Akileraartarnermut Aqutsisoqarfiup kukkuneq nassaaraa: Suila-tapit pillugit naatsorsuutit nassiussuinnalerpaat

Akileraartarnermut Aqutsisoqarfiup Suila-tapit pillugit ukiumoortumik naatsorsuutit e-Boksikkut nassiussuleruttorpai.

Ukiumoortumik naatsorsuutit nutaat siusinnerpaamik sapaatip-akunnerata tulliani nassiussuunneqassasut ullumi siusinnerusukkut nalunaarutigineqaraluarpoq. Kukkunerli Akileraartarnermut Aqutsisoqarfimmit nassaarineqarsimalermat, ukiumoortumik naatsorsuutit nassiutiinnassallugit aalajangerput.

Taamaalilluni innuttaasut 7.521-t akiliisussanngorput, innuttaasullu 4.839-t utertoortussanngorlutik. Utertoortussat Akileraartarnermut Aqutsisoqarfiup aggustimi saqqummiussaaniit affangajaanik amerlassuseqalerput.

Taamanikkut nalunaarutigineqarpoq innuttaasut 7.161-t katillugit 30,2 millionit koruuninik akiligassaqartut, innuttaasullu 9.443-t Suila-tapisiakippallaarsimallutik utertoortussaasut.

Suila-tapilli naatsorsorneqarneranni arlalinnik kukkusoqarsimammat naatsorsueqqittoqartariaqalersoq Akileraartarnermut Aqutsisoqarfik septembarip aappaani nalunaarpoq. Taamaattumik innuttaasut 22.000-t tungaanoortut ukiumoortumik naatsorsuutaat naatsorsoqqissaarneqartariaqalerput.

Maanna ukiumoortumik naatsorsuutit iluarsineqarsimasut nassiunneqarsimalerput.

Naatsorsuisarnerit pitsaanerulersinneqassapput

Akileraartarnermut Aqutsisoqarfik paasissutissiivoq innuttaasut katillugit xx,x millionit koruuninik akiligassaqartut, innuttaasullu Suila-tapisiakippallaarsimasut katillugit 14,2 mio. koruuninik utertuussasut.

Peqatigitillugu Akileraartarnermut Aqutsisoqarfiup tapinut qaammatikkuutaartumik tunniunneqartartunut naatsorsuisarneq allanngortinniarpaa. Aningaasat siunissami eqqornerusumik naatsorsorneqartarnissaat siunertaavoq, taamaaliornikkut innuttaasut ikinnerusut akiligassaqalinnginnissaat anguniarneqarluni.

AAMMA ATUARUK

Akileraartarnermut Aqutsisoqarfik Suila-tapit kukkuneqarneri pillugit: Kukkunerput nassuerutigaarput

- Innuttaasut tunineqarpallaarsimasut annertuumillu utertitassaqalersimasut aallaavigalugit misissuinerit ingerlatissavagut. Taamatuttaaq innuttaasut qaammammiit qaammammut annertuallaamik tunineqartarsimasut aamma ilanngullugit misissuiffigissallutigit. Tamatuma kingunerisinnaavaa siunissami innuttaasut ilaannut aningaasat qaammatit tamaasa tunniunneqartartut ikilisinneqarnerannik paarlattuanilli ukiup tulliani aggustimi utertitsilluni akiligassinneqarnissamut aarlerinaat annikillisinneqassalluni, Akileraartarnermut Aqutsisoqarfimmi pisortaagallartoq Lisbeth Møller Jensen oqarpoq.

Taassuma aamma erseqqissaatigaa Suila-tapit innuttaasut ukiumoortumik isertitassaatut naatsorsuutaat aallaavigalugit tunniunneqartartut.

- Suila-tapinik tunniussisarneq ukiumut isertitassatut naatsorsuutigineqartut tunngavigalugit naatsorsorneqartarput. Taamaattumik naatsorsuutigineqartut tamatigorluinnaq eqqoqqissaarnissaat ajornarpoq. Kisianni pitsanngorsaanissamut periarfissaqartoq paasivarput, Lisbeth Møller Jensen oqarpoq.

Innuttaasut Suila-tapisivallaarlutik akiligassaqalersut akileeqqusissummik e-Bosikkut kingusinnerpaamik oktobarip aallaqqaataani nassinneqassapput. Akiligassallu kingusinnerpaami oktobarip 31-ani akilerneqassallutik. Utertoorutissallit  utertoorutissaat NemKontomut ikineqarumaarput.