Aqqusernit utoqqarnut innarluutilinnullu ajorluinnartut

Illoqarfinni aqqusernit pioreersut aserfallatsaalineqarnissaat, kiisalu aqqusernit nutaat pilersaarusiorfigineqarnissaat sanaartornissaallu kommunit akisussaaffigaat.

Taamaakkaluartoq kommunit ilaanni aqqusernit pitsaanngilluinnarput, tamannalu Qeqertarsuarmi aamma atuuppoq.

Qeqertarsuarmi 800-t sinnilaarlugit inoqartumi, utoqqaat inissiaannut aqqusernit imak ajortigipput, tassani najugaqartunit ulorianartutut nalilerneqarlutik. Aammalu illoqarfiup immikkoortuani allami innarluutillit najugaqarfiini marluusuni aqutsisut oqarnerat naapertorlugu, inissianut taakkununnga aqqusernit ajorluinnarlutillu najugaqartut ilaanniit aqqutigineqarsinnaannngillat.

Taamaammat Kommune Qeqertalik akisussaaffimminik annertuumik sumiginnaasoq, tamannalu akuersaarneqarsinnaanngitsoq, taakku isumaqarput.  

Sanaartornermi aqqusernit

Kommune Qeqertalimmi Qeqertarsuarmi Inoqarfimmi aqutsisuugallartup Johan Frederik Zeebip oqarnera naapertorlugu illunik nutaanik sanaartornerup nalaani aqquserniaagallartut sanaartornerup naammassinerani taamatut isikkoqartillugit asfaltimillu qallernagit atuinnarneqartarnerat takornartaanngilaq.

Kommune Qeqertalimmi illoqarfinni nunaqarfinnilu aqqusernit amerlasuut iluarsartuunneqartariaqartut, tamannali ukiuni arlalinngortuni eqqumaffigineqarsimanngitsoq, Kommune Qeqertalimmi kommunalbestyrelsimi illuatungiliuttuni ilaasortaq Aqqa Jensen, Siumut, oqarpoq.

Utoqqarnut ulorianartoq

84-inik ukiulik Maaliannguaq Svendsen uinilu utoqqaat inissiaanni 2009-mili najugaqarput. Utoqqarnut inissiat sanaartorneqarnerinut atatillugu aqqusineq sananeqarsimasoq asfalteqaranilu sioraaqqanik qalligaavoq. Upernaat tamaasa aput aakkaangat inissiat tungaannut aqqusineq kooqalertarpoq, taamaaligaangallu piffissap ilaani aqqutigineqarsinnaajunnaartarluni.

- Tamaani najugaqartut ilai pitsorluttuullutillu ilaat rollatorinik atuisuupput. Aqqusineq utoqqarnut ajorluinnarpoq sulilu ajorsiartorluni, taamaammallu ulorianarpoq. Najugaqartut ilaat ataaseq tamaani ajutoornikuusoq ilisimavara. 

- Aqqusernup aaqqinneqarnissaa siunertaralugu ukiorpassuanngortuni kommunimut saaffiginnittaraluarpugut, ajoraluartumilli iliuuseqartoqarneq ajorpoq. Allatuulli akileraartartuuvugut, taamaammat sooq aaqqinneqarneq ajornersoq paasisinnaanngilara, taanna oqarpoq.

Utoqqaat pitsorluttullu inigisaannut aqqusernit ajorluinnartut aaqqinneqarneq ajornerat akuersaarneqarsinnaanngitsoq, tamannalu akisussaaffimmik sakkortuumik sumiginnaanertut isigineqartariaqartoq, Maaliannguaq Svendsen isumaqarpoq.  

Tusaaneqanngitsut

Qeqertarsuarmi Najugaqatigiiffik Ikinngutit inunnut innarluutilinnut immikkullu pisariaqartitsisunut najugaqarfiuvoq. Tassani aqutsisup Salomine Mølgaardip oqarnera naapertorlugu tassunga aqqusineq najugaqartunut tulluutinngilluinnarpoq.

- Najugaqatigiiffiup tungaanut aqqusineq sanaartornermi aqquserniaasimasoq, kingornalu taamatut isikkoqartillugu atorneqalersimasoq, sivingasumiillunilu annermik quatsersimatillugu ulorianartorujussuuvoq.

- Sakkortuumik innarluutilimmik najugaqartuuteqarpugut, taannalu kørestolinik aqqusinikkut pineqartukkut majuussinnaanngilarput. Taamaammat silaannarissartillugu aneertinniarnera killeqartorujussuuvoq.

- Aqqusernup taassuma aaqqinneqarnissaa pillugu Kommune Qeqertalimmut arlaleriarlunga anngussisaraluarpunga, tamannali ulloq manna tikillugu kinguneqarsimanngilaq. Taamaammat kommuuni akisussaaffimminik annertuumik sumiginnaasoq isumaqarpunga, taanna oqarpoq.

Najugaqatigiiffik Isikkivik inunnut innarluutilinnut immikkullu pisariaqartitsisunut najugaqarfiuvoq, tassungalu aqqusineq sivingasumiittoq sanaartornermi aqquserniaavoq, sulilu taamaatsillugu aamma atorneqarluni. Aqqusineq najugaqartunut, ilaatigut sakkortuumik innarluuteqartunut atussallugu tulluutinngitsoq ulorianarsinnaasorlu Najugaqatigiiffik Isikkivimmi aqutsisoq Dina Christiansen oqarpoq.

- Aqqusineq quatseraangat ulorianartorujussuanngortarpoq. Aqqusineq kaajallaffissaqanngimmat biilit tikiukkaangamik kinguporsorlutik utertariaqartarput. Taamaammat sillimaniarneq eqqarsaatigalugu ernumanartorujussuuvoq.

- Aqqusernup aaqqinneqarnissaa pillugu arlaleriarlunga kommunimut allagaqarlungalu sianeqattaartaraluarpunga, tamannali qisuariarfigineqarneq ajorpoq, taanna oqarpoq.

Aqqusernit pineqartut pillugit Kommune Qeqertalik akisussaaffimminik annertuumik sumiginnaasoq, Dina Christiansen aamma isumaqarpoq.   

Inuit Innarluutillit Oqaaseqartartuat qisuariaateqassasoq

Inuit Innarluutillit Oqaaseqartartuat Qivioq Løvstrøm upernaap ingerlanerani Avannaata Kommuniani Kommune Qeqertalimmilu angalavoq. Taanna juuni aallartilaartoq Qeqertarsuarmiippoq, tassungalu atatillugu aqqusernit pineqartut ilaatigut takusarpai. Angalanermi pissarsiarineqartut pillugit nalunaarusiaq innersuussutillu aggustimi kommuninut taakkununnga tunniunneqarumaartoq taassuma oqaatigaa.

Kommune Qeqertalimmi borgmesteri Simigaq Heilmann, Demokraatit, aqqusernit pineqartut pillugit kommuuni qanoq pilersaaruteqarnersoq pillugu Sermitsiamiit oqaaseqartinniarneqaraluarpoq, saaffiginnissulli suli akineqanngilaq.