Kalaallit Nunaata ICC-mi siulittaasuuffia naangajalerpoq

Sara Olsvig ICC-Kalaallit Nunaat sinnerlugu ukiuni sisamani ICC Internationalimi, siulittaasuunera sapaatit-akunneri arlaqanngitsut qaangiuppata, naammassissaaq. Inuit kattuffiat Iqalunni Nunavimmi ataatsimeersuarnera juulip 22-aniit 25-anut ingerlanneqarnerani, ICC Canada siulittaasuuffik tigusussanngorpaa.

ICC tusagassiutitigut nalunaarummi allappoq.

Sara Olsvigip sapaatip-akunnerani matumani ukiumoortumik nalunaarusiamini, angusat ukiunilu sisamani eqqissiviilliorfiusuni angusani ima oqaluttuarai:

- Siulittaasuutitaqarnerup naammassiffissaa tikillugu ajunngitsumik misigisimanarpoq. Piffissami allanut nallersuunneqarsinnaanngitsumi ICC nunat tamalaat akornanni ataasiusutut takutitsisarpoq.

- Inuit suleqatigiinnerat inuuniarnermi atukkanik, avatangiisinik, Issittumilu namminerlu oqartussaatitaanermik sammisaqarfiusoq, minnerunngitsumillu inuiaat akornanni suleqatigiiffiusoq aatsaat taama pingaaruteqartigisutut misinnarpoq. Tamatuma peqatigisaanik suliniaqatigiiffik nukittunerulersimasoq, ataatsimoortoq aammalu ilungersuutissarpassuarnut piareersimasoq tunniuttussanngorparput.

Oqaluttuarisaanermi pisut annertuut malunnaatillit

Imaani oqartussaaffik, inuit pisinnaatitaaffii, silap pissusiata allanngoriartornera avatangiisillu ICC-p 2022-mi ataatsimeersuarnermi kingorna immikkut sammivai.

AAMMA ATUARUK

ICC IMO-mi ataavartumik siunersuisartutut inissisimalersoq

- Tulluusimaarutigaara Imarsiorneq pillugu Suleqatigiiffissuarmi, (IMO) ataavartumik tusarniaaviusartunngornerput angusinnaasimagatsigu. Taanna anguniarlugu suleqatigiinneq pisariaqarsimavoq kiisalu nunarsuarmi politikkip ilungersunartorsiorfiunerata nalaani silatusaarluni aqqutissarsiorsinnaassuseq piginnaanerisariaqarsimalluni. Taama inissisimalernikkut Inuit ukiuni aggersuni Issittumi umiarsuartigut angallanermut sunniuteqarsinnaalerput.

- Pinngortitaq imarlu avatitsinni qanillugu inuuvugut, umiarsuit minguinnerusumik avatangiisinut kinguneqannginnerusumik angalasassasut kissaatigaarput. ICC aamma tamatuma saniatigut suliassaa qitiusoq tassaavoq Issittoq pillugu aalajangiiniartoqartillugu uaguttaaq peqataatinneqartassasugut, Sara Olsvig oqarpoq.

ICC-p Issittumi Siunnersuisoqatigiinni sulinera taassuma tulluusimaarutigaa, tassani naalagaaffiit nunallu inoqqaavi allat peqatigalugit naalagaaffiit arfineq-pingasut ataavartumillu ilaasortaasut arfinillit tamarmik nerrivimmeeqatigiinnarnissaat sulissutigisimavaat.

Kalaallit Nunaata siulittaasuutitaqarnerata nalaani ilaatigut aallartitat Ilulissani 2023-mi aasakkut ataatsimiinnerat, Inuit Issittormiut ataatsimeersuarnissaat aamma arnat Inuit ataatsimeersuarnerat siulleq 2025-mi pipput.

Aningaasaqarnikkut ineriartorneq annertooq

ICC Kalaallit Nunaat 2022-p aallartinnerani siulittaasuuffimmik tigusinerani aningaasat atorneqarsinnaasut killeqangaatsiarput, sulisumullu ataatsimut taamaallaat akissaqarlutik.

Sara Olsvigip ICC-Kalaallit Nunaat siulersuisui peqatigalugit suliniuteqarnissamut pilersaarusiorluarnermikkut aningaasaqarneq patajaatsumik ineriartortippaat.

- ICC Kalaallit Nunaata allattoqarfia pimoorussilluni ICC-mut tamarmut, Kalaallillu Nunaanut tamarmut isumalluutissanngorlugu inerisarsimavarput. ICC Kalaallit Nunaata ukiuni aggersuni suliani pingaarutillit makkununnga tunngasut: Nunat Inoqqaavisa pisinnaatitaaffii, akisussaassuseqartumik imartanik aqutsineq, inuusuttunik akuutitsineq, Issittumi Siunnersuisoqatigiinnut suleqataaneq, silap pissusia avatangiisillu pillugit sulineq, sorpassuillu allat nangissinnaanngorpai, oqarpoq.

Maannakkut allattoqarfimmi atorfiit quliupput, Sara Olsvigillu piffissaq aggersoq isumalluarfigaa, ICC Kalaallit Nunaannilu aqutsisunut nutaanut suliassat ingerlateqqikkumallugit.