Borgmesteri: Ajornartorsioreertugut ajornartorsiortinneruleriaannaavaatigut

Naalakkersuisut aningaasanut aappaagumut inatsisissatut siunnersuutaat, Aningaasaqarnermut Naalakkersuisup, Aqqaluaq B. Egedep (IA), aggustip 20-ni saqqummiuppaa. Siunnersuummi tassani kommuninut ataatsimoortumik tapiissutit ukioq manna 1,9 milliardit koruunit sinneqalaartut aappaagumut 51 millionit koruuninik ikinnerulernissaat Naalakkersuisut siunnersuutigaat.

AAMMA ATUARUK

N aamma S: Pilersitsiviunngilaq aaqqitassaqaqaarlu

Tamanna kommunit inukinnersaasa ilaanni, Kommune Kujallermi, borgmesterip iluarinngeqaa.

- Kommuninut sipaarniarnerit siornatigut pisut annertoreertigisut taamatut siunnersuuteqartoqarnera akueriuminaatsippara.

- Sipaarniartoqassappat immaqa kommunit ilaanut annernarpallaanngilaq. Kisianni kommuninut minnernut annernartorujussuusarpoq. Kingunissai uagutsinnut annertunerusarput, Malene Vahl Rasmussen (D), Sermitsiamut oqarpoq.

Inatsisitigut pisussaaffiit naammassineqarsinnaajunnaarsinnaasut

Naalakkersuisut Inatsisartunilu partiit aappaagumut aningaasartuutaasussat pillugit siunnersuut pillugu isumaqatigiinnialerunik, aningaasallu kommuninut atugassiissutaasussat maannakkut siunnersuutaasut nikisinngippatikkit, tamanna inatsisit atuutut naammassiuminaassinerannik ilaatigullu allaat naammassineqarsinnaajunnaarnerannik Kommune Kujallermut kinguneqarsinnaasoq, borgmesteri oqarpoq.

- Imatut kinguneqarsinnaavoq inatsisitigut pisussaaffigut suliassat naammassisinnaannginnerannik. Naalakkersuisut Inatsisartullu kommuninut akisusaaffilersuisarput suut kommuninit suliarineqassanersut, tamakkualu tassaakkajupput innuttaasunut qanimut sullissinerit. Aningaasalli tunniunneqartartut ikiliartortillugit inatsisilli amerliartortillugit tamanna imminut ataqatigiinngilaq. Tamanna ajuusaarnartorujussuuvoq,  Malene Vahl Rasmussen oqarpoq.

AAMMA ATUARUK

Naalakkersuisut aningaasanut inatsisissamut siunnersuut saqqummiuppaat

Kommune Kujalleq akileraarutitigut akiliinngitsoornikuunini pissutigalugu aningaasatigut unammilligassaqangaatsiarpoq. Taamaattumik Naalakkersuisut maannakkut siunnersuutaat taama isikkoqaannassappat, kommuni aningaasarlioreertoq ingerlatsinermut aningaasartuutiminnik sipaarniaqqittariaqassaaq.

- Kommune Kujalleq Namminersorlutik Oqartussanut aningaasanik 100 millionit koruuninik attartorpoq. Attartornermi tassani kommunip pisussaaffiinut ilaavoq ukiuni tallimani minnerpaamik 35 millionit koruuninik missingersuusiornermi sinneqartoornissaq. Sipaarniarfigitissagutta taava taakkua aningaasat immikkoortortaqarfitsinnut aasariaqarpagut. Taamaammat sipaarniarfigitinniarutta uagut aamma nammineq sipaarniartariaqassaagut. Ajornartorsioreertugut suli ajornartorsiorninngortinniarsaraatigut, borgmesteri oqarpoq.

Isumaqatigiinniariaaseq isorigaa  

Aninagaasaqarnermut Naalakkersuisup aningaasanut aappaagumut inatsisissap Inatsisartunit pingajussaaneerlugu taasissutigineqannginnerani kommuninut ataatsimoortumik tapiissutit qanoq agguaanneqassanerat kommuninut pisarneq malillugu isumaqatiginniutigissavaa. Isumaqatigiinniariaaseq taama ittoq ukiuni kingullerni arlalissuarni atugaavoq. Nutaamilli eqqarsartoqartariaqalersoq, Malene Vahl Rasmussen isumaqarpoq. Taamaattumik kommuninut Naalakkersuisunullu siunnersuummik apuusseqqammerpoq.

- Siunnersuutigaara kommunit tamarmik immikkut isumaqatigiinniartassasut. Massakkut kommunini borgmesterit tallimaalluta Naalakkersuisumut ataatsimut isumaqatigiinniartarpugut. Taanna tulluarsorinngilara. Kommunini ataasiakkaani atukkagut assigiinngissuteqaqimmata, Malene Vahl Rasmussen oqarpoq.