Perorsaasut isornartorsiuinerat erseqqissumik akineqanngilaq

Meeqqanut, ilaqutariinnut ilinniartitaanermullu ataatsimiititaliami siulittaasup Poul Petersenip kommunip "ukiorparpassuarni" perorsaasunik amigaateqarneq ilisimagaa nassuerutigaa.

Taamaakkaluartoq ajornartorsiutit maanna ima ingasatsigilersimapput sulisut perusuersartarfiliarnissamuulluunniit piffissaqarneq ajorlutik, aningaasaqarneq nammanniarlugu saniatigut suliffeqartariaqartarlutik uippakajaarnerlu pisstuigalugu sulinngiffeqartariaqalersarlutik.

Angajoqqaat perorsaasullu sapaatip-akunnerini arlalinni isornartorsiuereersullu kommuni aaqqiissutissamik nassaarsimanngitsoq Poul Petersenip nassuerutigaa.

- Nassuerutigissagukku naluara. Akisinnaanngilara, ajornartorsiutit suli aaqqinneqarsimannginnerat pillugu aperineqarami akivoq.

Angajoqqaat perorsaasullu pissutsit atugassarititaasut tallimanngornermi maajip aallaqqaataani akerliussutsimik takutitsiffigaat.

Kommuneqarfik Sermersuumi borgmesteri Avaaraq Olsen apersorneqarusunngilaq, ataatsimiititaliamili siulittaasup Poul Petersenip Sermitsiamit apersorneqarluni isornartorsiuineq akissuteqarfigaa.

Ajornartorsiuteqarnera nassuerutigaa, aningaasarsialli atorfinitsitsinermullu tunngasut kommunip aqutarinngikkai erseqqissaatigalugu.

- Sulisussaaleqisoqarnera ilisimaneqarluarpoq. Nalinginnaasumik sulisussaaleqineq ajornartorsiutigaarput, aningaasarsiallu appasinnerat ajornartorsiutitut pingaarnertut isigineqarpoq, Poul Petersen oqarpoq.

Ukiorpassuarni ajornartorsiutaasimasoq

Kommunip "Kommuneqarfik Sermersuumi meeqqerivinni sulisunik amigaateqartoqarpoq" tusagassiuutitigut nalunaarut taamatut qulequtalik saqqummiuteqqammerpaa, tassani ilinniartut utoqqalinersiallillu ulluunerani neqeroorutini piffissap ilaani sulisalernissamik qinnuteqarnissaannut kaammattorneqarlutik.

Piffissamiuni uani taamaallaat sulissussaaleqisoqartoq?

- Naamik, maannakkuinnaanngilaq. Kisianni sulisussaaleqisoqarujussualeqqavoq, allanngoriartorporli, oqarpoq.

Ajornartorsiut qanoq sivisutigisumik ilisimaneqarnersoq aperineqarami ima akivoq:

- Ukiorparpassuarni. Siulittaasunngornissara sioqqullugu. Sapinngisarput tamaat iliuuseqarusuppugut, namminerli ajornartorsiutit aaqqissinnaanngilavut. Taamatut nassueruteqarneq pingaaruteqarsoraara. Kommunip kisimiilluni suliassaatut ilaatigut isigineqarpasittarami.

Kommunip inuit attaveqaqatigiittarfii aqqutigalugit meeqqerivinni sulisuusinnaasunik kajungilersitsiniarsarivoq aamma atorfimmut atatillugu inissat amerlanerulersinnissaat sulissutigalugu.

Aammattaaq kommunip perorsaasut akeqanngitsumik Qinngorpumut bussinut ilaallutik suliartortarsinnaanersut misissornikuuaa, tamannali kommunalbestyrelsip malittarisassai pissutigalugit unitsinneqarpoq.

- Isumakuluutigeqaara. Allaffissornerujussuaq piuvoq, tamannalu qaangertariaqaraluaripput isumaqarpunga, Poul Petersen oqarpoq.

Aaqqiissutaagallartoq

Kommuni soraarnerussutisialinnik ilinniartunillu piffissap ilaani sulisinnaasunik, aamma taartaasartut aningaasarsiaqarnerulernissaat siunertaralugu ilinniaqqinnissamik neqerooruteqartarsimapput. Poul Petersenillu suliniutigineqartut tunngaviusumik ajornartorsiummut aaqqiissutaanngitsut nassuerutigaa.

- Aaqqiissuteqarallarnissaq maanna pineqarpoq, oqarpoq.

Poul Petersenilli ilinniartut soraarnerussutisiallillu siunissami ungasinnerusoq eqqarsaatigalugu aaqqiissutissaanersut nalornissutigaa.

- Naluara, periarfissaavorli misissugassarput, taava takussavarput attanneqaannarsinnaanersoq imaluunniit naamik, oqarpoq.

Piffissarliuna ungasinnerusoq eqqarsaatigalugu qanoq iliuuseqartoqartariaqartoq? Poul Petersen naapertorlugu kommunit, Naalakkersuisut kattuffiillu tamatumani suliaqartut suleqatigiinnerusariaqarput.

- Qanoq iliortoqarsinnaaneranik oqallitsitsinissamut qaaqqusiumavunga. Issiaqatigiilluta suleqatigiilluta iliuuseqarniarnissarput pingaaruteqarpoq. Aaqqiissutissamillu nassaartigata unissanata.

Ilaatigut aningaasarsiat, ilinniartitaaneq inatsisillu sulisussarsiornermut akornutaasutut eqqaavai.

- Ilinniarfik maanna aamma Ilulissaniippoq, Nuummilu amerlasuut ilinniagaqarusupput. Ilaquttatik allallu pissutigalugit aallarsinnaanatik. Immaqa aaqqiissutissarsiortoqarsinnaavoq. Kommunimili politikeritut tassunga tunngatillugu nammineerlunga aalajangiisinnaanngilanga, oqarpoq.

- Akisinnaanngilara

Meeqqerivinni ajornartorsiutit nutaajunngillat. Allaaserisani ukiut 20-t matuma siornatigut saqqummertuni meeqqerivinni perorsaasunik amigaateqarneq pillugu ajornartorsiut allaaserineqarpoq. Nuna tamakkerlugu perorsaasunut atorfinni affangajaat inuttaqanngitsut nalunaarusiami kingullermi NISK-imit (NPK-junikoq) suliarineqartumi 2023-meersumi takuneqarsinnaavoq.

Sooq pissutsit suli allanngortinneqarsimannginnersut Poul Petersen aperineqarami ima akivoq:

- Ilinniarsimasut ikippallaarput. Ajornartorsiut meeqqat atuarfianni aallartippoq, tassanimi ikittuinnaat naammassisarput ilinniakkamillu aallartitsisarlutik, oqarpoq.

Nutaamik aaqqiissutissarsiortoqartariaqartoq isumaqarpoq.

- Taamatut ingerlaannarutta qanoq inerneqarumaarnera nalunngilarput. Taamaattumik ataatsimoorluta suliniutit aaqqiissutissallu nutaat eqqarsaatigisariaqarpavut, Poul Petersen oqarpoq.

Ilaatigut ilisimatusartut isumanik nutaanik suliaqarnissaannut qaaqquneqarsinnaanerat tikkuarpaa.

- Ullumikkut iliuuserisavut naammanngillat, tamannalu oqaatigisariaqarparput, oqarpoq.

Sooq kommuni siusinnerusukkut taamaaliunnginnersoq Sermitsiamit aperineqarami naatsumik ima akivoq:

- Ilumoorlunga oqassaguma naluara. Akisinnaanngilara, Poul Petersen.