ARCTIC WINTER GAMES
Kuultinnattoq: Angusakka tulluusimaarutigeqaakka
Paninnguaq Qvist arlaleriarluni sinniisussatut toqqarneqareerluni ukioq manna AWG-mi perngaammik peqataavoq, ullormilu siullermili kuultinnalluni.
Paninnguaq Qvistip ajugaanermini unamminermi qisumineq atukkani suli tigummiarlugu sungiusaasuni eqikkaa.
Assi: Hanna Hviid
ARCTIC WINTER GAMES 2026
Arctic Winter Games Whitehorsemi Canadamiittumi ukioq manna ingerlanneqarpoq. Unammiuaarnerit ukiut allortarlugit ingerlanneqartarput.
Kalaallit Nunaat issittormiut pinnguaataanni, Dene Gamesimi, sulorarnermi, nerrivimmi arsaararnermi snowboardimilu unammeqataassaat. Taamatuttaaq kulturilerisut Kalaallit Nunaanneersut peqataapput.
Timersortartut 59-it Kalaallit Nunaannit peqataapput. Dene Gamesimikk timersortartut 16-it, Issittormiut pinnguaataannik timersortartut 18-it, sulorartartut arfineq-pingasut, nerrivimmi arsaarartartut arfineq-pingasut, snowboardertartut sisamat kulturilerisullu tallimat peqataapput.
Nunatta saniatigut timersoqatigiit Alaskameersut, Alberta Northimeersut, Yukonimeersut, Northwest Territoriesimeersut, Nunavutimeersut, Nunavik-Quebecimeersut Saamit peqataapput. Rusland Ukrainemi sorsunneq aallartimmalli peqataaqqusaanngilaq.
Timersuutit katillugit 20-t unammissutigineqarput.
Paninnguaq Qvist Whitehorsemi Kwanlin Dün Cultural Centremi arnat ammasumik unammineranni stick pull-imi kuultinnanniulluni ippassaq ajugaammat tusarnaartunit nuannaarutigineqaqaaq.
Arctic Winter Gamesimi Uummannamiit Dene Gamesimut peqataasoq ukioq manna ajugaalluarpoq.
- Nuannerujussuarpoq
angorusunnikuungakku. Sungiusangaatsiartaarlunga, meeqqakka Uummannamilu
sungiusartakkakka peqatigalugit.
- Siornaak aamma
taama unammisoqarmat peqataarusunnikuungaluarpunga, angusarissaarsinnaallunga nalunagu.
Anguniangara angullugu nuannaarutingerujussuarpara, Sermitsiamut kingusiinnaa oqarpoq.
Paninnguaq Qvist AWG-mut siullermeerluni unammiarpoq.
- 2016-mili
peqataasussaagaluarpunga. Kisianni naartulernikuungama, Mikisuuteqaramalu ilaasarnanga. Nuunuutinga alleriarmat kiisami peqataavunga. Ukiut siulii sinniisussatut sillimmataasarnikuuvunga, oqarpoq.
Paninnguaq Qvist ajugaaniutivinnermi.
Assi: Hanna Hviid
Paninnguaq Qvist ukiut kingulliit arlallit timersortartut allat peqataasinnaanngikkaangata sinniisussatut qinigaasarluni nassuiaavoq, namminerli peqataanissartik eqqarsaatiginngisaannarlugu.
Perngaammik unammeqqammersoq Arctic Winter Gamesimi siunissami unamminissamut piareersimavoq.
- Soorunami unammersuartoqalerpat toqqaasoqarnissaa apeqqutaavoq. Neriuppunga
peqataaqqissinnaassallunga, aamma sukataaqqissuunga.
- Nukkassartarnera ingerlatiinnassuara. Tulliani toqqagaassanguma pitsaanerpaamik takutitsinissara anguniassavara.
Unammiuaarnerit ukioq allorlugu ingerlanneqartarput, ukiut qulit matuma siorna Nuummi, ukioq mannalu Canadami Whitehorsemi timersortartut 2000-init amerlanerusut peqataaffigisaanni unammiuarneq ingerlanneqarpoq.
Paninnguaq Qvistip saniatigut Team Kalaallit Nunaanneersut allat sisamat aamma stick pullimi ujaminnapput. Minik Møller Platou angutini ammasumi unamminermi kuultinnappoq. Danny Clasen angutini U18-ini kuultinnappoq. Aviana Kristiansen arnani U18-ini sølvinnappoq, Kristine Sigurdsenilu arnani inersimasuni bronzennalluni.
