuut ujaminnannissartik neriuutigisaraluaraat, Kalaallit Nunaanni Timersoqatigiit Kattuffianni tamanna pingaarnertut anguniagassatut isigineqanngilaq.

Taavami?

- Timersortartut, sungiusaasut aqutsisullu aammattaarli uagut – tassa kalaallit aallartitaat tamarmik – meeqqat inuusuttullu timimik aalatitsinerunissaannut isumataartissinnaavagut.

- Aamma maligassiuilluartunik, meeqqanut inuusuttunullu aallartitaalluartunik pilersitsisoqartarpoq, Aviaaja Geisler oqarpoq.

Taassuma nunatsinniit timersortartut Issittumi ukioqatigiiaat assigiinngitsut kulturikkut oqaatsitigullu sapaatip-akunnerani paarlaasseqatigiinnissaat qilanaarutigaa.

- Ulluni makkunani ataatsimoornissarput pingaaruteqarluinnarpoq, oqarpoq.

Nunatta saniatigut Alaskameersut, Alberta Northimeersut, Yukonimeersut, Northwest Territoriesimeersut, Nunavummeersut, Nunavik-Quebecimeersut Sapmillu peqataapput. Rusland Ukrainemi sorsunneq aallartimmalli peqataaqqusaajunnaarnikuuvoq.