N aamma S: Pilersitsiviunngilaq aaqqitassaqaqaarlu

Aningaasanut aappaagumut Inatsisissatut Naalakkersuisut siunnersuutertik, ullaaq manna saqqummiuppaat. Aningaasaqarnermut Naalakkersuisoq, Aqqaluaq B. Egede (IA), saqqummiussivoq.

Saqqummiussaat Inatsisartuni illuatungiliuttut Sermitsiamut qisuariarfigaat. 

AAMMA ATUARUK:

Aningaasanut inatsisissatut siunnersuut: Ilulissani inuussutissarsiornermik ilinniarfimmut nutaamut millionit, akileraartarnermullu aaqqissuussaaneq ajuloornissaaniit annaanneqassaaq

Siunnersuut 89 millionit koruuninik amigartoortussatut missingersorneqartoq Naleqqap siulittaasuata ima oqaasertalerpaa:

- Saqqummiussaat pilersitsiviussanngilaq. Nunatsinni qanoq aningaasarsiorniarpugut? Soqanngilaq. Qinnuuloornerup qanoq ingerlanneqarnissaanut pilersaarummik saqqummiinertut taaneqarsinnaavoq, Pele Broberg (N), Sermitsiamut oqarpoq.

Taassuma siunnersuut taama isikkoqartillugu innuttaasut ulluinnarni inuuniarnerannik pitsaanerulersitsissanngitsoq nalilerpaa. Aningaasaqarnermut Naalakkersuisup akunnerup ataatsip missaani saqqummiinerani kisitsiserpassuit taaneqarput. Taakkuali innuttaasunut iluaqutissartaqanngitsut illuatungiliuttuni partii anginerpaaq isumaqarpoq. 

- Innuttaasut qassit oorit taakkartugaat iluaqutigivaat? Peqqinnissaqarfimmi nakorsiarneq ajornannginnerulerpa? Naamik. Sineriammi ernisarfiit ammaqqippat? Naamerluinnaq. Maannakkut saqqummiussaat inuit ulluinnarisaannut ataqatigiinngilaq, Pele Broberg oqarpoq.

Siumut: Aaqqitassaqaqaaq

Partiip illuatungiliuttut aappaannit, Siumumit, Erik Jensen, saqqummiussamut aamma oqaasissaaleqinngilaq. Taanna Naleqqamit allaanerusumik isummerpoq. Saqqummiussarmi ajunngitsortaqarnerarpaa.

- Ajunngitsortarisinnaasai tassaapput Ilulissani Tasiilamilu ilinniarfinnik pilersitsinissamut suliaqarnissaq. Isumaqarpugulli ilinniarfiit allat eqqornerlunnginnissaat pingaartillugu taakku suliassaasut. Peqqinnissamut aammalu meeqqanut inuusuttunullu suliniutit taakkua pitsaasutut oqaatigineqarsinnaapput, Erik Jensen Sermitsiamut oqarpoq.

Taamali oqariarluni pitsaasuusorisaminik allanik oqaasissaaruppoq.

- Naalakkersuisut oqaatsit kusanartut atorpaat. "Suleqatigiittariaqarpugut. Ataatsimoortariaqarpugut" Inunnut tusaruminartut. Kisianni aningaasanut inatsisissatut siunnersuut qimerloorutsigu oqaatsit kusanartut timitaqannginnerat ersarittorujussuuvoq, taanna oqarpoq.

AAMMA ATUARUK:

Naalakkersuisut aningaasanut inatsisissamut siunnersuut saqqummiuppaat

Kommuninut ataatsimoortumik tapiissutit ukioq manna 1,9 milliardit koruunit sinneqalaartut aappaagumut 51 millionit koruuninik ikinnerulernissaat aamma isumaqatiginngeqaa.

- Taamaalilluni innuttaasut ulluinnarni eqqorneqarnissaat annernartorujussuussaaq, Erik Jensen oqarpoq.

Timersorneq aningaasartakillisinnaasoq

Siumup aningaasaliissutaasussatut ikilisikkusunneqartut taakkuinnaat maluginianngilai. Timersornermut tapiissutit ukiuni missingersuusiorfiusuni sisamani malunnaatilimmik appariartinneqalernerat aamma iluarinngilaa. Tapiissutimmi ukioq manna 27 millionit koruuniusut aappaagumit 22 millionit koruninngorteriarlugit 2029-imi suli ikinnerulersillugit 17 millionit koruuniinnanngornissaat Naalakkersuisut siunnerfigaat.

- Timersortartorpassuit, pinaveersaartitsineq ulluinnarnilu sunngiffimmi sammisaqartitsineq pingaarutilerujussuaq inuiaqatigiinnilu annertuumik iluaqutaasoq, nunanut allanummi unammisartut takussaaneruleraluttuinnarput, aningaasaliiffigineqartarneralli apparialerpoq. 

Naalakkersuisut Timersoqatigiit Kattuffiannut aningaasaliissutit ikilisikkusuppaat kiisalu ujakkaarluni unammersuartarnermut, nunarsuarmi sakkortunerpaamik taaneqartartumut, Arctic Circle Racemut aningaasaliissaarusupput.

- Timersornermut tapersersuineq appariarujussualerpoq. Taannalu tupinnartorujussuuvoq, Erik Jensen oqarpoq.

Partii tamakkua ilaatigut nassarlugit Aningaasaqarnermut Naalakkersuisumut isumaqatigiinniassasoq taanna aamma oqarpoq.

Naleraq: Angalaqattaarnitik illersorpaat

Aningaasaqarnermut Naalakkersuisup, Aqqaluaq B. Egedep, siunnersuutertik saqqummiukkamiuk Naalakkersuisut nunatta tatisimaneqarnerani ilissarsiorlutik ilaatigut pilersaarutaanngitsunik angalasariaqartarnerat arlaleriarlugu illersortarpaa. Tamannali Naleqqap pissusissamisoortutut isiginngilaa. 

- Angalaqattaarnitik illersorlugit oqariartuuteqarnera ajuusaarnarpoq. Siunissamut saqqummiinermik peqaratik, innuttaasut ulluinnarsiutaat annerusumik qiviarnagit, pilersaaruteqarfiginagit, maannakkut saqqummiipput, Pele Broberg oqarpoq.

Taassuma isumaqatigiinniarnermi tusarnaarneqarnissartik ilimaginngilaa, matuli matoreerlugu isumaqatigiinniarnianngilaq. 

- Tusagassiorfitsigut suna tamaat saqqummiunnianngilarput, aningaasaqarnermut naalakkersuisoq aamma ataqqillugu. Isumaqatigiinnialerutta tassani saqqummiukkumaarpagut. Pisarnitsitulli qanoq suminngaanniillu aningaasalersorneqassanersut ilanngullugit saqqummiussissaagut, siulittaasoq oqarpoq.