ICC-p ataatsimeersuarnera ammartoq – biskoppi qinnussivoq

Inuit Issittormiut Siunnersuisoqatigiiffiata, ICC-ip, ataatsimeersuarnera pingasunngornermi ammaanersiorneqarpoq. Iqalunni ataatsimeersuartoqarpoq. Tamanna suliniaqatigiiffiup ataatsimeersuarnerisa 15-ssaraat.

AAMMA ATUARUK:

ICC International ataatsimiinnermi qulequttat amerlasuut eqqartussavaat

Ataatsimeersuarnermi Inuit aallartitaat 66-it ukioq manna katersuuttut ICC allappoq. Taakkua Canadamit, Kalaallit Nunaannit, Alaskamit Chukotkamiillu aggerfeqarput. Alaatsinaattutut immikkullu qaaqqusat hunnorujulikkaat aamma peqataapput. 

ICC-ip siulittaasua, Sara Olsvig, ammaanermini ilaatigut ima oqarpoq:

- 15-issaanik ataatsimeersuarnitsinnik ammaasinnaagama nuannaarutigeqaara tikeraartitsisunullu qujamasoqaanga. Kingullermik kiinnerluta naapikkattali ukiut arfineq pingasut qaangiussamalerput. Ataatsimeersuartarnivut Inuit katersuuttarnerinut siuttullu tullinnguuttut aqqutissiuuttarnerinut pingaaruteqarluinnarput.

- Maanna 2022-mit 2026-mut qinigaaffik naalersoq, kingumut ukiut sisamat qiviarluni Inuit Inuit Nunaanniittut tamakkerlugit ataatsimoornissaannut suleqatigiikkusussuseqarnissaannullu akornutaasinnaasorpassuarnik aqqusaagaqarsimavugut. Taamaakkaluartoq ICC aamma Inuit patajaassusertik takutippaat. Ataatsimoornerput attatiinnarusupparput, attaveqaativut suliavullu piorsarlugit nangikkusuppavut, ICC-llu pilersinneqaataa piviusunngortikkusullugu, Sara Olsvig oqarpoq.

Ammaanersiornermi Kalaallit Nunaanneersut takutitsilluarput. Tukummeq Qaavigaq qullermik ikitsivoq. HH Suersaq Poulsen qilaatersorpoq aamma Biskopi Paneeraq S. Munk qinnussivoq.

Suliniutissat oqallisaassasut

Ataatsimeersuarnermut qulequtaavoq Inuit Tapiriit Nunarjuarmi. Ataatsimeersuartut ataatsimeersuaqqinnissamut, tassa 2030-mut, anguniagassaajumaartussanik oqallittassapput.

AAMMA ATUARUK

Kalaallit Nunaata ICC-mi siulittaasuuffia naangajalerpoq

- Nunarsuarmi allanngorartumi piffissamilu allanut sanillersuukkuminaaffiusumi, ICC ataatsimoortitsiniarluni oqariartuuteqarpoq. Inuit suleqatigiiffiat soorlu aatsaat taamak pingaaruteqartigilersimasoq, uagullu Inuit pingaartitavut pillugit isummavut allanngorsimanngillat periutsivulli siuariartillugit. Taamaaliornikkut peqataasinnaatitaanerput atorparput nunarsuarlu tamakkerlugu aalajangiisartunut peqataalluta, uagut: Inuit, Sara Olsvig oqarpoq.

Inuit Nunaasa immikkoortuinit sisamaasunit inuusuttut saqqumiineranik ulloq aamma imaqarpoq. Inuit siunissami imminnut oqartussaaffeqarnerulernissaanik issittumilu suleqatigiinnermik ilusilersuinermi inuusuttunik siuttoqarnissap pingaaruteqassusaa ersarissarneqartoq, ICC allappoq.

Arfininngorneq ilanngullugu ataatsimeersuartoqassaaq. Kattuffiup siulittaasussaanik siulersuisuunernillu aamma qinersisoqassaaq. 

- Naggasiutigineqassaaq Nalunaarummik atsioqatigiinneq, taannalu ukiuni tullinnguuttuni sulinissamut najoqqutaassalluni. Ataatsimeersuarnerup naammassinerani ICC-mi siulittaasuutitaqarneq Kalaallit Nunaannit Canadamut tunniunneqassaaq, ICC allappoq.