Naalakkersuisut aningaasanut inatsisissamut siunnersuut saqqummiuppaat

Aningaasanut inatsisissatut siunnersuutip naammassiniarnissaa ajornakusoorsimasoq, siunnersuullu maanna Inatsisartunit suliareqqissaarneqassasoq Aqqaluaq B. Egedep aammaarluni erseqqissarpaa.

Nunatta nunanit tamalaanit soqutigineqarneranut aningaasat missingersuutit nalimmassarniarlugit Naalakkersuisut nunanut allanut isumaginnittoqarfik aamma siuarsarniarpaat.

Naalakkersuisut aappaagumut 10,8 mio. kr.-it kiisalu 2028-mi 2029-milu 7,9 mio. kr.-it immikkoortinneqassasut siunnersuutigaat.

Nunatta tatineqarnerani Naalakkersuisut nunanut allanukarlutik illersuiniarlutik assersuutigalugulug EU-mit nunatsinnut aningaasaliissutinik qulakkeeriniarlutik angalangaatsiartariaqarsimasut Aqqaluaq B. Egedep arlaleriarluni oqaatigaa.

Naalakkersuisut ilaatigut akileraartarnermut isumaginnittoqarfimmi qarasaasiaqarnermut 105 mio. kor.-nik aningaasaleerusuttut Aqqaluaq B. Egede nangilluni oqaluttuarpoq.

– Qarasaasiaqarnerup ineriartornerani ukiut kingulliit qulit malinnaasimanngilagut, Egede oqarpoq nangillunilu:

– 105 mio. kr.-it aningaasarpassuupput,maannakkulli aningaasaliinikkut ukiuni tulliuttuni aningaasarpassuarnik sipaartoqarsinnaavoq, taanna oqarpoq.

Qaraasaasiakkut atortorissaarut nutaaq atorlugu akileraarutinik akiliisitsiniarneq isumannaannerusoq kiisalu innuutaasunut suliffeqarfinnullu sullissineq pitsaanerusoq qulakkeerneqarsinnaavoq.

Qaqortumi mittarfiup inaarsarnissaanut Naalakkersuisut 250 mio. kr.-nik illikartitsipput.

Mittarfik ukioq manna atuleraluarpoq, aningaasalli suli pisariaqartinneqartut Aqqaluaq B. Egede oqarpoq.

Inunnut innarluutilinnut sullissineq aamma taaneqarpoq.

Naalakkersuisoq naapertorlugu aappaagu 12 mio. kr.-nik annertunernik aningaasaliiffigineqassaaq.

Aningaasat kommunimi sullissinerup inatsisinut naapertuunnerulernissaanut ilaatigut atorneqassapput, inuit innarluuteqartut pitsaanerusumik atugaqarlutillu tapersersorneqarnissaat siunertaralugu.

Siunnersuisarfik Tusaannga 2 mio. kr.-nik amerlanerusunik Naalakkersuisunit aningaasalerneqarniarpoq:

- Meeqqat inuusuttullu inuiaqatigiinni tapersersorneqarnissaat pingaaruteqarpoq, naalakkersuisoq oqarpoq.

Naalakkersuisut siunnersuutigaat Ilulissani atuarfimmut nutaamut 20 mio. kr.-t atorneqassasut.

Atuarfik ilinniarnertuunngorniarfiussaaq, inuussutissarsiornermut sammisuulluni.

Naalakkersuisut ilanngullugu siunnersuutigaat Tasiilami ilinniarfik aamma sanaartorneqassasoq. Tassunga 10 mio. kr.-t illikartinneqassapput.

Aningaasaliinermi Naalakkersuisut kissaatigaat ilinniarfiit immikkut sammineqassasut, pingaartumik inuusuttut amerlanerusut inuussutissarsiornerup iluani piareersimanerulernissaat pillugu.

2027-mut aningaasanut inatsisissatut siunnersuutip saqqummiunnerani

Aqqaluaq B. Egedep oqaatigaa Naalakkersuisut pingaartikkaat piffissami unammillernartorsiorfiusumi Kalaallit Nunaata inuiaqatigiittut ataqatigiinnissaa.

Egede nunanut allanut tunngasut pillugit oqaaseqarpoq, qularnanngitsumik Donald Trumpip nunatsinnik tiguaaniarnera eqqarsaatigalugu.

- Ataatsimoornissarput pingaaruteqarluinnarpo, oqarpoq nangillunilu:

- Ataatsimoortariaqarpugut, ataqqinneqartariaqarluta nunarsuarmilu inuiaqatigiinnut peqataanissamut nukissaqartinneqartariaqarluta. Isumaqatigiinngikkutta aporaassinnaavugut, oqaloqatigiilluta, avissaartuutileratali.

Aningaasanut inatsisissatut siunnersuut sammigamiuk erseqqissarpaa utoqqarnut aningaasartuuteqarneruneq aamma sulisinnaasut ikiliartornerat malugineqarsinnaasoq.

– Aningaasaqarneq pingaaruteqarpoq, inatsisitigullu oqimaaqatigiissaarisoqartariaqarpoq, Aqqaluaq B. Egede oqarpoq.

Aningaasaqarnermut naalakkersuisoq, Aqqaluaq B. Egede (IA), 2027-mut aningaasanut inatsissatut siunnersuut nal. 10.00 saqqummiuppaa.

Naalakkersuisut siunnersuutaat partiit akornanni isumaqatiginninniutitut atortussaavoq, Inatsisartunilu suliarineqartussaalluni.

Allaaserisami uani tusagassiortunik katersortitsinermit malinnaasinnaavutit.