Ataatsimiititaliami siulittaasoq: Kangaatsiami eqqaavissuaq ukioq manna imaarneqarsinnaajunnaarpoq

Kangaatsiami eqqaavissuup, eqqakkanik takusassaaleqiffiunngeqisup, pilersaarutaaqqaaraluartut malillugit qaammatip tulliani imaarneqartussaagaluarnera pivisunngorsinnaajunnaarpoq. Kommune Qeqertallip kommunalbestyrelsiata ataatsimiititaliaani Inoqarfimmi, tassa teknikkimut suliaqarfimmi, siulittaasoq Kristian Jeremiassen (IA) Sermitsiamut oqarpoq.

- Kangaatsiami eqqaavissuup imaarneqarnissaata ukioq manna pinissaa naatsorsuutigineqarsinnaanngilaq, Kristian Jeremiassen oqarpoq.

AAMMA ATUARUK:

Kangaatsiami eqqaavissuaq imaarneqalersoq

Kommune Qeqertalimmi kommunalbestyrelsip Kangaatsiami eqqaavissuup imaarneqarnissaa juunip aqqarngarni ataatsimiinnermini isumaqatigiissutigaat. Eqqaavissuup imaarneqarnissaa pillugu suliaqartussaq, juulip naanerani nassaarineqariissasoq kiisalu Kangaatsiami eqqaavissuarmik imaarsineq aggutsip qiteqqunneranit novembarip naaneranut suliarineqassasoq pilersaarutaaqqaaraluarpoq. Ulloq mannali tikillugu suli suliariumannittussarsiuussisoqanngitsoq, siulittaasoq oqarpoq.

- Eqqaavissuarmik imaarsinermik misiliinikuunngilagut, taamaattumik teknikkikkut annertuumik pisariaqartitsisoqarpoq, Kristian Jeremiassen oqarpoq.

Ulluligaanngitsumik kinguaattoortoq

Kangaatsiami eqqaavissuup qaqugu suliarineqarluni aallartinneqassanera imaarneqassaneralu siulittaasup maannakkut akissutissaqartinngilaa. Allaffissornikkummi suliassat aallarniutaasut, taakkua naammassineqaqqaartariaqarput.

- Aappaagu ukioq naatinnagu suliassaq taanna annertuumik ukkatarineqassasoq kommunalbestyrelsip siunniuppaa. 

Taava imaappoq sivikinnerpaamik ukiumi ataatsimi kinguaattoorpoq?

- Aap. Aatsaat misilipparput (eqqaavissuarmik imaarsineq, aaqq.) taamaammat ilinniutigaarput, ataatsimiititaliami siulittaasoq oqarpoq.

 Aappaagu naammassissasoq ukiulli qanoq ilinerani tamanna pissanersoq taassuma akinngilaa. 

ESANI assartuissasoq

Kangaatsiami eqqaavissuup suliassartai Kommune Qeqertalimmit akisussaaffigineqarput. Eqqaavissuulli imaarnissaanut kommuni kisimi suliaqarsinnaanngitsoq siulittaasoq Sermitsiamut aasaq juulimi nassueruteqarpoq.

Taamaattumik siunnersuisarfik Inuplan A/S-ip, Kangaatsiami eqqaavissuarmik imaarsinissamik pilersaarusiortuussasoq kommunimi qinikkat aasaq aamma aalajangerpaat. Suliffeqarfiup Inuplan A/S-ip kommunimut sullissinera 137.500 koruuninik akeqassasoq, taamani aalajangerneqarpoq.

- Suliap nutaap aallartinnerani ilisimasalinnik suleqateqartariaqarpugut. Kommuniminngaanniit misilissimanngilarput eqqaavissuarmik imaarsineq, taamaammat suliakkiuteqarnikuuvugut, Kristian Jeremiassen aasaq juulimi oqarpoq.

Eqqakkat suliffeqarfiup suliariumannittussarsiuussinermi ajugaajumaartussap katersugai, kommunit eqqagassalerineq pillugu suliffeqarfiutaata, ESANI A/S-ip umiarsuaataanit aaneqarnissaat pilersaarutaavoq.

- ESANI-mut isumaqatigiissuteqarpugut eqqakkannik aallertassasoq, Kristian Jeremiassen juulimi oqarpoq.