MALUGIUK: Allaaserisaq toqutsisoqarnikuuneranik oqaluttuanik sakkortusinnaasunik imaqarpoq.
Angut inuusuttoq Blok 5-imi toqungasoq nassaarineqarnikoq marluliaqarpoq. Qatanngutaa taanna ilisimannittutut marlunngornermi ualikkut eqqartuussivimmut aggersarneqarpoq, oktobarimilu 2024-mi toqutsinerup nalaani pisut pillugit oqaluttuarinneqarluni.
MALUGIUK: Allaaserisaq toqutsisoqarnikuuneranik oqaluttuanik sakkortusinnaasunik imaqarpoq.
Angut inuusuttoq Blok 5-imi toqungasoq nassaarineqarnikoq marluliaqarpoq. Qatanngutaa taanna ilisimannittutut marlunngornermi ualikkut eqqartuussivimmut aggersarneqarpoq, oktobarimilu 2024-mi toqutsinerup nalaani pisut pillugit oqaluttuarinneqarluni.
- Meeraallutali qanittuararsuuvugut, toqutaasup qatanngutaa Sisimiuniit internetsikkut attaveqarluni oqaluttuarpoq.
Qatanngutimi toqunissaa sioqqullugu angerlarsimaffeqanngitsunut unnuisarfimmi naapissimallutik, taanna oqaluttuarpoq. Angut 42-nik ukiulik unnerluutigineqartoq pillugu oqaasissaqarpallaanngilaq, aamma toqutsinerup nalaani Blok 5-imiissimanani.
Angulli siusinnerusukkut eqqaaneqartoq, unnerluussisussaatitaasumit suli soqutigineqartoq, pasineqaraluarluni unnerluutigineqanngitsoq kinaasoq nalunngilaa.
- Qatanngutiga ilagikulavaa, pujortaqatigiillutillu imeqatigiittarput, ilisimannittoq oqarpoq.
Angutip ujarak aattalik pillugu oqaaseqarsimasoq ilisimannittoq oqarpoq. Ilisimannittulli nassuiaanera ersarlussinnaasarlunilu eqqartuussivimmiittunut paasiniarnera ilungersunarpoq.
Ilisimannittoq alla peerneqartoq
Inuusuttoq toqutaasoq inuunermini ajornartorsiungaatsiartuusoq paasinarsivoq. Angerlassimaffeqaannarani eqqarsartaatsikkut nappaateqarlunilu imigassamik ikiaroornartumillu atornerluisuuvoq.
Unnerluussisussaatitaasup Aprilia Jespersenip ilisimannittut apersorneqarnerisa akunneranni uppernarsaaterpassuarni saqqummiussaani takuneqarsinnaavoq.
Marlunngornermi ilisimannittup kingulliup nassuiaanissaraluara taamaatiinnarneqarpoq. Taanna suliami pisumut allamut tunngasumut ilisimannittuuvoq. Angut 42-nik ukiulik blok 5-imi toqutsisimasutut unnerluutigineqarnermi saniatigut Nuussuarmi juulimi 2024-mi arnamut nakuusersimasutut unnerluutigineqarpoq.
Arnalli taassuma politiinut nalunaarutiginninnini eqqaamasimanngikkaa ullumi paasinarsivoq, taamaammallu unnerluussisussaatitaasup ilisimannittup qaaqquneqarnera atorunnaarsippaa.
Ilisimannittup nassuiaateqarsinnaanerminut pisinnaannginnera tamatuma pissutaavoq.
