Aalajangiisoqarneratigut Demokraatit Kujallermi sinniisussamik isertitsisisussanngortut

Ukioq affaq sinnerlugu qaangiutereerpoq, kommunalbestyrelsinut, nunaqarfinnut aqutsisunut, ilagiit sinniisaannut qinersinerit 1. april 2025-imi ingerlanneqarmatali.

Maanna qinigaasinnaanermut ataatsimiititaliaq tusagassiuutitigut nalunaaruteqarpoq, qinersereernermi suliat qinigaasinnaanermut tunngasut tamaasa aalajangiiffigisimallugit, erseqqissarlugulu, aalajangiinerit inaarutaasut naammagittaalliuutigineqarsinnaanngitsullu.

Kommune Kujallermi Demokraatit sinnerlugit kommunalbestyrelsimut ilaasortaq  aammalu Savissivimmi ilagiit sinniisaannut ilaasortaq nalunaarfigineqarput, qinikkatut suliassatik annaagaat, inatsisinik unioqqutitsisimanertik pissutigalugu.

Tamatuma saniatigut Alluitsup Paani nunaqarfimmi aqutsisunut sinniisussaq ataaseq, Kommune Qeqertalimmi sinniisussaq ataaseq aammalu Kommuneqarfik Sermersuumi sinniisussat marluk, pineqaatissinneqarsimanertik pillugu sinniisussatut atuukkunnaartut nalunaarfigineqarput.

Suliaq kigaatsoq

Sermitsiamit iluatsinngitsumik paasiniaraluarparput, sooq qinigaasinnaatitaanermut ataatsimiititaliaq, maanna qinersinerup ukioq affaq sinnerlugu qaangiunnerani nalunaaruteqarnersoq, maannami qinigaasinnaanngitsutut aalajangiiffigineqartut arfiniliusunit marluk qinikkatut suliaminnik ingerlatsilereernikuugaluartut.

Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaat naapertorlugu, kommunalbestyrelsinut, nunaqarfinni aqutsisunut ilagiillu sinniisaannut qinersisoqareernerani qaammat ataaseq qaangiutsinnagu qinerneqarsimasut sinniisussallu tamarmik allattorsimaffiat atii cpr.nr.-lu ilanngullugit qinigaasinnaanermut ataatsimiititaliamut nassiunneqareersimassapput.

Tamatuma kingorna Qinigaasinnaanermut ataatsimiititaliaq Kalaallit Nunaanni Politimesterimut kommunalbestyrelsimi, nunaqarfinni aqutsisunut, ilagiit sinniisaannut ilaasortaq sinniisussallu ilaasortat nutaat pineqaatissinneqarsimanersut oqaaseqaammik piniassaaq, pineqaatissinneqartoqarsimappallu Politimesterip aalajangiinerup allattorsimaffiata assinga qinigaasinnaanermut ataatsimiititaliamut nassiuttussaallugit.