Danmarkimi kalaallit oqalutsit amerlisut

Odensemi oqaluttaanermik suliffeqarfik GLTolk ineriartorluarlunilu pingaarutilimmik angusaqaqqammerpoq.

- Oqalutsit kalaallisut oqaasillit arfineq-marluk siulliit GLTolk aqqutigalugu naalagaaffimmit akuerisaasumik allagartartaarput. Ukioq ataaseq unnukkut pikkorissarlutillu allattariarsorlutik oqaluttariarsorlutillu misilitsereerlutik allagartartaarput, Arnajaraq Joelsen, GLTolkimik piginnittoq, oqaluttuarpoq.

- Ukiualuit matuma siorna namminersulerama aallaqqaammut assigiinngitsorpassuarnik suliassaqarlunga oqalutsitut sulivunga – suliffeqarfillu maannakkutut alliartorumaartoq takorloorsimanngisaannarpara. Oqaluttaanerilli saniatigut allat ilaatigut pikkorissaanikkut, siunnersuinikkut aqqutissiuinikkullu ikiornissaat aalluppara.

- Tamatuma kingunerisaanik Danmarkimi isumaginninnermut ineqarnermullu aqutsisoqarfimmit misilitsinnermik naammassineqartumik qallunaatut kalaallisullu oqalutsinik ilinniartitsinermik aallartitsinissamut suliniummut tapiissutinik 2024-p naalernerani tunineqarpunga – taamaalillungalu naalagaaffiup akuersissutaanik, pisortat oqartussaasorpassuisa nutserisunik atorfinitsitsigaangamik pingaartitaannik, pissarsillunga.

Atuisut amerliartortut

- Allagartartaarnissamut periarfissaqalernerput tulluusimaarutigeqaarput – aamma oqalutsinngorlaat, taama angusaqarniarlutik ilungersorlutik sulisimasut, nuannaarutigalugillu tulluusimaarutigaagut. Danmarkimi oqaluttaanerup pitsaasuunissaanut pingaarutilittut alloriarneruvoq, Arnajaraq Joelsen oqarpoq.

- Ukiuni kingullerni kalaallisut qallunaatullu nutserinermik atuineq annertusiartupiloorpoq. Kalaalerpassuit pisortanut attaveqarnerminni oqalutsimit ikiorneqarnissamik pisariaqartitsisut pingaartumik kommuninit maluginiarnerulerneqarput.

- Siorna VISO-mut kalaallisut oqaatsit kulturilu pillugit oqaluttaallutalu siunnersuisartuusussanngortututu toqqarneqaratta GLTolk-imi tulluusimaarutigaarput. Danmarkimi innuttaasut kalaallisut oqaasillit isumaginninnikkut suliassani imaannaanngitsuni pisariaqartumik oqaatsitigut kulturikkullu tapersersorneqassasut suleqatigiinnikkut qulakkeertarparput, Arnajaraq Joelsen oqaluttuarpoq.

VISO meeqqanik angerlarsimaffiup avataanut inissiinermut, oqartussaasunut attaveqarnermut isumaginninnermullu tunngasunut immikkut ilisimasalinnik siunnersuisarluni pisortani suliffeqarfiuvoq.

GLTolk-ip pikkorissartitsinera ukiup ataatsip ingerlanerani ingerlanneqartarpoq, ilinniarnerullu immikkoortui marlunnut avissimapput. Pikkorissaaneq kalaallinut Danmarkimi najugaqartunut, oqalutsitut nutserisutullu sulilerniarusuttunut imaluunniit ilinniagaqarsimanatik oqalutsitut sulilereersunut, naleqqussagaavoq.

Misiliilluni atuagarsorlunilu ilinniartitsineq

Ilinniartitsinermi teorii sungiusarnerillu ataqatigiinneqarput, oqaloqatigiinnerni oqaluttaaneq, taaguusersuutit kiisalu kalaallisuumiit qallunaatuumut nutserineq sammineqarlutik.

Ilinniarnerup immikkoortuani siullermi pisuni assigiinngitsuni oqaluttaariaaseq, ileqqorissaarneq, allattueriaaseq oqaloqatigiinnermilu oqaluttaaneq ilinniarneqartarput. Ilinniarnerup immikkoortuata aappaani suliaqarfinni aalajangersimasuni, matumani peqqinnissaqarfimmi, eqqartuussivimmi kommuuninilu sullinneqarnermi oqaluttaaneq kiisalu allalluni nutserineq sammineqartarput.

Ilinniartitsineq kalaallisut ingerlanneqarpoq. Pikkorissaatit kalaallisut qallunaatullu oqaasertallit toqqarneqarsinnaapput.

Allagartartaarniarluni pIkkorissarneq internetikkut ilinniartitsissutigineqarpoq, taamaalillunilu Danmarkimi sumiikkaluaraanniluunniit peqataasoqarsinnaavoq.

Arnajaraq Joelsenip allagartartaartitsiniarluni pikkorissartitsinerup saniatigut aamma ataatsimiinnerni assigisaannillu toqqutiinnarlugu oqaluttaasinnaanissap pikkorissaatigisinnaanissaa sulissutigaa. GLTolk aamma sapaatip-akunnerata naanerani pikkorissarnernik inatsiseqarnermut kiisalu meeqqanik ilaqutariinnillu isumaginninnermut tunngasunik neqerooruteqarpoq.