Aalisarnermik ingerlatseqatigiiffiit pingasut Naalakkersuisunut kamattut: Aalisagartassiissutit tunniussasi utertissigit

Naalakkersuisut kitaata avataani aalisagartassanik ingerlatseqatigiiffimmut SiKu Trawl A/S-imut aggustip 18-ani tunniussipput. Aalisagartassat nalituut, oqallisaaqisut, nammineq pigisassat, neqeroortitsinermi pissarsiarerusullugit qinnuteqaatigineqarsinnaanikuupput. Qalerallit 2.468,5 tonsit, saarulliit 1.950 tonsit nataarnallu 166,6 tonsit SiKu Trawl A/S-ip taamani pissarsiarai. 

Ingerlatseqatigiiffiup taassuma pissarsinera neqeroortitsinermi neqerooqataanikut ilaasa arlallit paasiuminaatsippaat. Taakkununnga Halibut Greenland ApS, Ilulissani aalisakkeriviuteqartoq akuuvoq. Taakkua isumaqarput Naalakkersuisut aalajangiinerat neqeroortitsinermi piumasaqaataasunut naapertuutinngitsoq.

AAMMA ATUARUK:

Avataani aalisagartassaateqalersut: Kilisaatitaarlutalu Narsami tunisassiorfeqalissaagut

- Naalakkersuisut avataasiorluni aalisagartassanik suliffeqarfimmut allamut tunniussinerminni toqqammavilersuutigisimavaat nunap immikkoortuani inerisaaniarlutik neriorsuissimasunut.

- Naalakkersuisut Kitaani avataasiorluni aalisagartassanik neqeroorusiortitsinerminni aalajangiisimapput qinnuteqartitsinerminni piumasaqaataasut isikkaniliusunit piumasaqaat ilaanngitsoq toqqammavigalugu! Tassa siunertaq piumasaqaataasullu sanioqqullugit Naalakkersuisut aalajangernerminni tunngavilersuut allarluinnaq toqqammavigalugu tigusimallugu, ingerlatseqatigiiffiup pisortaa, Erik Sivertsen aamma siulersuisut siulittaasuat, Kaaleeraq Mathæussen tusagassiorfinnut allapput.

SiKu Trawl A/S-ip pisortaata Pavia Egede Lundip, aalisagartassanik pissarsinermik kinguninngua Sermitsiamut oqaluttuaraa Narsami tunisassiorfimmik inerisaaniarlutik. Nunap immikkoortuani illoqarfimmiluunniit aalajangersimasumi inerisaanissaq   neqeroortitsinermi piumasaqaataanngilaq. Tamanna neqeroortitsinermi paasissutissani, kikkunnit tamanit takuneqarsinnaasuni, takuneqarsinnaavoq. 

- Tamannaavorlu Halibut Greenland-ip Naalakkersuisut aalajangiinerannut akerliunera, tamannalu toqqammavigalugu Naalakkersuisut avataani aalisagartassat pillugit aalajangiinerat atorunnaarsinneqarnissaanik nutaamillu suliamik aallartitsisoqarnissaanik piumasaqarneranik, Halibut Greenland ApS-ip siuttui allapput.

Naalakkersuisut SiKu Trawl A/S aalisagartassanik nalituunik tunigamikku tunngavilersuutaat ilaatigut imaappoq:

- SiKu Trawl A/S ingerlatseqatigiiffik nutaajuvoq, piginnittunik nutaanik peqarluni pilersinneqartoq, ingerlatseqatigiiffiullu ineriartortitsinissamut pilersaarutaani aamma Kalaallit Nunaata Kujataani Narsamullu aalisarnerup inuussutissarsiornermillu ineriartortitsinermik nukittorsaanissaq immikkut ukkatarineqarpoq, Naalakkersuisut tusagassiorfinnut aggustip 21-ani nalunaarumminni allapput. 

AAMMA ATUARUK:

Bent Salling: Aasianni aalisakkerivik ukioq kaajallallugu maanna ammasinnaanngorpoq

Inua Fisheries: Inatsisilerituut ikiortigissavagut

Halibut Greenland ApS Naalakkersuisut aalajangiinerannut kisiartaalluni isornartorsiuisuunngilaq. Inua Fisheries Greenland ApS pisassat nutaamik neqeroorutaaqqissasut aamma kissaateqarput. Ingerlatseqatigiiffiup siulersuisuisa siulittaasuat tusagassiorfinnut allappoq.

- Inua Fisheries-ip akerlerinngilaa pisassat allanut tunniunneqarsinnaanerat. Piumasaqataasimasulli tamanit takuneqarsinnaasut avaqqutiinnarlugit tunniussineq pissusissamisoortutut isiginngilaat, Jens Peter Larsen allappoq. 

Taassuma taama isumaqarnerminut ilaatigut tunngavilersuutaa imaappoq:

- Aalajangernermi, ilaatigut suliffeqarfik tunineqartumut “immikkut oqimaalutarineqartutut” tunngavigineqartoq nunap immikkoortuani inuussutissarsiornikkut aalisarnikkullu siuarsaanissaq neqeroortitsinermi ersersinneqarsimanngilaq tamanullu atuutsinneqarani, siulittaasoq allappoq.

Avalleq ApS-imi piginneqataasoq: Naalakkersuisut pissaanermik atornerluipput

Aalisagartassat ingerlatsisunut pineqartunut, tassa SiKu Trawl A/S-imut tunniunneqarnerat Avalleq ApS-imi piginneqataasup, siusinnerusukkut aalisarnermut naalakkersuisuusup, Karl Lyberthip, sakkortuumik isornartorsiorpaa. Taassuma isornartorsiuinera Halibut Greenland ApS-ip  Inua Fisheries Greenland ApS-illu isorinnissutaannut assiguvoq.

- Qinnuteqartitsinermi Naalakkersuisut piumasaqaataanni nunap immikkoortuata pineqartup ineriartortinnissaa ataasinnguamilluunniit taaneqanngilaq piumasaqaataananilu!

- Erseqqissumik piumasaqaataasimagaluarpat Naalakkersuisut aalajangiinerat paasinassagaluarpoq, kisiannili piumasaqaatitut sunnguamilluunniit eqqaaneqarnikuunngimmat isumaqarpunga Naalakkersuisut aalajangiinerat pissaanermik atornerluilluni kinassusersiornermik, sumiiffimmik inunnillu aalajangersimasunik salliutitsinermik tunngaveqartoq! Karl Lyberth tusagassiorfinnut allappoq. 

Ingerlatseqatigiiffimmi tassani aalisarnermut siusinnerusukkut aamma naalakkersuisuusoq alla, Karl-Kristian Kruse, pisortaavoq. Soraarnerussutisiassanik katersivik, SISA, ingerlatseqatigiitffimmut tassunga piginneqataavoq. SISA-mi atorfilik aamma siusinnerusukkut aalisarnermut naalakkersuisuusoq, Pâviâraq Heilmann, ingerlatseqatigiiffiup siulersuisuisa siulittaasoraat.

Taakkuali arlaannaalluunniit aalajangernermut qisuariarani Karl Lyberth tusagassiorfinnut allattuuvoq. 

- Uani suliami Naalakkkersuisut sulinerat aalajangernerallu imaannaanngitsumik ilungersunartutut isigisariaqartoq isumaqarpunga, pinngitsoornanili Inatsisartuni qaqilerneqartariaqartoq. Ajornanngippallu pisassat pillugit nutaamik nalilersuisoqartariaqartoq, Karl Lyberth allappoq.

Halibut Greenland ApS,  Inua Fisheries Greenland ApS aamma Avalleq ApS tamarmik pisassanik pissarsiumallutik neqeroortunut ilaapput.

Sermitsiap Aalisarnermut Naalakkersuisoq, Peter Borg (D), isornartorsiutaasut pillugit oqaaseqartinniarlugu sulissutigaa.