Imminut maluginiariarlutit sammivissat aalajangeruk

Ilinniagaqarnissamut utoqqaavallaartoqarsinnaanngitsoq, aamma ilinniaqqittoqarsinnaasoq arlaleriarlunga oqarfigineqartarpunga.

Aamma inunnik utoqqalisinertik patsisigalugu ilinnianngiinnartartunik naapitsinikuuvunga. Allallu aalajangersimasartik aalajangiusimajuartariaqaramikku suliffitsik inuunermut ajoqutaasinnaagaluartoq suliffigiinnarusullugu aalajangertarput. Isuma eqqortoq suua?

Nammineq allamik ilinniagaqarniarnanga aalajangernikuugaluarlunga namminersortutut inuuniarlunga aalajangerama suliffinni nutaarluinnarmut sanguvunga. 24-nik ukioqarlunga tusagassiortutut naammaninniit aningaasarsiortuuvunga - pisortat suliffeqarfiutaanni namminersortunilu suliffeqarnikuullunga. Suleqataannaallungalu pisortatut atorfeqartarsimavunga.

Inuttut pissutsit pissutigalugit ilaquttakkalu Danmarkimut nuunniarluta aalajangeratta CV-ga suliffittaassutigissallugu neriuutigaara. Ukiuni 20-ni misilittagaqarluarsimanera iluaqutiginngilara, taamaammat namminersortunngorpunga. Annilaanganarpoq, arlaleriarlungalu pissanganerlunninnik naarluttarpunga.

Qaammammut aalajangersimasumik akissarsiaqannginneq ullullu tamaasa suleqatinik naapitaqartannginneq artornarpoq. Allamik ilinniagaqarnissara qasseriarlungamita eqqarsaatigisarpara. Sunngussagamami? Qanoq aningaasaqarnitsinnut, piffissaqarnitsinnut ilaqutariinnitsinnullu ataqatigiisissavarput? Aalajangigassarpassuit pissutigalugit aalajangiinissaq kinguarsarpara. 

Sulinera pingaarnerutilerpara, ilaannilu kiserliulerlungalu marlussoriarlunga stressilerpunga – qujanartumik sakkortunngitsumik. Ulluinnarni suliassakka oqimaaqatigiissaarniarlugit naak piginnaaninnut naapertuutinngitsumik atorfittaarnissara ajornakusoortikkaluarlugu (torrutiinnarlugu oqaluttaasinnaanngilanga, allakkanilli nutserisinnaavunga) ullup affaani oqalutsitut sulilerniarlunga aalajangerpunga. Ukiulli ataatsip missaa qaangiuttoq unitsippara. Suliakka maqaasivakka, aamma namminersortutut inuuneq pissanganartoq allanngorartuartartorlu maqaasivara.

Maanna allat marluk suleqatigalugit kalaallit Danmarkimiittut nittartakkakkut tusagassiuuteqarnissaannik suliniuteqarpunga: Tusarfik. PIkkunarpoq. Tamatumunnga atatillugu suliassarpassuaqarpoq. Piffissaralu tamaat tassunga atortarpara.

Sapiissuseqarsimasuuguma nukissaqarsimagaluarumalu allamik sammiveqalerlungalu ilinniagaqarsinnaagaluarpunga. Inuit sapiillutik allannguisut nersortarpakka. Qiteraq Eugenius pillugu sapaatip akunnerani kingullermi Inuit-imi allaaserisaq ataqqilluinnarpara, taannami stressernini pissutigalugu allatut iliorniarluni aalajangerpoq. Taanna maanna nuannarisaminik nutaamik ilinniarpoq. Inunnik unillatsiarlutik ingerlavissartik eqqortuunersoq eqqunngitsuunersorluunniit maluginiartartunik ataqqinningaarpunga.

Nammineq ilinniarama inuusuttut ilinniarunnaaginnarsimasut akornanniikkunnaarusunnginnama uteriitsuullungalu ilinniakkama naammassinissaa ilungersuutigaara. Taamatut aalajangersimatigalunga unammilligassarpassuakka, akerlilersorneqarnikka takorluukkallu piviusunngorsinnaanngitsutut isikkoqartut anigorniartarpakka. Inuunera paatsiveerusimaarnartarlunilu ulapinnarpoq. Tamannali eqqoraluarpat eqqunngikkaluarpalluunniit nammineq aalajangigaraaraa.

Kalaallit inuusuttut ilinniartut sapaatip akunnerata naanerani Nordatlantisk Bryggemi suliffissanik nittarsaassinermi naapippakka. Takorluukkamik angunissaat sulissutigaat. Imminnut Kalaallit Nunaatalu siunissaa eqqarsaatigalugit aalajangiipput. Siunissami qanoq ingerlassanersut piffissap takutissavaa. Aalajangersimasatillu namminnerminnut eqqortuunersut tamarmik immikkut paasiumaaraat neriuppunga.

Tassami suliffimmut qaffakkiartornissamullu ajunngitsumik attaveqarneq aalajangikkallu nuannaarutiginissaat pingaaruteqarnerupput. Taarserneqarsinnaavutit, sulinerilli pissutigalugu annaasatit taarsersinnaanngilatit.