Borgmesteriutitaqartut timigissarnermi akit pillugit: Misissuisoqarluarsimanngilaq

Avannaata Kommuniani aningaassaqarnermut ataatsimiititaliap aalajangiinera kommunalbestyrelsimi amerlanerussutillit tallimanngornermi ilalinngilaat. Siunnersuut tassaavoq timigissartarfinni kommunip ingerlataani ukiumut atuisunut akiliutip 2.500 koruunimut uterteqqinneqarnissaa. 

Qinikkat ukioq manna juunip 26-ani ataatsimiinneranni borgmesteriutitaqartut, tassa Siumut Naleqqallu, timigissarneq ukiumut 50 koruuneqassasoq aalajangerpaat. Borgmesteri Lars Erik Gabrielsen (S), taamanikkut siunnersuuteqartuuvoq. Illuatungiliuttut aalajangiinerup misissorneqarnissaa taamanikkut piumasaraat.

AAMMA ATUARUK:

Timigissartarnerup akitsoqqiinnarnissaa siunnersuutaasoq: Allannguigaluarneq malitassanik malinninnerunngitsoq

Misissuinermi, kommunip eqqartuussissuserisunut suliakkiutaata inernerani, paasinarsivoq taama aalajanngiineq unammilleqatigiinneq eqqarsaatigalugu killiliussanik avaqqussinerusoq, tassa malitassanik malinninnginnerusoq. Tamanna allagaatini Sermitsiap siusinnerusukkut pissarsiarisaani allaqqavoq.

- Aalajangiineq unammilleqatigiinnermi malunnaatilimmik allanngortitsisinnaanermut aarlerinaateqarpoq, taamaammallu kommunit inuussutissarsiornikkut ingerlataannut kommunimut pisinnaatitsissutip killiliussaasa avaqqunnerattut isigineqartariaqarpoq, eqqartuussissuserisut kommunimut allakkiaminni ilaatigut allapput. Nangippullu:

- Taamaattumik inassutigineqarpoq kommunalbestyrelsip 26. juni 2026-imi aalajangiinera atorunnaarsinneqassasoq, kommunillu timigissartarfimmik ingerlatsinermut aaqqissuussineq maannamut atuuttoq, akigitinneqartut atuuttut ilanngullugit, utertillugu atuutilerseqqissagaa, eqqartuussissuserisut kommunip misissuitissimasai allapput. 

Taamaattumik kommunimi ingerlatsiviup ukiumut akiliutaasartup 2.500 koruuninngorlugu uterteqqinnissaa inassutigalugu qinikkanut aalajangigassanngortippaa. Aningaasaqarnermut ataatsimiititaliap, borgmesterimit Lars Erik Gabrielsenimit, siulersorneqartup, akitsueqqinnissaq akuerigaluarpaa.

Napãtôk’: Qulaajaasimaneq naammaginanngilaq

Suliaq kommunalbestyrelsimi suliarineqarmat isuma alla takkuppoq. Borgmesterip tullia siulleq Jens Napãtôk’ (N) borgmesteriutitaqartut oqaaseqartoraat. Taassuma ukiumut aki 50 koruuniusoq illersorpaa.

- Borgmesteriutitaqartut Siumut Nalerarlu pingaartittorujussuuarput kommunitsinni timersornerup tungaatigut inuit akissaqassuseq aallaaviginagu tamarmik periarfissaqarnissaat, Jens Napãtôk’ ataatsimiittarfimmi oqarpoq.

AAMMA ATUARUK:

Avannaata Kommuniani timigissarneq ukiumut 50 koruuniinnaqalertoq - akeerutitsiniarneq naapertuutinngilaq

Taassuma eqqartuussissuserisut suliaat inerniliinerallu naammaginngilaa.

- Qulaajaasimaneq naammaginartumik uagut suleqatigiit borgmesteriutitaqartut Siumut Nalerarlu isiginngilarput.

Taamaattumik maanna inassutaasoq tassa ukiumut 2.500 koruuneeqqittalernissaq aalajangiiffiginagu suliaq politikkikkut suliarineqaqqittussanngorlugu ataatsimiititaliamut suliakkiutaassasoq siunnersuutigaa. 

- Inatsisit iluani sukkut, qanoq periarfissaqarnersoq qulaajarneqaqqissaarsimannginnera uani aallaavigalugu ataatsimiititaliamut sukumiinerusumik suliarineqartussanngorlugu uterteqqikkusupparput, Jens Napãtôk’ oqarpoq.

Tamanna Siumup Naleqqallu akueraat.

Illuatungiliuttut tassa Demokraatit, Atassut, Inuit Ataqatigiillu eqqartuussissuserisup inerniliussai innersuussutigalugit akitoqqanut utertitsinissamik aningaasaqarnermut ataatsimiititaliap aalajangiinera ilalerlugu inassuteqaat akueraat. Borgmesteriutitaqartulli amerlanerugamik suliaq ataatsimiititaliami suliarineqaqqittussanngorpoq.

Illuatungiliuttunit oqaaseqartup, Heidi Møllerip (D), timigissartartut nikerartumik akiliisinneqartarnissaannik aalajangertarneq isumaqatiginngilaa.

- Ajuusaarnarpoq atuisunut taama nikerartigisumik atuititsinerput, taanna ataatsimiittarfimmi oqarpooq.